ពិធីបើកបវេសនកាលថ្មី ឆ្នាំសិក្សា ២០២៥-២០២៦ សម្រាប់សិស្សានុសិស្ស នៅវិទ្យាល័យសម្តេចម៉ែ ស្រុកត្បូងឃ្មុំ ខេត្តត្បូងឃ្មុំ

ខេត្តត្បូងឃ្មុំ៖ នៅព្រឹកថ្ងៃសៅរ៍ ៨កើត ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១ ខែតុលា ឆ្នាំ២០២៥ នៅវិទ្យាល័យសម្តេចម៉ែ ស្រុកត្បូងឃ្មុំ ខេត្តត្បូងឃ្មុំ បានរៀបចំពិធីបើកបវេសនកាលថ្មី ឆ្នាំសិក្សា ២០២៥-២០២៦ សម្រាប់សិស្សានុសិស្ស ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តត្បូងឃ្មុំ និងជាប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានស្រុកត្បូងឃ្មុំ។ ជាមួយគ្នានេះ ក៏មានការអញ្ជើញចូលរួមពី ឯកឧត្តម លោកជំទាវក្រុមការងាររាជរដ្ឋាភិបាលចុះជួយមូលដ្ឋានខេត្តត្បូងឃ្មុំ និង ថ្នាក់ដឹកនាំក្រសួងបរិស្ថាន រួមទាំងគណៈអភិបាល និងមន្រ្តីរាជ ក្រុមប្រឹក្សាស្រុក ឃុំ នាយកសាលា លោកគ្រូ អ្នកគ្រូ និងសិស្សានុសិស្សសរុបទាំអស់ប្រមាណជាង ២០០០នាក់។

នាឱកាសពិធីបើកបវេសនកាលថ្មី ឆ្នាំសិក្សា ២០២៥-២០២៦ សម្រាប់សិស្សានុសិស្ស ក្រោមការយកចិត្តទុកដាក់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវ។ ឯកឧត្តមបណ្ឌិត អ៊ាង សុផល្លែត
ជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តត្បូងឃ្មុំ បានថ្លែងសារលិខិតរបស់សម្ដេចមហាបវរធិបតី ដែលខ្លឹមសារសំខាន់ៗនៃសារលិខិតនេះ បានបង្ហាញពីការប្តេជ្ញាចិត្តរបស់រាជរដ្ឋាភិបាលនីតិកាលទី៧ ក្នុងការបន្តយកចិត្តទុកដាក់ខ្ពស់លើវិស័យអប់រំ និងបានលើកឡើងនូវចំណុចគន្លឹះចំនួន ១២ ដើម្បីសម្រេចបាននូវដំណើរការអប់រំដ៏ល្អប្រសើរក្នុងឆ្នាំសិក្សាថ្មី។

ឆ្លៀតក្នុងឱកាសនេះដែរ ឯកឧត្តមប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តត្បូងឃ្មុំ បាននាំយកនូវអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាថវិកា និងសំភារៈសិក្សា ជូនដល់សិស្សានុសិស្សជាសិស្សពូកែប្រចាំឆ្នាំចំនួន ១២៥នាក់ និង សិស្សានុសិស្សក្រីក្រចំនួន ៥០០នាក់នូវអំណោយជាសម្ភារៈសិក្សា ព្រមទាំងសម្ភារៈកីឡា ដែលរួមមាន តារាងបាល់ទាត់ តារាងវៃប៉េងប៉ុង… ដោយមានការចូលរួមឧបត្ថម្ភគាំទ្រពីក្រុមហ៊ុន One road ជូនដល់លោកនាយកសាលាវិទ្យាល័យសម្តេចម៉ែ ស្រុកត្បូងឃ្មុំ ខេត្តត្បូងឃ្មុំ ដោយកីឡានាំមកនូវសុខភាពល្អ កាយសម្បទាមាំមួន ឈ្លាសវៃក្នុងការសិក្សា ដើម្បីចៀសផុតពីការសេពគ្រឿងញៀន និងល្បែងស៉ីសងផ្សេងៗ៕