ក្រុមការងារជំរុញការវិនិយោគក្នុងខេត្តព្រះសីហនុ បើកកិច្ចប្រជុំពិភាក្សាលើការស្នើសុំនាំចូលគ្រឿងអេឡិចត្រូនិក និង បរិក្ខារអគ្គិសនីដែលប្រើប្រាស់រួច ដើម្បីបំពេញបន្ថែមដល់គម្រោងរោងចក្រកែច្នៃឡើងវិញ

ភ្នំពេញ៖ នៅរសៀលថ្ងៃទី២៨ ខែសីហា ឆ្នាំ២០២៥ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានដឹកនាំកិច្ចប្រជុំពិនិត្យលើការស្នើបង្កើតរោងចក្រកែច្នៃឡើងវិញ នូវបរិក្ខារអេឡិចត្រូនិក និង អគ្គិសនី ដែលប្រើប្រាស់រួច ដែលមានទីតាំងស្ថិតនៅក្នុងតំបន់សេដ្ឋកិច្ចពិសេស ខេមបូឌានស៊ីណូ មេធលលីក មេធៀរៀល នៅភូមិឬទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ។កិច្ចប្រជុំនេះ មានការអញ្ជើញចូលរួមពី ឯកឧត្តមអនុរដ្ឋលេខាធិការ អគ្គនាយក អគ្គនាយករង តំណាងក្រសួងស្ថាប័នពាក់ព័ន្ធ និង រដ្ឋបាលខេត្តព្រះសីហនុ ព្រមទាំងមន្ត្រីជំនាញពាក់ព័ន្ធ។

គម្រោងរោងចក្រកែច្នៃឡើងវិញនេះ មានផែនការប្រមូលវត្ថុធាតុដើមជាសម្ភារៈអេឡិចត្រូនិក និង បរិក្ខារអគ្គិសនី ដែលប្រើប្រាស់រួច ដើម្បីធ្វើការកែច្នៃឡើងវិញ ដោយប្រើប្រាស់បច្ចេកវិទ្យាទំនើបក្នុងការបំបែកញែក និង ធ្វើប្រព្រឹត្តកម្ម ដើម្បីអាចទាញយកលោហៈ និង វត្ថុនានា ដូចជា មាស ប្រាក់ ទង់ដែង ស្ពាន់ សំណប៉ាហាំង ជាដើម សម្រាប់បម្រើដល់វិស័យឧស្សាហកម្ម ។

គម្រោងនេះនឹងផ្ដល់អត្ថប្រយោជន៍ខ្ពស់ ដល់បរិស្ថាន តាមរយៈការកាត់បន្ថយផលប៉ះពាល់នានា ដោយសារការកែច្នៃ ដែលគ្មានបទដ្ឋានបច្ចេកទេសត្រឹមត្រូវ និង ដែលទុកចោល ដោយគ្មានការគ្រប់គ្រង និង គ្មានការរក្សាទុកត្រឹមត្រូវ ព្រមទាំងអាចបង្កើតការងារ ប្រាក់ចំណូល ការផ្ទេរបច្ចេកវិទ្យា ចំណេះដឹង និង ការបង្កើតលោហៈមានតម្លៃថ្មីបន្ថែម ជំនួសឱ្យការជីកយកលោហៈធាតុពីធនធានធម្មជាតិ។

អង្គប្រជុំបានគាំទ្រគម្រោងនេះ និង យល់ស្របគ្នាថា ការអនុវត្តគម្រោងនេះ ត្រូវគោរព និង អនុវត្តតាមច្បាប់ និង បទប្បញ្ញត្តិជាធរមាន,ជាពិសេស ត្រូវគ្រប់គ្រងបរិស្ថានឱ្យបានល្អជាទីបំផុត។

ជាមួយនេះ, អង្គប្រជុំបានពិនិត្យលើទិដ្ឋភាពច្បាប់ និង បច្ចេកទេស សំដៅធានាថា គម្រោងនេះអាចអនុវត្តបាន ដោយមានការគ្រប់គ្រងបរិស្ថានច្បាស់លាស់ និង ខ្សែច្រវាក់ផលិតកម្មឱ្យបានម៉ត់ចត់, ជាពិសេស ការគ្រប់គ្រងការប្រមូលបរិក្ខារ ការបំបែក ការញែក និង ការធ្វើប្រព្រឹត្តកម្ម ក្នុងនោះត្រូវមានការសិក្សាពីផលប៉ះពាល់បរិស្ថានជាមុន ដោយមានការឯកភាពពីក្រសួងបរិស្ថាន និង ការអនុញ្ញាតពីរាជរដ្ឋាភិបាល៕