អគ្គនាយក CMAC ៖ អគាររាងគ្រាប់មីន PMN-2 ជានិមិត្តរូបបង្ហាញឱ្យឃើញច្បាស់នូវឆន្ទះ និងការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការអនុវត្តអនុសញ្ញាមីនអន្តរជាតិអូតាវ៉ា ប្រកបដោយជោគជ័យ

ភ្នំពេញ៖ នៅថ្ងៃទី០១ ខែធ្នូ ឆ្នាំ២០២៥ ឯកឧត្ដម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC និងក្រុមការងារក្រុមវិស្វករជប៉ុន នៃក្រុមហ៊ុន SATO KOGYO បានរៀបចំពិធីបញ្ចប់ការងារចាក់ប៊េតង់ទាំងស្រុង សម្រាប់សំណង់អគាររាងគ្រាប់មីន PMN-2 នៅសារមន្ទីតេជោសន្តិភាព ស្ថិតនៅឃុំត្រពាំងធំ ស្រុកបាគង ខេត្តសៀមរាប។

គារនេះមានទំហំផ្ទៃបាត១០៨ម៉ែត្រ គុណ១០៨ម៉ែត្រ និងមានកម្ពស់១៧ម៉ែត្រ ជាអគាររាងគ្រាប់មីន PMN-2 ធំជាងគេលើពិភពលោក។

ឯកឧត្ដម ហេង រតនា បានឲ្យដឹងទៀតថា អគាររាងគ្រាប់មីន PMN-2 នេះ ជានិមិត្តរូបបង្ហាញឱ្យឃើញច្បាស់នូវឆន្ទះ និងការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការអនុវត្តអនុសញ្ញាមីនអន្តរជាតិអូតាវ៉ា ប្រកបដោយជោគជ័យ។ សមិទ្ធិផលនេះ ក៏បង្ហាញឱ្យឃើញនូវស្មារតីរួមគ្នា របស់រដ្ឋភាគីទាំងឡាយ ដែលបានរួមគ្នាអនុវត្តន៍អនុសញ្ញាអូតាវ៉ា ប្រកបដោយការទទួលខុសត្រូវខ្ពស់។

សូមបញ្ជាក់ថា គម្រោងសាងសង់អគាររាងគ្រាប់មីន PMN-2 នេះ បានផ្តួចផ្តើមអនុវត្តតាំងពីថ្ងៃទី២៨ ខែមករា ឆ្នាំ២០២២ និងគ្រោងបញ្ចប់នៅថ្ងៃទី២៨ ខែកុម្ភៈ ឆ្នាំ២០២៦ ខាងមុខនេះ៕