ឧត្តមសេនីយ៍ត្រី អ៊ុ សុភា នាំយកអំណោយរបស់ មេទ័ពជើងគោក និងលោកជំទាវ ឧបត្ថម្ភដល់គ្រួសារអតីតយុទ្ធជនពិការ និងប្រជាពលរដ្ឋជាស្ត្រីមេម៉ាយទីទ័លក្រ ១៣គ្រួសារ ក្នុងស្រុករលាប្អៀរ
ភ្នំពេញ៖ ឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត នៅព្រឹកថ្ងៃទី១ ខែសីហា ឆ្នាំ២០២២ បានដឹកនាំក្រុមការងារមនុស្សធម៌ នាំយកអង្ករចំនួន ៦៥០គីឡូក្រាម ស៉ីម៉ង់ត៍ ៣៩បេ ស័ង្កសី ២១០សន្លឹក មី ២៦កេស អាវរងា ១៣អាវ មុង ១៣ ម៉ាស់ ១៣ប្រអប់ ជែលលាងដៃ ៣៩ដប រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ពេជ ចន្នមុនី ហ៊ុន ម៉ាណែត ឧបត្ថម្ភដល់គ្រួសារអតីតយុទ្ធជន និងប្រជាពលរដ្ឋជាស្រ្តីមេម៉ាយទីទ័លក្រចំនួន១៣គ្រួសារ មកពីឃុំគោកបន្ទាយ និងឃុំភ្នំក្រាំងដីមាស ស្រុករលាប្អៀរ ខេត្តកំពង់ឆ្នាំង ។
លោក មេបញ្ជាការ បានពាំនាំប្រសាសន៍ផ្តាំផ្ញើ សួរសុខទុក្ខរបស់ ឯកឧត្តម មេបញ្ជាការ កងទ័ពជើងគោក និងលោកជំទាវ ដល់គ្រួសារប្រជាពលរដ្ឋទាំង១៣គ្រួសារ ។ លោកបញ្ជាការ បានបញ្ជាក់ថា ឯកឧត្តម ហ៊ុន ម៉ាណែត និងលោកជំទាវ តែងតែយកចិត្តទុកដាក់គិតគូរពីសុខទុក្ខប្រជាពលរដ្ឋគ្រប់ទីកន្លែងគ្រប់កាលៈទេសៈដោយមិនប្រកាន់និន្នាការនយោបាយអ្វីទាំងអស់ ទីណាមានប្រជាពលរដ្ឋជួបការលំបាកទីនោះតែងមាន ឯកឧត្តម ហ៊ុន ម៉ាណែត និងលោកជំទាវ ។
ក្រុមគ្រួសារប្រជាពលរដ្ឋទាំង១៣គ្រួសារបានថ្លែងអំណរគុណយ៉ាងជ្រាលជ្រៅចំពោះ ឯកឧត្ដម ហ៊ុន ម៉ាណែត និងលោកជំទាវ អ្នកបានគិតគូរអំពីសុខទុក្ខ និងការរស់នៅរបស់ពួកគាត់ ៕
