លោក Netanyahu នឹងកោះប្រជុំគណៈរដ្ឋមន្ត្រីជាបន្ទាន់ ដើម្បីនាំជនជាតិអ៉ីស្រាអែល ដែលបានធ្វើសកម្មភាពប្រឆាំងជនជាតិប៉ាឡេស្ទីន នៅតំបន់ West Bank យកមកកាត់ទោស

ហ៊្សេរុយសាឡិម៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៨ ខែវិច្ឆិកា ឆ្នាំ២០២៥ នាយករដ្ឋមន្រ្តី លោក Benjamin
Netanyahu បានឱ្យដឹងថា លោកនឹងកោះប្រជុំគណៈរដ្ឋមន្ត្រីជាបន្ទាន់ ដើម្បីនាំជនជាតិអ៉ីស្រាអែល ដែលបានធ្វើសកម្មភាពប្រឆាំងជនជាតិប៉ាឡេស្ទីន នៅតំបន់ West Bank យកមកកាត់ទោស។

ទីភ្នាក់ងារព័ត៌មាន WAFA បានដកស្រង់សម្តីក្រុមមន្រ្តីដែលនិយាយថា អំពើហិង្សាកាលពីថ្ងៃចន្ទ ជនជាតិអ៉ីស្រាអែលបានដុតផ្ទះ និងរថយន្តក្នុងភូមិ Jab’a ដែលជាភូមិរបស់ប៉ាឡេស្ទីន ក្បែរទីក្រុង Bethlehem តំបន់ West Bank បន្ទាប់ពីការបំផ្លិចបំផ្លាញលើទ្រព្យសម្បត្តិ និងជនស៉ីវិលនៅក្នុងភូមិ Sa’ir នាពេលថ្មីៗ។

លោក Netanyahu គូសបញ្ជាក់ថា «ខ្ញុំចាត់ទុក វាជាអំពើហិង្សាធ្ងន់ធ្ងរ និងជាការប៉ុនប៉ងអង្គុយលើច្បាប់ ពីសំណាក់ក្រុមជ្រុលនិយមតូចមួយ។ ខ្ញុំមានបំណងដោះស្រាយរឿងនេះដោយខ្លួនឯង ហើយកោះប្រជុំជាមួយរដ្ឋមន្ត្រីពាក់ព័ន្ធឱ្យបានឆាប់ តាមដែលអាចធ្វើទៅបាន ដើម្បីដោះស្រាយបាតុភាពនេះ»៕