រដ្ឋបាលខេត្តព្រះសីហនុ រៀបចំពិធីបើកសន្និបាតបូកសរុបលទ្ធផលការងារប្រចាំ ឆ្នាំ២០២៥ និងលើកទិសដៅការងារឆ្នាំ២០២៦
ព្រះសីហនុ៖ នៅព្រឹកថ្ងៃទី២៣ ខែមករា ឆ្នាំ២០២៦ ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ អញ្ជើញបើកសន្និបាតបូកសរុបលទ្ធផលការងារប្រចាំ ឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តព្រះសីហនុ។
ពិធីនេះក៏មានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រីអភិបាលរងខេត្ត លោកនាយក នាយករងរដ្ឋបាលខេត្ត កងកម្លាំងប្រដាប់អាវុធ មន្ត្រីរាជការ អភិបាលក្រុង ស្រុក មេឃុំ ចៅសង្កាត់ មេប៉ុស្តិ៍រដ្ឋបាលទាំង២៩ និងវិស័យឯកជន។
ឯកឧត្តម វង្ស ផាណាត ប្រធានក្រុមប្រឹក្សាខេត្តព្រះសីហនុ បានថ្លែងថា ស្របតាមផែនការយុទ្ធសាស្ត្រអភិវឌ្ឍជាតិ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា គណៈបញ្ជាការឯកភាពរដ្ឋបាលខេត្ត បានខិតខំបង្ការទប់ស្កាត់ បង្ក្រាបឧក្រិដ្ឋកម្មគ្រប់ប្រភេទ បង្ក្រាបបទល្មើសល្បែងអនឡាញខុសច្បាប់ និងបទល្មើសឆបោកតាមប្រព័ន្ធបច្ចេកវិទ្យា និងរាល់សកម្មភាពនានា ដែលប៉ុនប៉ងបង្កឱ្យមានភាពចលាចលវឹកវរក្នុងខេត្ត។
ឯកឧត្តម ប្រធានក្រុមប្រឹក្សា បន្ដថា ព្រមជាមួយគ្នានេះ ការការពារសុវត្ថិភាពទាំងស្រុងជូនថ្នាក់ដឹកនាំកំពូលរបស់ជាតិ ឥស្សរជនជាតិ និងគណៈប្រតិភូបរទេសនានា ដែលមកបំពេញទស្សនកិច្ចនៅខេត្តព្រះសីហនុ ព្រមទាំងរក្សាការពារសន្តិសុខ សុវត្ថិភាព នៃព្រឹត្តិការណ៍នានាក្នុងខេត្ត។
គណៈបញ្ជាការឯកភាពរដ្ឋបាលខេត្តព្រះសីហនុ បានយកចិត្តទុក ដាក់ជំរុញជាប់ជាប្រចាំនូវការអនុវត្តគោលនយោ បាយ “ភូមិ-ឃុំ-សង្កាត់ មានសុវត្ថិភាព” និងបានធ្វើការផ្សព្វផ្សាយគោលនយោបាយនេះ តាមគ្រប់រូបភាពដល់មន្ត្រីរាជការ បុគ្គលិក កម្មករ កម្មការិនី និងប្រជាពលរដ្ឋនៅទូទាំងខេត្តព្រះសីហនុ៕
