ឯកឧត្តម ហេង ណារ៉េត ដឹកនាំប្រតិភូក្រសួងបរិស្ថាន ចូលរួមសិក្ខាសាលារៀបចំដោយអង្គការ UNIDO ដើម្បីបិតបញ្ចប់ជាផ្លូវការ គម្រោងថ្នាក់តំបន់

អូទ្រីស៖ ឯកឧត្តម ហេង ណារ៉េត អនុរដ្ឋលេខាធិការក្រសួងបរិស្ថាន និងជាជនបង្គោលគម្រោង បានដឹកនាំប្រតិភូក្រសួងបរិស្ថាន រួមមានឯកឧត្តម ផិត ពេឆរ៉ា ជំនួយការអមក្រសួងបរិស្ថាន ឯកឧត្តម ម៉ា ច័ន្ទសទ្ធា ទីប្រឹក្សាអមក្រសួង និងជាប្រធាននាយដ្ឋានរដ្ឋបាល ផែនការ និងហិរញ្ញវត្ថុ លោក ណយ ចេក មកពីរដ្ឋបាលក្រុងបាត់ដំបង និង លោក នាង ច័ន្ទថារ៉ា មកពីសិប្បកម្មកែច្នៃសំណល់ប្លាស្ទិកខេត្តបាត់ដំបង ចាប់ពីថ្ងៃទី២៩ មិថុនា ដល់ថ្ងៃទី១ កក្កដា ឆ្នាំ២០២២ ចូលរួមសិក្ខាសាលារៀបចំដោយអង្គការ UNIDO ដើម្បីបិតបញ្ចប់ជាផ្លូវការគម្រោងថ្នាក់តំបន់ ស្តីពី ការអនុវត្តបច្ចេកវិទ្យាដែលអាចមាន និងការប្រតិបត្តិបរិស្ថានដ៏ប្រសើរ (BAT/BEP) ក្នុងការកាត់បន្ថយការ សាយភាយសារធាតុបំពុលពីដំណើរការដុតឆេះសំរាមនៅទីលានចំហរ ដើម្បីឆ្លើយតបទៅនឹងការអនុវត្តអនុសញ្ញាស្តុកខូម ស្តីពីសារធាតុបំពុលសរីរាង្គមិនងាយបំបែកធាតុ (POPs) ។

គួរបញ្ជាក់ថា ប្រទេសអនុវត្តគម្រោងចំនួន ៥ រួមមាន៖ កម្ពុជា ឡាវ ម៉ុងហ្គោលី ហ្វីលីពីន និងវៀតណាម និងតំណាងចូលរួមមកពីអង្គការ GEF អង្គការ UNIDO និងជំនាញការអន្តរជាតិ បានអញ្ជើញចូលរួមដែលមានសមាសភាពសរុប ចំនួន ៣០ រូប។ គោលបំណងនៃសិក្ខាសាលាគឺដើម្បី ៖ (១) បិទបញ្ចប់ជាផ្លូវការគម្រោងថ្នាក់តំបន់ (២) របាយការណ៌សមិទ្ធិផលសម្រេចបានពីការអនុវត្តគម្រោង និងការវាយតម្លៃ និង (៣) ការពិភាក្សាលើទិសដៅកម្មវិធីទី៨ នៃមូលនិធិសហប្រជាជាតិ (GEF-8) សម្រាប់គាំទ្រលើសំណើសុំឥណទានអនុវត្តគម្រោងអាទិភាពថ្នាក់ជាតិ ។