(ហ្វីលីពីន)៖ ឯកឧត្តម ឡា វិបុល អនុរដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ បានចូលរួមវេទិកាអន្តរជាតិលើកទី១១ ស្តីពីការអប់រំនិងជំនាញ ដែលរៀបចំដោយធនាគារអភិវឌ្ឍន៍អាស៊ី នៅទីស្នាក់ការកណ្ដាល ប្រទេសហ្វីលីពីន ចាប់ពីថ្ងៃទី២ ដល់ថ្ងៃទី៥ ខែធ្នូ ឆ្នាំ២០២៥។
មន្រ្តីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ រួមជាមួយតំណាងមកពីក្រសួងអប់រំយុវជន និងកីឡា និងមូលនិធិអភិវឌ្ឍន៍ជំនាញ (Skill Development Fund) បានចូលរួមផ្តល់ធាតុចូលដោយផ្តោតលើការដាក់បញ្ចូលកម្មវិធីសិក្សាAIក្នុងកម្មវិធីសិក្សានិងបណ្តុះបណ្តាលជំនាញ សម្រាប់ការងារក្នុងពេលអនាគត និងផលិតភាពជាតិ។
ក្នុងជំនួបជាមួយលោកស្រី Rachel Thompson នាយកប្រតិបត្តិនៃធនាគារអភិវឌ្ឍន៍អាស៊ីប្រចាំស្នាក់ការកណ្ដាល និងលោកស្រី Jasmine Siddiqi នាយិកាធនាគាអភិវឌ្ឍន៍អាស៊ីប្រចាំនៅកម្ពុជា គណៈប្រតិភូក្រសួងការងារកម្ពុជា ក៏បានជជែកពិភាក្សាពាក់ព័ន្ធនឹងការពង្រឹងមូលធនមនុស្ស និងសមត្ថភាពប្រកួតប្រជែងនៅកម្ពុជា ដោយផ្តោតលើការអនុវត្តប្រកបដោយប្រសិទ្ធភាព និងលទ្ធផល តាមរយៈការដោះស្រាយកង្វះខាតជំនាញជាមួយសកម្មភាពសំខាន់ៗចំនួន៥។
សកម្មភាពទាំង៥ ដែលត្រូវយកចិត្តទុកដាក់នាពេលនោះគឺ ៖ ទី១. ពង្រឹង និងពង្រីកសក្តានុពលជំនាញបច្ចេកទេស វិជ្ជាជីវៈនិងចំណេះដឹង ដែលកម្លាំងពលកម្មត្រូវការ ដើម្បីអាចធ្វើឱ្យមានការផ្លាស់ប្តូរឧស្សាហកម្មប្រកបដោយនិរន្តរភាព និងការងារបៃតង; ២. ពង្រឹងប្រព័ន្ធអេកូសម្រាប់ការអភិវឌ្ឍជំនាញជាពិសេសការអនុវត្តភាពជាដៃគូររវាងរដ្ឋ និងឯកជន លើការបណ្តុះបណ្តាលជំនាញបច្ចេកទេស; ៣. គាំទ្រដល់ការបង្កើនកិច្ចសហការជាមួយគ្រឹះស្ថានបណ្តុះបណ្តាលជំនាញអន្តរជាតិ ៤. គាំទ្រដល់ការអនុវត្តសាកល្បងគន្លងអប់រំដែលមានគន្លងវិជ្ជាជីវៈ នៅតាមវិទ្យាល័យ នៅក្បែរតំបន់សេដ្ឋកិច្ចពិសេស និងតំបន់ឧស្សាហកម្ម និងចំនុចទី៥. គឺធនាគារអភិវឌ្ឍន៍អាស៊ីគាំទ្រនូវការរៀបចំលើជំនាញកសិកម្ម និងកសិឧស្សាហកម្ម៕
