ប្រធានគណៈកម្មាធិការទី៥ ព្រឹទ្ធសភា នាំយកទេយ្យទានទៅប្រគេនព្រះសង្ឃគង់ចាំព្រះវស្សាក្នុងព័ទ្ធសីមាវត្តស្បែង ស្ថិតនៅក្នុងស្រុកពញាឮ
ភ្នំពេញ៖ លោកជំទាវ ទី បូរ៉ាស៊ី ប្រធានគណៈកម្មាធិការទី៥ ព្រឹទ្ធសភា អមដំណើរដោយលោក ស៊ឹម សុខវិបូរ ប្រធានលេខាធិការដ្ឋានសមាគមសង្គហមន្ត្រីរាជការនៃ អ.ពស និងលោកជំទាវ សាយ ចាន់ណាក់ នាយិកាពិធីការសម្តេចវិបុលសេនាភក្តីប្រធានព្រឹទ្ធសភា លោក នុត ប៉ាត ទីប្រឹក្សាក្រសួងធនធានទឹកនិងឧតុនិយម និងលោក លោកស្រី មន្ត្រីនៃអគ្គលេខាធិការដ្ឋានព្រឹទ្ធសភា នាថ្ងៃទី៦ ខែកក្កដា ឆ្នាំ២០២២ បានអញ្ជើញបំពេញកុសលក្នុងរដូវដែលព្រះសង្ឃនឹងគង់ចាំព្រះវស្សាអស់ត្រីមាសក្នុងព័ទ្ធសីមាវត្តស្បែង ដែលជាអារាមហ្លួងក្នុងសម័យរាជធានីឧដុង្គ ស្ថិតនៅភូមិធ្យូង ឃុំវិហារលួង ស្រុកពញាឮ ខេត្តកណ្តាល ។
លោកជំទាវប្រធាន និងសហការីបាននាំយកនូវទេយ្យទានជាសម្ភារ ថវិកា ភេសជ្ជៈ និងចង្ហាន់ (បាញ់ហ៊យ) មកបវារណាប្រគេនព្រះសង្ឃដែលមានព្រះអង្គគ្រូ សុត លីសឿន ជាព្រះចៅអធិការ រួមមាន៖ ទៀន១គូ ផ្កាស្រស់៤កន្ត្រក សាដក៧ ថវិកាមួយចំនួន អង្ករ២បាវ(១០០គ.ក្រ) ទឹកសុទ្ធ៥កេស ទឹកក្រូច៥កេស មី១កេសធំ ត្រីខ១កេសធំ ទឹកដោះគោខាប់១កេសធំ ផ្លែឈើ២កេស ទឹកត្រី៣យួរ ទឹកស៊ីអ៉ីវ ៣យួរ ម៉ាស់៤ប្រអប់ធំ។
លោកជំទាវ បានឧទ្ទិសផលានិសង្ឃនៃសទ្ធាជ្រះថ្លាដ៏បរិសុទ្ធនេះ ជូនវិបាកបដិសន្ធិវិញ្ញាណនៃបុព្វការីជនគ្រប់ជំនាន់ និងយុទ្ធជន យុទ្ធនារី ស្នេហាជាតិទាំងអស់ផងដែរ៕
