កម្ពុជា-ហ្វាំងឡង់ ប្តេជ្ញាពង្រឹងទំនាក់ទំនង និងកិច្ចសហប្រតិបត្តិការទ្វេភាគី ដែលមានស្រាប់
ភ្នំពេញ៖ ឯកឧត្តម ណី សំអុល អគ្គនាយកនៃអគ្គនាយកដ្ឋានអឺរ៉ុប អាមេរិក អាហ្វ្រិក និងមជ្ឈិមបូព៌ា កាលពីពេលថ្មីៗនេះ បានទទួល ឯកឧត្តម Jyri Järviaho ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វាំងឡង់ ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងបាងកក ចូលជួបសម្តែងការគួរសម នៅទីស្តីការក្រសួង។
ក្នុងជំនួបនេះ ភាគីទាំងពីរបានសម្តែងការប្តេជ្ញាចិត្ត ក្នុងការពង្រឹងទំនាក់ទំនង និងកិច្ចសហប្រតិបត្តិការទ្វេភាគី ដែលមានស្រាប់ រវាងប្រទេសទាំងពីរ និងបានឯកភាពគ្នាពិនិត្យលទ្ធភាព បង្កើតកិច្ចពិគ្រោះយោបល់ទ្វេភាគី រវាងក្រសួងការបរទេសនៃប្រទេសទាំងពីរ និងចុះអនុស្សរណៈនៃការយោគយល់ ស្ដីពីកិច្ចសហប្រតិបត្តិការ រវាងវិទ្យាស្ថានជាតិការទូត និងទំនាក់ទំនងអន្តរជាតិកម្ពុជា និងវិទ្យាស្ថានការទូតហ្វាំងឡង់។
ចំពោះបញ្ហាតំបន់ និងអន្តរជាតិ ភាគីទាំងពីរបានផ្លាស់ប្ដូរយោបល់ និងពិភាក្សាគ្នាស្ដីពី កម្ពុជាក្នុងនាមជាប្រធានអាស៊ាន វិបត្តិនៅប្រទេសមីយ៉ាន់ម៉ា សង្គ្រាមនៅអ៊ុយក្រែន និងបេក្ខភាពរបស់ហ្វាំងឡង់ចូលជាសមាជិកអង្គការ NATO ៕
