ក្រុមប្រឹក្សាខេត្តកណ្តាល ជំរុញគ្រប់ភាគីបន្ដយកចិត្តទុកដាក់នូវតួនាទីរបស់ខ្លួន ក្នុងការបម្រើសេវាសាធារណៈជូនពលរដ្ឋ ប្រកបដោយប្រសិទ្ធភាព និងការទទួលខុសត្រូវខ្ពស់

កណ្ដាល៖ ឯកឧត្តម នូ សាខន ប្រធានក្រុមប្រឹក្សាខេត្តកណ្តាល បានជំរុញថ្នាក់ដឹកនាំមន្ទីរជុំវិញខេត្ត អភិបាលក្រុង-ស្រុក មេឃុំ និងភូមិ ត្រូវបន្ដខិតខំយកចិត្តទុកដាក់នូវតួនាទីភារកិច្ចរបស់ខ្លួន ក្នុងការបម្រើសេវាសាធារណៈជូនប្រជាពលរដ្ឋ ប្រកបដោយប្រសិទ្ធភាព និងការទទួលខុសត្រូវខ្ពស់។

ការជំរុញរបស់ ឯកឧត្តម នូ សាខន នាឱកាសអញ្ជើញជាអធិបតីរួមជាមួយ លោក តាំង ម៉េងលាន អភិបាលរងខេត្តកណ្តាល ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកណ្តាល លើកទី២ អាណត្តិទី៤ នៅស្រុកមុខកំពូល នៅថ្ងៃទី២៦ ខែវិច្ឆិកា ឆ្នាំ២០២៥ ក្នុងគោលបំណង ដើម្បីផ្សព្វផ្សាយអំពីតួនាទី ភារកិច្ចរបស់ក្រុមប្រឹក្សា និងគណៈអភិបាលខេត្ត ព្រមទាំងលទ្ធផលសំខាន់ៗ ដែលរដ្ឋបាលខេត្តទទួលបាន តាមរយៈការអនុវត្តនូវសកម្មភាពនានាបណ្តាឆ្នាំកន្លងមក និងធ្វើការពិភាក្សា ពិគ្រោះយោបល់ ជាមួយប្រជាពលរដ្ឋ ដើម្បីរកនូវបញ្ហាអាទិភាពសំខាន់ សម្រាប់រដ្ឋបាលខេត្តយកទៅធ្វើការពិចារណាដោះស្រាយ និងបន្តអនុវត្តដើម្បីលើកកម្ពស់ជីវភាពប្រជាពលរដ្ឋនៅគ្រប់មូលដ្ឋាន ភូមិ ឃុំ ស្រុក ឱ្យកាន់តែល្អប្រសើរឡើង។

ឯកឧត្តម នូ សាខន ប្រធានក្រុមប្រឹក្សាខេត្ត បានលើកឡើងថា ដើម្បីចូលរួមចែករំលែកគំនិតយោបល់ និងការយល់ឃើញរបស់ប្រជាពលរដ្ឋ ក្នុងនោះប្រជាពលរដ្ឋមានចម្ងល់ ឬយោបល់ ត្រូវលើកដៃ ឬសរសេរលើក្រដាស ហើយប្រជាពលរដ្ឋគ្រប់រូប មានសិទ្ធិស្មើៗគ្នា ក្នុងការបញ្ចេញមតិយោបល់សូមបងប្អូនប្រជាពលរដ្ឋទាំងអស់ រួមទាំងមន្ត្រីរាជការ សូមមេត្តាលើកឡើងនៅបញ្ហាដែលបានជួបប្រទះកន្លងមក ក៏ដូចជាសំណូមពរផ្សេងៗ ពាក់ព័ន្ធនឹងការផ្តល់សេវាសាធារណៈសេវាតម្រូវការ និងសេវាសំណូមពរជាដើម។

ជាមួយការលើកឡើងរបស់ប្រជាពលរដ្ឋ ក្នុងវេទិកាសាធារណៈរបស់ក្រុមប្រឹក្សាខេត្ត ដូចជា៖ ស្នើសុំដាក់ភ្លើងស្តុប១ កន្លែងនៅតំបន់ឆ្លងកាត់មុខសាលារៀនមជ្ឈមណ្ឌលអ៊ីស្លាមកម្ពុជា ភូមិជ្រោយមេត្រីលើ និងស្លាកសញ្ញាចរាចរណ៍នៅ ផ្លូវជាតិលេខ ៦A ដោយសារនៅតាមចំណុចសាលារៀននៅខ្វះស្លាកសញ្ញា និងតាម ផ្លូវបំបែក បញ្ហាបង្គោលភ្លើងនៅកណ្តាលទ្រូងផ្លូវ៦A ក្នុងស្រុកមុខកំពូល មានដាច់ភ្លើងតាមបង្គោលខ្លះ ហើយមួយចំហៀងបង្គោលខ្លះដាច់ទាំងសងខាង សំណូមពរស្តុកទឹកនៅក្នុងប្រឡាយព្រែកមុខកំពូល ឱ្យនៅនីវ៉ូច្រើន ដើម្បីឱ្យប្រជាជនធ្វើស្រែប្រាំង និងផលិតទឹកស្អាតជូនប្រជាជនក្នុងឃុំប្រើប្រាស់បញ្ហាទឹកស្អាត បញ្ហាដីធ្លីជាដើម។

ក្នុងនោះដែរ ឯកឧត្តម នូ សាខន បានមានប្រសាសន៍សង្កត់ធ្ងន់ថា «សូមថ្នាក់ដឹកនាំមន្ទីរជុំវិញខេត្ត លោកអភិបាលស្រុក មេឃុំ និងភូមិ ត្រូវខិតខំយកចិត្តទុកដាក់នូវតួនាទីភារកិច្ចរបស់ខ្លួន ក្នុងការបម្រើសេវាសាធារណៈ ទាំងសេវាតម្រូវការ និងសេវាសំណូមពរ ជូនបងប្អូនប្រជាពលរដ្ឋ នៅក្នុងមូលដ្ឋានរបស់ខ្លួន ប្រកបដោយប្រសិទ្ធភាព និងការទទួលខុសត្រូវខ្ពស់ ត្រូវចូលរួមទប់ស្កាត់រាល់បទល្មើសនានា ក្នុងមូលដ្ឋាន ជាពិសេសអនុវត្តនូវគោលនយោបាយ ភូមិ-ឃុំ មានសុវត្ថិភាព របស់រាជរដ្ឋាភិបាលកម្ពុជា»។

ឯកឧត្តមប្រធានក្រុមប្រឹក្សា បានគូសបញ្ជាក់ថា រាល់បញ្ហានៃទុក្ខកង្វល់របស់បងប្អូនដែលបានលើកនៅពេលនេះ គឺជាចំណុចសេសសល់ដែលអាជ្ញាធរមូលដ្ឋានមិនទាន់បានអនុវត្ត និងត្រូវយកទៅអនុវត្តឆ្នាំបន្ត ក្នុងការបំពេញតម្រូវការរបស់បងប្អូនប្រជាពលរដ្ឋក្នុងមូលដ្ឋានស្រុក ដោយរួមសហការគ្រប់មន្ទីរស្ថានប័នជំនាញ និង អាជ្ញាធរមូលដ្ឋាន ដោយមានការចូលរួមពីប្រជាពលរដ្ឋផងដែរ។

ក្នុងឱកាសនោះលោក តាំង ម៉េងលាន បានថ្លែងអំណរគុណយ៉ាងជ្រាលជ្រៅ ចំពោះមន្ទីរ-អង្គភាពនានា ជុំវិញខេត្ត ដែលបានធ្វើការបកស្រាយបំភ្លឺ ឆ្លើយតបទៅនឹងសំណួរ កង្វល់របស់បងប្អូនប្រជាពលរដ្ឋ។ សំនួរ និងកង្វល់ដែល អង្គវេទិកានាពេលនេះ ពុំទាន់អាចបកស្រាយបំភ្លឺបាន ក្រុមប្រឹក្សាខេត្ត នឹងយកសំនួរ និងកង្វល់ទាំងនេះ ទៅពិនិត្យ ពិភាក្សា ក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប។

សូមជម្រាបផងដែរថា ក្នុងវេទិកានេះ ទទួលបានសំណើរ និងសំណូមពរពីប្រជាពលរដ្ឋសរុបចំនួន ២៤ (ស្ទួន៣) សំណើរជាលិខិតចំនួន១១ ស្មើនិង១៦សំណើរ សំណើរផ្ទាល់មាត់ ចំនួន៥សំណើរ ស្មើនឹង៨សំណើរ។ក្នុងនោះសំណើរ និងសំណូមពរ ក្នុងផ្នែករដ្ឋបាល សន្តិសុខ សណ្តាប់ធ្នាប់សរុបចំនួន៤ ផ្នែកសេដ្ឋកិច្ច សរុបចំនួន៦ ផ្នែកសង្គមកិច្ច គ្មាន និងផ្នែកគ្រប់គ្រងដីធ្លី ធនធានធម្មជាតិ បរិស្ថាន បម្រែបម្រួលអាកាសធាតុ សរុបចំនួន១៤ (ស្ទួន៣)៕