លោក កៅ ប៊ុណ្ណា ត្រូវបានប្រកាសចូលកាន់មុខតំណែង ជាប្រធានមន្ទីរផែនការខេត្តកំពតថ្មី ជំនួសប្រធានមន្ទីរចាស់ ដែលត្រូវចូលនិវត្តន៍
កំពត៖ លោក កៅ ប៊ុណ្ណា អតីតអនុប្រធានមន្ទីរផែនការខេត្តកំពត ត្រូវបានប្រកាសចូលកាន់មុខតំណែង ជាប្រធានមន្ទីរផែនការខេត្តកំពតថ្មី ជំនួសប្រធានមន្ទីរចាស់ ដែលត្រូវចូលនិវត្តន៍។
ពិធីប្រកាសនេះ បានប្រព្រឹត្តធ្វើឡើង នាព្រឹកថ្ងៃទី១២ ខែវិច្ឆិកា ឆ្នាំ២០២៥ នៅសាលប្រជុំសាលាខេត្តកំពត ក្រោមអធិបតីភាព ឯកត្តម ប៊ិន ត្រឈៃ រដ្ឋមន្ត្រីក្រសួងផែនការ និងឯកឧត្ដម ម៉ៅ ធនិន អភិបាលខេត្តកំពត។
ក្នុងឱកាសនោះ ឯកឧត្ដម ម៉ៅ ធនិន បានចូលរួមអបអរសាទរ ជាមួយនឹងលោកប្រធានមន្ទីរផែនការថ្មី ដែលទទួលបានការជឿទុកចិត្ត ពីប្រមុខរាជរដ្ឋាភិបាល។
ឯកឧត្ដមអភិបាលខេត្ត បានបញ្ជាក់ថា សម្រាប់ខេត្តកំពត ការជ្រើសរើសឬតែងតាំងថ្នាក់ដឹកនាំមន្ទីរ អង្គភាព គឺមានការគិតគូរ និងវាយតម្លៃច្បាស់លាស់ណាស់ ទាំងសមត្តភាព លទ្ធភាព សីលធម៌ គុណធម៌ ដើម្បីធានាដល់គុណភាព និងប្រសិទ្ធភាពការងារនៃមន្ទីរ អង្គភាពទាំងនោះ។
នាឱកាសនោះ ឯកឧត្ដមរដ្ឋមន្ត្រីក្រសួងផែនការបាន បានបញ្ជាក់ថា ការវិភាគមុខងារជាកំណែទម្រង់ថ្មីមួយធំណាស់ សម្រាប់រាជរដ្ឋាភិបាលអាណត្តិទី៧។ បច្ចុប្បន្ន រដ្ឋបាលថ្នាក់ជាតិ ក្រសួង ស្ថានប័ន បាននិងកំពុងរៀបចំ ការវិភាគមុខងារនេះ ផ្លោតលើចំណុចគន្លឺះចំនួន៣ ហើយក្រោយពេលការវិភាគមុខងារចប់រួចរាល់ រាជរដ្ឋាភិបាល នឹងដាក់ឱ្យអនុវត្តនៅរដ្ឋបាលថ្នាក់ក្រោមជាតិ ដើម្បីជួយធ្វើឲ្យការងារមន្ទីរអង្គភាពកាន់តែមានប្រសិទ្ធភាព។
ឯកឧត្ដមរដ្ឋមន្ត្រីក្រសួងផែនការ បានលើកឡើងទៀតថា រាជរដ្ឋាភិបាលអាណត្តិទី៧នៃរដ្ឋសភា បាននឹងកំពុងរៀបចំការវិភាគមុខងារ ដើម្បីបង្កើនប្រសិទ្ធភាពការងាររដ្ឋបាលថ្នាក់ជាតិ ក្រសួង ស្ថាប័ន និងអាជ្ញាធរផ្សេងៗមិនឱ្យស្ទួនគ្នា ឬមានការច្របូកច្របល់ក្នុងការអនុវត្ត។ ការរៀបចំរចនាសម្ព័ន្ធរដ្ឋ ឱ្យមានភាពសមរម្យតាមតម្រូវការនៃការអភិវឌ្ឍប្រទេស ថាតើមុខងារណាគួររក្សា គូរត្រូវប្តូរ ឬត្រូវបញ្ចូលជាមួយគ្នា។ លោករដ្ឋមន្ត្រីបានបញ្ជាក់ថា ការវិភាគមុខងារជាជំហានមួយសំខាន់ណាស់ សម្រាប់រៀបចំផែនការការងារយុទ្ធសាស្ត្រថ្មី របស់រាជរដ្ឋាភិបាលក្នុងអាណត្តិទី៧នេះ ឱ្យមានភាពត្រឹមត្រូវ និងកាន់តែប្រសើរឡើង។
ក្នុងឱកាសនោះដែរ ឯកឧត្ដមរដ្ឋមន្ត្រីក៏បានណែនាំដល់ប្រធានមន្ទីរថ្មី សូមបន្តអនុវត្ត និងគោរពតាមគោលការណ៍ណែនាំរបស់ថ្នាក់ដឹកនាំគ្រប់ជាន់ថ្នាក់ យកចិត្តទុកដាក់ខ្ពស់ ក្នុងការពង្រឹងសាមគ្គីភាព និងឯកភាពផ្ទៃក្នុងរបស់មន្ទីរ ព្រមទាំងខិតខំបំពេញការងារតាមតួនាទីភារកិច្ចស្នូល ដោយសហការយ៉ាងជិតស្និទ្ធជាមួយមន្ត្រីជំនាញ ក្នុងការសិក្សាស្វែងយល់អំពីការអភិវឌ្ឍនៃប្រព័ន្ធបច្ចេកវិទ្យាថ្មី ដើម្បីលើកគុណភាពការងាររបស់មន្ទីរ ឱ្យកាន់តែល្អប្រសើរ៕
