រដ្ឋាភិបាលតាលីបង់នៅអាហ្វហ្កានីស្ថាន បាននិយាយថា ជុំចុងក្រោយនៃកិច្ចពិភាក្សាស្វែងរកសន្តិភាព ជាមួយប៉ាគីស្ថាន ដែលប្រព្រឹត្តទៅនៅប្រទេសតួកគីយ៉េ គឺបានទទួលបរាជ័យ
កាប៊ុល៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសៅរ៍ ទី៨ ខែវិច្ឆិកា ឆ្នាំ២០២៥ នាថ្ងៃសៅរ៍នេះ រដ្ឋាភិបាលតាលីបង់នៅអាហ្វហ្កានីស្ថាន បាននិយាយថា ជុំចុងក្រោយនៃកិច្ចពិភាក្សាស្វែងរកសន្តិភាព ជាមួយប៉ាគីស្ថាន ដែលប្រព្រឹត្តទៅនៅប្រទេសតួកគីយ៉េ គឺបានទទួលបរាជ័យ ហើយបានទម្លាក់កំហុសលើទីក្រុងអ៉ីស្លាម៉ាបាដថា ខ្វះភាពទទួលខុសត្រូវ និងគ្មានស្មារតីចង់សហការ។
អ្នកនាំពាក្យរដ្ឋាភិបាលតាលីបង់ បាននិយាយថា «អំឡុងកិច្ចពិភាក្សា ភាគីប៉ាគីស្ថាន បានព្យាយាមបង្វែរការទទួលខុសត្រូវទាំងអស់ សម្រាប់សន្តិសុខរបស់ខ្លួន មកលើរដ្ឋាភិបាលអាហ្វហ្កានីស្ថាន ហើយក្នុងពេលទន្ទឹមគ្នា មិនបានបង្ហាញឆន្ទៈរ៉ាប់រងការទទួលខុសត្រូវ សម្រាប់សន្តិសុខរបស់អាហ្វហ្កានីស្ថាន ឬសន្តិសុខរបស់ខ្លួនឯងឡើយ។ ឥរិយាបថដែលគ្មានការទទួលខុសត្រូវ និងគ្មានស្មារតីសហការគ្នាបែបនេះ របស់ប្រតិភូប៉ាគីស្ថាន បាននាំឱ្យកិច្ចពិភាក្សាបន្តមិនទទួលបានលទ្ធផលអ្វី»។
គួរបញ្ជាក់ថា ប្រទេសទាំងពីរ បានជួបគ្នាសាជាថ្មីនៅទីក្រុងអ៉ីស្តង់ប៊ុល កាលពីថ្ងៃព្រហស្បតិ៍សប្តាហ៍នេះ ដើម្បីព្យាយាមស្វែងរកសន្តិភាពរឹងមាំមួយ ក្រោយបទឈប់បាញ់ ដែលសម្រេចបានកាលពីថ្ងៃទី១៩ ខែតុលា នៅកាតា បន្ទាប់ពីការប៉ះទង្គិចគ្នាយ៉ាងខ្លាំងក្លាស្លាប់មនុស្សរាប់សិបនាក់ រវាងប្រទេសជិតខាងទាំងពីរ គិតចាប់តាំងពីក្រុមតាលីបង់ បានត្រឡប់មកកាន់អំណាចនៅអាហ្វហ្កានីស្ថាន កាលពីឆ្នាំ២០២១៕
