ឯកឧត្ដម រិន វីរៈ អញ្ជើញបើកសិក្ខាសាលា ស្តីពីការចងក្រងទិន្នន័យស្ថិតិទំនិញពាណិជ្ជកម្មអន្តរជាតិនៃកម្ពុជាឆ្នាំ២០២៥
ភ្នំពេញ÷ នៅព្រឹកថ្ងៃទី១១ ខែវិច្ឆិកា ឆ្នាំ២០២៥ ឯកឧត្ដម រិន វីរៈ ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលនៃវិទ្យាស្ថានជាតិស្ថិតិ បានអញ្ជើញជាអធិបតីក្នុងពិធីបើកសិក្ខាសាលា ស្តីពីការចងក្រងទិន្នន័យស្ថិតិទំនិញពាណិជ្ជកម្មអន្តរជាតិនៃកម្ពុជាឆ្នាំ២០២៥ ដែលបានសហការរៀបចំឡើងដោយវិទ្យាស្ថានជាតិស្ថិតិនៃក្រសួងផែនការ ជាមួយដៃគូអភិវឌ្ឍនៃអង្គភាព Data Trade Monitor (TDM) នៃសហរដ្ឋអាម៉េរិក។
ឯកឧត្តមមានប្រសាសន៍ថា ផ្អែកលើព្រឹត្តបត្រស្ថិតិទំនិញពាណិជ្ជកម្មអន្តរជាតិនៃកម្ពុជា ឆ្នាំ២០២៥ ដែលបានរៀបចំប្រមូលចងក្រង វិភាគដោយវិទ្យាស្ថានជាតិស្ថិតិនៃក្រសួងផែនការ សហការជាមួយអង្គភាព TDM ដោយមានការគាំទ្រផ្តល់ទិន្នន័យពីអគ្គនាយកដ្ឋានគយ និងរដ្ឋាករនៃកម្ពុជា និងក្រសួង ស្ថាប័នពាក់ព័ន្ធមួយចំនួន បានបង្ហាញអំពីស្ថិតិទំនិញពាណិជ្ជកម្មអន្តរជាតិ (IMTS) ដែលមានសូចនាករសំខាន់ៗសម្រាប់ការអភិវឌ្ឍសេដ្ឋកិច្ច សង្គម ដែលបរិយាយអំពី៖
១.ស្ថិតិទំនិញពាណិជ្ជកម្មអន្តរជាតិនៃកម្ពុជា
២.អត្ថប្រយោជន៍សម្រាប់វិស័យឧស្សាហកម្ម និងពាណិជ្ជកម្ម
៣.សារៈសំខាន់នៃគុណភាពទិន្នន័យ
៤.ស្ថិតិទំនិញពាណិជ្ជកម្មអន្តរជាតិនៃកម្ពុជាមានតួនាទីក្នុងការគាំទ្រដល់ការរៀបចំគោលនយោបាយ និងការចរចាពាណិជ្ជកម្ម។
៥.ការផ្សព្វផ្សាយទិន្នន័យ និងការផ្លាស់ប្ដូរថ្មីៗអំពីការនាំចូល–នាំចេញតាមប្រភេទមុខទំនិញ និងប្រទេសដៃគូអន្តរជាតិនានា។
៦.និន្នាការថ្មីនិងឱកាសអនាគត៖ ទិន្នន័យស្ថិតិនេះបង្ហាញអំពីស្ថានភាពកំពុងមាននិន្នាការពាណិជ្ជកម្ម ថ្មីៗលេចឡើង ជាពិសេសក្នុងវិស័យ ចំណីអាហារ។
៧.សូចនាករពាណិជ្ជកម្មអន្តរជាតិ (IMTS Indicators) ដែលជាមូលដ្ឋានសំខាន់សម្រាប់ការវាស់វែងសកម្មភាពសេដ្ឋកិច្ច និងការតភ្ជាប់អន្តរជាតិ ជាពិសេសសូចនាករគាំទ្រដល់ការតាមដានត្រួតពិនិត្យ និងវាយតម្លៃគោលដៅអភិវឌ្ឍន៍ប្រកបដោយចីរភាព (SDGs) ហើយជាឧបករណ៍ដ៏សំខាន់ក្នុងការតាមដានត្រួតពិនិត្យ និងវាយតម្លៃលើការអនុវត្តយុទ្ធសាស្រ្តបញ្ចកោណ ដំណាក់កាលទី១ ដើម្បីបង្កើនភាពប្រកួតប្រជែង សមត្ថភាពផលិត និងភាពធន់របស់សេដ្ឋកិច្ចកម្ពុជា។
យោងតាមកម្មវិធីអង្គសិក្ខាសាលានៅថ្ងៃនេះ ឯកឧត្តមមានជំនឿយ៉ាងមុតមាំថា អង្គសិក្ខាសាលាទាំងអស់ នឹងចូលរួមផ្តល់មតិជាធាតុចូលឱ្យគ្រប់ជ្រុងជ្រោយបន្ថែមទៀតដើម្បីការអភិវឌ្ឍកែលម្អទិន្នន័យស្ថិតិទំនិញពាណិជ្ជកម្មអន្តរជាតិនៃកម្ពុជាឱ្យកាន់ល្អប្រសើរថែមទៀត។
