មេបញ្ជាការយោធភូមិភាគពិសេស អញ្ជើញប្រកាសតែងតាំងផ្លាស់ប្ដូរមុខងារ និងបំពាក់ឋានន្តរសក្តិ ជូននាយទាហានតំបន់ប្រតិបត្តិការសឹករងកំពង់ឆ្នាំង
ភ្នំពេញ៖ នៅទីបញ្ជាការ តំបន់ប្រតិបត្តិការសឹករងកំពង់ឆ្នាំង នាថ្ងៃទី៣០ ខែមិថុនា ឆ្នាំ២០២២ បានរៀបចំពិធីប្រកាសតែងតាំងផ្លាស់ប្តូរបុខតំណែង និងបំពាក់ឋានន្តរសក្តិ ជូននាយទាហានចំនួន១៩រូប ក្នុងនោះមាន ប្រកាសតែងតាំងមុខងារចំនួន ៤រូប និងបំពាក់ឋានន្តរសក្តិចំនួន ១៥រូប ដែលពិធីនេះស្ថិតក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ពូ សាប៊ុតឌី មេបញ្ជាការរងកងទ័ពជើងគោក មេបញ្ជាការយោធភូមិភាគពិសេស ។
ឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង បានថ្លែងអំណរគុណយ៉ាងជ្រាលជ្រៅចំពោះ មេបញ្ជាការ យោធភូមិភាគពិសេស ដែលបានផ្ដល់កិត្តិយសអញ្ជើញជាអធិបតីក្នុងពិធីប្រកាសតែងតាំងមុខងារ និងបំពាក់ឋានន្តរសក្តិ ជូននាយទាហានរបស់អង្គភាពនាឱកាសនេះ ។
មេបញ្ជាការ តំបន់ប្រតិបត្តិការសឹករងកំពង់ឆ្នាំង ក៏បានរាយការណ៍អំពីរចនាសម្ព័ន្ធរបស់អង្គភាព លទ្ធផលសម្រេចបាន បញ្ហាប្រឈម និងសំណូមពរមួយចំនួន ជូនគណៈអធិបតី ដើម្បីជួយពិនិត្យសម្រួល និងសុំសេចក្តីសម្រេចតាមឋានានុក្រម ។
ឧត្តមសេនីយ៍ឯក ពូ សាប៊ុតឌី បានចូលរួមអបអរសាទរ និងបានសំណូមពរដល់នាយទាហាន ដែលទើបទទួលបានការតែងតាំងមុខងារ ឋានន្តរសក្តិថ្មី សូមឱ្យបន្តយកចិត្តទុកដាក់ជម្រុញការអនុវត្តតួនាទីភារកិច្ច ដែលថ្នាក់លើប្រគល់ជូនឲ្យមានប្រសិទ្ធភាព ឲ្យសក្តិសមនិងទំនុកចិត្តរបស់ថ្នាក់លើ ។ លោក មេបញ្ជាការ យោធភូមិភាគពិសេស ក៏បានថ្លែងកោតសរសើរចំពោះ អង្គភាពតំបន់ប្រតិបត្តិការសឹករងកំពង់ឆ្នាំង ដែលបានខិតខំយកចិត្តទុកដាក់បំពេញទាំងការងារស្នូល ការងារអតីតយុទ្ធជន ព្រមទាំងការងារមូលដ្ឋាន សម្រេចបានលទ្ធផលល្អប្រសើរជាបន្តបន្ទាប់ ។
លោកមេបញ្ជាការ យោធភូមិភាគពិសេស បានផ្តាំផ្ញើរដល់នាយទាហានទាំងអស់ ត្រូវស្មោះត្រង់ដាច់ខាតជាមួយរាជរដ្ឋាភិបាលស្របច្បាប់ និងខិតខំបន្តយកចិត្តទុកដាក់បំពេញភារកិច្ចតាមបទបញ្ជារបស់ថ្នាក់លើ ៕
