ការិយាល័យកិច្ចការតៃវ៉ាន់នៃក្រុមប្រឹក្សាកិច្ចការរដ្ឋចិនថ្លែងថា មានតែប្រកាន់ខ្ជាប់នូវ“គំនិតឯកភាពរួមនៃត្រើយទាំងសងខាងច្រកសមុទ្រតៃវ៉ាន់នៅថ្ងៃទី២ខែកញ្ញា” ប្រឆាំងនឹង“កម្លាំងអបគមន៍ដែលចង់ឱ្យតៃវ៉ាន់ឯករាជ្យ” បងប្អូនជនរួមជាតិនៃត្រើយទាំងសងខាងអាចអង្គុយជុំគ្នាធ្វើការសន្ទនាបាន
ថ្ងៃទី១២ខែវិច្ឆិកា ការិយាល័យកិច្ចការតៃវ៉ាន់នៃក្រុមប្រឹក្សាកិច្ចការរដ្ឋចិនបានបើកធ្វើសន្និសីទសារព័ត៌មានជាប្រចាំ។
លោក Chen Binhua អ្នកនាំពាក្យនៃការិយាល័យកិច្ចការតៃវ៉ាន់នៃក្រុមប្រឹក្សាកិច្ចការរដ្ឋចិនបានថ្លែងថា កិច្ចជំនួបជាប្រវត្តិសាស្រ្តរវាងថ្នាក់ដឹកនាំនៃត្រើយទាំងសងខាងច្រកសមុទ្រតៃវ៉ាន់ដែលបានបើកធ្វើកាលពីថ្ងៃទី៧ខែវិច្ឆិកាឆ្នាំ២០១៥ គឺជាវិធានការដ៏សំខាន់របស់មជ្ឈិមបក្សកុម្មុយនីស្តចិនដែលមានលោក Xi Jinping ជាប្រមុខស្នូល ដើម្បីដឹកនាំនិងជំរុញសន្តិភាពនិងការអភិវឌ្ឍនៃទំនាក់ទំនងរវាងត្រើយទាំងសងខាងនៃច្រកសមុទ្រតៃវ៉ាន់ និងជំរុញបុព្វហេតុបង្រួបបង្រួមជាតិចិន ដែលបានត្រួសត្រាយផ្លូវថ្មីនៃការសន្ទនានិងការប្រាស្រ័យទាក់ទងដោយផ្ទាល់រវាងថ្នាក់ដឹកនាំនៃត្រើយទាំងសងខាងនៃច្រកសមុទ្រតៃវ៉ាន់ ។ កិច្ចជំនួបជាប្រវត្តិសាស្រ្តនៃត្រើយទាំងសងខាងនិងដំណើរការអភិវឌ្ឍន៍នៃទំនាក់ទំនងរវាងត្រើយទាំងសងខាងជាបន្ទាប់ បានបញ្ជាក់យ៉ាងពេញលេញថា មានតែប្រកាន់ខ្ជាប់នូវ “គំនិតឯកភាពរួមនៃត្រើយទាំងសងខាងច្រកសមុទ្រតៃវ៉ាន់នៅថ្ងៃទី២ខែកញ្ញា” ប្រឆាំងនឹង“កម្លាំងអបគមន៍ដែលចង់ឱ្យតៃវ៉ាន់ឯករាជ្យ” ទទួលស្គាល់ថាប្រជាជននៅត្រើយទាំងសងខាងសុទ្ធតែជាជនជាតិចិន និងគ្រួសារតែមួយ បងប្អូនជនរួមជាតិនៅត្រើយទាំងសងខាងអាចអង្គុយជុំគ្នាធ្វើការសន្ទនាបាន ។ ការបង្រួបបង្រួមជាតិគឹជានិន្នាការប្រវត្តិសាស្រ្ត និងជាផ្លូវដ៏ត្រឹមត្រូវ ។ ការប៉ុន់ប៉ង់ចង់ឱ្យតៃវ៉ាន់ឯករាជ្យ គឺជាទង្វើដើរបញ្ច្រាសចរន្តប្រវត្តិសាស្ត្រ និងជាផ្លូវទាល់ច្រក។ មានតែជំរុញឱ្យទំនាក់ទំនងនៃត្រើយទាំងសងខាងដើរឆ្ពោះទៅកាន់ទិសដៅបង្រួបបង្រួមជាតិទាំងស្រុង ទើបអាចធានាសន្តិភាពជានិរន្តរភាពនៅត្រើយទាំងសងខាងនៃច្រកសមុទ្រតៃវ៉ាន់៕
