ក្នុងស្មារតីសាមគ្គីភាព និងការដឹងគុណ! រដ្ឋបាលខេត្តតាកែវ នាំយកអំណោយ “មូលនិធិបេះដូងមហាគ្រួសារខ្មែរ” ជូនដល់កងទ័ពជួរមុខ និងប្រជាពលរដ្ឋនៅខេត្តព្រះវិហារ

ព្រះវិហារ៖ នៅព្រឹកថ្ងៃអាទិត្យ ទី២៥ ខែមករា ឆ្នាំ២០២៦ ក្នុងស្មារតីសាមគ្គីភាព និងការដឹងគុណយ៉ាងជ្រាលជ្រៅចំពោះវីរៈកងទ័ពដែលកំពុងឈរជើងការពារបូរណភាពទឹកដី ឯកឧត្តម យស ណាស៊ី ប្រធានក្រុមប្រឹក្សាខេត្ត និងឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានដឹកនាំគណៈប្រតិភូរដ្ឋបាលខេត្ត អញ្ជើញចុះសួរសុខទុក្ខ និងនាំយកគ្រឿងឧបភោគ បរិភោគ ព្រមទាំងសម្ភារៈប្រើប្រាស់ជាច្រើន ជូនដល់កងទ័ពជួរមុខ និងបងប្អូនជនភៀសសឹក ក្នុងភូមិសាស្ត្រខេត្តព្រះវិហារ។

នៅក្នុងឱកាសនោះ ឯកឧត្តម វ៉ី សំណាង បានមានប្រសាសន៍ថា ការចុះនាពេលនេះ គឺក្នុងគោលបំណងពាំនាំនូវការសួរសុខទុក្ខ និងទឹកចិត្តស្រឡាញ់ចេញពី “បេះដូងអ្នកខេត្តតាកែវ” តាមរយៈ មូលនិធិបេះដូងមហាគ្រួសារខ្មែរ ដើម្បីជួយសម្រួលដល់ការលំបាកប្រចាំថ្ងៃរបស់នាយទាហាន នាយទាហានរង និងពលទាហាន ដែលកំពុងបំពេញភារកិច្ចការពារជាតិមាតុភូមិយ៉ាងស្វាហាប់។

ឯកឧត្តម វ៉ី សំណាង មានប្រសាសន៍ថា ថ្ងៃនេះខ្ញុំបានដឹកនាំគណៈប្រតិភូខេត្តតាកែវ មកសួរសុខទុក្ខនាយទាហាននាយទាហានរងពុលទាហាន ដែលមានភារកិច្ចប្រចាំការនៅទឹកប្រាសាទព្រះវិហារ ព្រមទាំងបាននាំយកអំណោយមហាគ្រួសារខ្មែរ ” បេះដូងអ្នកខេត្តតាកែវ ” មួយចំនួនធំដើម្បីជួយសម្រួលដល់ការលំបាករបស់ពួកគាត់ ។

ឯកឧត្តមបន្តថា ក្នុងនាមប្រជាពលរដ្ឋខ្មែរ និងក្នុងនាមខ្លួនខ្ញុំផ្ទាល់ សូមសម្ដែងនូវការដឹងគុណយ៉ាងជ្រាលជ្រៅបំផុតចំពោះ រាជរដ្ឋាភិបាលកម្ពុជាដែលមាន សម្ដេចតេជោធិបតី មានលោកទាំងពីរបានខិតខំប្រឹងប្រែង យកអស់កម្លាំងកាយចិត្តប្រាជ្ញាស្មារតីក្នុងការការពារបូរណៈភាពទឹកដីពីចោរសៀមឈ្លានពាន ។

ឯកឧត្តម វ៉ី សំណាង បន្ថែមទៀតថា ទន្ទឹមនឹងនេះក៏សូមគោរពដឹងគុណចំពោះវីរៈកងទ័ព កងនគរបាលទាំងអស់ដែលបានលះបង់សាច់ស្រស់ ឈាមស្រស់ ដើម្បីជាតិមាតុភូមិរបស់យើងផងដែរ៕