ភ្នំពេញ៖ ស្ថានទូតចិនប្រចាំកម្ពុជាកាលពីពេលថ្មីៗនេះ បានរៀបចំកម្មវិធី “បើករថយន្តចិន ដើរផ្លូវមិត្តភាព” ដោយឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជាបានដឹកនាំមន្រ្តីការទូតនៃស្ថានទូតចិនបើកបររថយន្តចិនម៉ាកHong Qiដោយចេញដំណើរពីរាជធានីភ្នំពេញ ឆ្ពោះទៅកាន់តំបន់សេដ្ឋកិច្ចពិសេសក្រុងព្រះសីហនុដោយតាមផ្លូវល្បឿនលឿនភ្នំពេញ-ក្រុងព្រះសីហនុ។
លោក Wu Guoquan ទីប្រឹក្សាសេដ្ឋកិច្ចនិងពាណិជ្ជកម្ម និងលោក Zhao Haiyan អគ្គទីប្រឹក្សា និងមន្រ្តីការទូតផ្សេងទៀតនៃស្ថានទូតចិនប្រចាំកម្ពុជាបានអញ្ជើញចូលរួមក្នុងកម្មវិធីខាងលើ។
ឯកឧត្តមឯកអគ្គរដ្ឋទូត បានពិភាក្សាជាមួយសហគ្រាសនៅក្នុងតំបន់សេដ្ឋកិច្ចពិសេសក្រុងព្រះសីហនុ និងបានស្តាប់របាយការណ៍ការងារពាក់ព័ន្ធរបស់ក្រុមហ៊ុនចិនCRBCនិងតំបន់សេដ្ឋកិច្ចពិសេសក្រុងព្រះសីហនុ។
ឯកឧត្តមមានប្រសាសន៍ថា ក្រុមហ៊ុនចិនCRBCនិងតំបន់សេដ្ឋកិច្ចពិសេសក្រុងព្រះសីហនុ គឺជាសហគ្រាសចិនឆ្នើមតំណាងនៅក្នុងប្រទេសកម្ពុជា។ សង្ឃឹមថាសហគ្រាសនឹងបន្តធ្វើអាជីវកម្មស្របច្បាប់ ការពារសិទ្ធិផលប្រយោជន៍ស្របច្បាប់របស់និយោជិត និទានឱ្យបានល្អនូវរឿងនិទានរបស់ចិន ឆ្លើយតបយ៉ាងសកម្មចំពោះបញ្ហាប្រឈមផ្សេងៗ ដើម្បីរួមចំណែកដល់ការកសាងសហគមន៍វាសនារួមរវាងចិន-កម្ពុជាប្រកបដោយអត្ថន័យយុទ្ធសាស្រ្ត។
ផ្លូវល្បឿនលឿនភ្នំពេញ-ក្រុងព្រះសីហនុ គឺជាផ្លូវល្បឿនលឿនដំបូងគេបង្អស់ក្នុងប្រទេសកម្ពុជាដែលវិនិយោគកសាងឡើងដោយក្រុមហ៊ុនចិនCRBC មានប្រវែងសរុប១៨៧.០៥គីឡូម៉ែត្រ។ ការដ្ឋានសំខាន់ៗបានតភ្ជាប់ទាំងស្រុង គ្រោងនឹងដាក់ដំណើរសាកល្បងនៅខែកញ្ញាខាងមុខនេះ។
តំបន់សេដ្ឋកិច្ចពិសេសក្រុងព្រះសីហនុ ត្រូវបានថ្នាក់ដឹកនាំទាំងពីរប្រទេសប្រសិទ្ធនាមថាជាគម្រោងគំរូសម្រាប់កិច្ចសហប្រតិបត្តិការជាក់ស្តែងរវាងចិន-កម្ពុជា រហូតមកដល់បច្ចុប្បន្ននេះ បានទាក់ទាញសហគ្រាសជាង១៧០ក្រុមហ៊ុនដែលមកពីប្រទេសផ្សេងៗចូលមកតាំងក្រុមហ៊ុន និងបានបង្កើតឱកាសការងារក្នុងស្រុកជាង៣ម៉ឺនកន្លែង។
ថ្នាក់ដឹកនាំស្ថានទូតក៏បានធ្វើដំណើរជាពិសេសទៅកាន់ស្ថានកុងស៊ុលប្រចាំខេត្តព្រះសីហនុដើម្បីទៅសួរសុខទុក្ខមន្រ្តីការទូតនៅទីនោះ៕
