ប្រធានក្រុមការងារជំរុញការវិនិយោគក្នុងភូមិភាគឦសាន ជួបពិភាក្សាអំពីវឌ្ឍនភាព និងបញ្ហាប្រឈមនៃការអនុវត្តកម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសានកម្ពុជា ជាមួយគណៈប្រតិភូរដ្ឋបាលខេត្តមណ្ឌលគិរី
ភ្នំពេញ៖ កាលពីថ្ងៃទី២០ ខែវិច្ឆិកា ឆ្នាំ២០២៥ នៅទីស្ដីការក្រសួងសេដ្ឋកិច្ច ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និងជាប្រធានក្រុមការងារជំរុញការវិនិយោគក្នុងភូមិភាគឦសាន បានសំណេះសំណាល និងពិភាក្សាអំពីវឌ្ឍនភាព និងបញ្ហាប្រឈមនៃការអនុវត្តកម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាននៃព្រះរាជាណាចក្រកម្ពុជា ឆ្នាំ ២០២៥-២០២៨ ជាមួយគណៈប្រតិភូរដ្ឋបាលខេត្តមណ្ឌលគិរី ដែលដឹកនាំដោយឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី។
ថ្លែងក្នុងកិច្ចប្រជុំដ៏មានសារៈសំខាន់នេះ ឯកឧត្តមបណ្ឌិតសភាចារ្យបានស្វាគមន៍ចំពោះវត្តមានរបស់គណៈប្រតិភូរដ្ឋបាលខេត្តមណ្ឌលគិរី និងបានពិភាក្សាអំពីការអនុវត្តកម្មវិធីពិសេសជំរុញការវិនិយោគក្នុងភូមិភាគឦសាន ដោយបានចែករំលែកបទពិសោធន៍ និងទិដ្ឋភាពសំខាន់ៗ នៃការអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ ២០២៤ ក្នុងរយៈពេលជិត២ឆ្នាំកន្លងមកនេះ ដែលតាមរយៈនេះ ក្រុមការងារជំរុញការវិនិយោគកម្មវិធីពិសេសនេះ ទទួលបានគម្រោងវិនិយោគប្រមាណជាង៤០០គម្រោង ក្រោមទុនវិនិយោគប្រមាណជាង ៨ ០០០ លានដុល្លារអាមេរិក។
ឯកឧត្តមបណ្ឌិតបានគូសរំលេចថា ការអនុវត្តកម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន គឺផ្តោតសំខាន់លើ៖ ១. ការជំរុញប្រើប្រាស់ដីកសិកម្ម និង កសិ-ឧស្សាហកម្ម ឱ្យអស់សក្តានុពល ២. ការជំរុញការកែច្នៃផលិតផល និង៣. សេវាកម្មទេសចរណ៍ ដែលការណ៍នេះ អាជ្ញាធរខេត្តមណ្ឌលគិរី មានតួនាទី ភារកិច្ចយ៉ាងសំខាន់ ក្នុងការចូលរួមអនុវត្តកម្មវិធីពិសេសនេះ។ ក្រោយពីមានព្រឹត្តិការណ៍នៅតាមព្រំដែនជាមួយប្រទេសជិតខាង ធ្វើឱ្យមានផលប៉ះពាល់ដល់ខ្សែច្រវ៉ាក់ផ្គត់ផ្គង់ និង ផលិតកម្ម រំហូរការងារ និងតម្រូវការលើផលិតផលប្រើប្រាស់ ព្រមទាំងរំហូរពាណិជ្ជកម្ម ទាំងការនាំចេញ និងការនាំចូល ជាពិសេស វត្ថុធាតុដើម សម្រាប់បម្រើដល់សកម្មភាពផលិតកម្មក្នុងស្រុក និង និន្នាការប្រើប្រាស់ផលិតផលក្នុងស្រុកជំនួសវិញ។
ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី បានគាំទ្រ និងប្តេជ្ញាចូលរួមសហការជាមួយក្រសួង-ស្ថាប័នពាក់ព័ន្ធ ជាពិសេសក្រុមការងារ ក.វ.ឦសាន ក្នុងការសម្របសម្រួល និង ដោះស្រាយបញ្ហានានា ដើម្បីជំរុញការវិនិយោគក្នុងខេត្តមណ្ឌលគិរី ឱ្យមានលទ្ធផលផ្លែផ្កា ស្របតាមគោលបំណងរបស់រាជរដ្ឋាភិបាល។
ជាមួយគ្នានេះ ឯកឧត្តមអភិបាលខេត្ត បានរាយការណ៍បន្ថែមជូនអង្គប្រជុំអំពីស្ថានភាពប្រើប្រាស់ដីនៅខេត្តមណ្ឌលគិរី ដែលមានសក្តានុពលអភិវឌ្ឍន៍លើវិស័យកសិកម្ម កសិ-ឧស្សាហកម្ម និងទេសចរណ៍ ព្រមទាំងគូសរំលេចអំពីបញ្ហាប្រឈមនានា ដែលរដ្ឋបាលខេត្តបាន និងកំពុងជួបប្រទះ ក្នុងការគ្រប់គ្រង និងថែទាំសកម្មភាពវិនិយោគក្នុងខេត្ត និងផែនការអភិវឌ្ឍន៍សំខាន់ៗ។
ឯកឧត្តមបណ្ឌិតសភាចារ្យបានណែនាំឱ្យក្រុមការងារទំាងពីរបន្តសហការជិតស្និទ្ធ ដើម្បីសិក្សាស៊ីជម្រៅអំពីទីតាំងដីមានសក្តានុពល កាលានុវត្តភាពសម្រាប់ការវិនិយោគ និង ដំណោះស្រាយបញ្ហានានា សម្រាប់ជាមូលដ្ឋានផ្តល់ព័ត៌មាន ប្រឹក្សាយោបល់ និងផ្សព្វផ្សាយទៅកាន់វិនិយោគិននានា៕
