ចិនប្រកាសដាក់វិធានការគ្រប់គ្រងការនាំចេញលើក្រុមហ៊ុនអាមេរិក ចំនួន១០ ក្នុងវិស័យការពារជាតិនិងរ៉ែកម្រ ឆ្លើយតបការកត់ឈ្មោះក្រុមហ៊ុនចិនចូលបញ្ជីខ្មៅរបស់អាមេរិក

ប៉េកាំង៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី២២ ខែមិថុនា ឆ្នាំ២០២៦ ទីក្រុងប៉េកាំង បានប្រកាសពីការដាក់វិធានការគ្រប់គ្រងការនាំចេញលើក្រុមហ៊ុនអាមេរិក ចំនួន១០ ក្នុងវិស័យការពារជាតិនិងរ៉ែកម្រ ឆ្លើយតបការកត់ឈ្មោះក្រុមហ៊ុនចិនចូលបញ្ជីខ្មៅរបស់សហរដ្ឋអាមេរិក ហើយថែមទាំងបានដាក់ បម្រាមលទ្ធកម្មសាធារណៈ ចំពោះក្រុមហ៊ុនអាមេរិករាប់សិបផ្សេងទៀត។

ការចេញចំណាត់ការខាងលើនេះ គឺមួយខែបន្ទាប់ពីប្រធានាធិបតីអាមេរិក លោក ដូណាល់ ត្រាំ បានបំពេញទស្សនកិច្ចមកកាន់ប្រទេសចិន ដើម្បីព្យាយាមស្តារស្ថិរភាពទំនាក់ទំនងឡើងវិញ អំឡុងកិច្ចប្រជុំកំពូលជាមួយប្រធានាធិបតីចិន លោក ស៉ី ជីនពីង។ ប៉ុន្តែក្រោយទស្សនកិច្ចនោះ ទីក្រុងវ៉ាស៉ីនតោន ក៏បានបញ្ចេញបញ្ជីខ្មៅមួយ មានឈ្មោះក្រុមហ៊ុនចិនសរុបរហូតដល់៨០ រាប់ទាំងបុត្រសម្ព័ន្ធរបស់ពួកគេ ដែលត្រូវអាមេរិកអះអាងថា បានជួយគាំទ្រយោធាចិន ជាហេតុនាំឱ្យទីក្រុងប៉េកាំងប្រតិកម្មភ្លាមៗនាពេលនោះថា នឹងចាត់វិធានការសងសឹកវិញ។

ក្រសួងពាណិជ្ជកម្មចិន បាននិយាយថា វិធានការគ្រប់គ្រងការនាំចេញនេះ គឺដើម្បីឆ្លើយតបទង្វើខុសឆ្គងរបស់រដ្ឋាភិបាលអាមេរិក ហើយក៏ដើម្បី រក្សាការពារសន្តិសុខជាតិផងដែរ។ ក្រុមហ៊ុនអាមេរិកទាំង១០នោះ រួមមានដូចជា Aveox ដែលកាន់កិច្ចសន្យាការពារជាតិពាក់ព័ន្ធផ្នែកដែនអាកាសនិងអវកាស ជាមួយយោធាអាមេរិក និង Oshkosh Defense ដែលផលិតយានយន្តយោធាឱ្យអាមេរិក។

ទន្ទឹមគ្នា ក្រសួងហិរញ្ញវត្ថុអាមេរិក បានប្រកាសដាក់បម្រាមមិនឱ្យអង្គភាពនិងស្ថាប័នរបស់ខ្លួន ដែលពាក់ព័ន្ធក្នុងវិស័យលទ្ធកម្មសាធារណៈ ទិញផលិតផលដែលផលិតដោយ ក្រុមហ៊ុនអាមេរិកសរុបចំនួន៤៦ ក្នុងនោះរួមមានទាំង Lockheed Martin, Raytheon និងផ្នែកការពារជាតិរបស់ Boeing។ ប៉ុន្តែក្រុមហ៊ុនដែលមានការវិនិយោគរបស់អាមេរិក នៅក្នុងប្រទេសចិន គឺត្រូវបានលើកលែង៕