ឯកឧត្តម គង់ សោភ័ណ្ឌ អញ្ជើញសម្ភោធកុដិ សាលាសំណាក់ និងសមទ្ធផលនានាជាច្រើន នៅក្នុងវត្តសុវណ្ណវតី ហៅវត្តព្រែកតាមាក់

ភ្នំពេញ៖ ឯកឧត្តម គង់ សោភ័ណ្ឌ អភិបាលខេត្តកណ្តាល និងលោកជំទាវ ថេង ពុទ្ធិតា នៅថ្ងៃទី២ ខែកក្កដា ឆ្នាំ២០២២ បានអញ្ជើញជាអធិបតី ក្នុងពិធីបុណ្យឆ្លង និងសម្ភោធដាក់ឱ្យប្រើប្រាស់ជាផ្លូវការ កុដិ សាលាសំណាក់ និងសមទ្ធផលនានាជាច្រើន នៅក្នុងវត្តសុវណ្ណវតី ហៅ(វត្តព្រែកតាមាក់) ស្ថិតនៅភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ។

កុដិដែលត្រូវបានសម្ភោធដាក់អោយនប្រើប្រាស់ មានបណ្តោយប្រវែង ៥៥ម៉ែត្រ ទទឹង ៧.២ម៉ែត្រ និងសាលាសំណាក់យាយជី តាជី មានចំនួន១៦ បន្ទប់ ជាសមិទ្ធិផលថ្មីបន្ថែមទៀតបម្រើដល់វិស័យព្រះពុទ្ធសាសនា ដែលជាសាសនារបស់រដ្ឋ និងបានចូលរួមជាប្រយោជន៍ជាកន្លែងសម្រាប់គោរពបូជា ធ្វើបុណ្យទាន រក្សាសីលតាមគន្លងព្រះពុទ្ធសាសនា និងចូលរួមចំណែកជួយសម្រួលការស្នាក់អាស្រ័យរបស់លោកយាយជី តាជី ផងដែរ។

ឯកឧត្តម គង់ សោភ័ណ្ឌបានមានប្រសាសន៍ថា ក្រោមបរិយាកាសសុខសន្តិភាព ស្ថិរភាពនយោបាយ និងមានការអភិវឌ្ឍ វិស័យខាងពុទ្ធចក្រ មានការរីកចម្រើន ប្រកបដោយសាមគ្គីភាព សប្បុរសធម៌ និងសទ្ធាជ្រះថ្លា ជាពិសេស ការជួយតម្កើនតម្លៃនៃព្រះពុទ្ធសាសនា របស់យើងទាំងអស់គ្នា។

ឯកឧត្តមបន្តថា ការឯកភាពជាតិ និងសាមគ្គីភាពផ្ទៃក្នុង គឺជាកត្តាមួយនាំឲ្យសុខសន្តិភាព និងការអភិវឌ្ឍលើគ្រប់វិស័យ ទាំងពុទ្ធចក្រ និងអណាចក្រ។សង្គមជាតិមួយស្ថិតស្ថេរយូរអង្វែងបាន ប្រជាជាតិមួយនោះត្រូវរួបរួមការពារជាតិ សាសនា និងវប្បធម៌ ឲ្យបានម៉ត់ចត់៕