វៀតណាម កំពុងពិចារណាលើផែនការតម្លៃរាប់លានដុល្លារ ដើម្បីសាងសង់អាងស្តុកទឹកក្រោមដីដ៏ធំមួយ ក្នុងគោលបំណងកាត់បន្ថយទឹកជំនន់

ហាណូយ៖ ទីក្រុងហូជីមិញនៃប្រទេសវៀតណាម បាននិងកំពុងពិចារណាលើផែនការតម្លៃរាប់លានដុល្លារ ដើម្បីសាងសង់អាងស្តុកទឹកក្រោមដីដ៏ធំមួយ នៅក្រោមទីលានកីឡាលីញ តាយ (Linh Tay) នៅតំបន់ធូ ដុក Thu Duc ក្នុងគោលបំណងកាត់បន្ថយទឹកជំនន់ធ្ងន់ធ្ងរ ដែលបានញាំញីតំបន់នោះ។

អាងស្តុកទឹកនេះ នឹងផ្ទុកទឹកភ្លៀងចំនួន១៣ ០០០ម៉ែត្រគូប ស្មើនឹងរថយន្តដឹកប្រេងចំនួន៦៥០គ្រឿង ដើម្បីជួយការពារផ្លូវនានាពីការលិចទឹកបន្ទាប់ពីមានភ្លៀងធ្លាក់ខ្លាំង។ យោងតាមមជ្ឈមណ្ឌលអភិវឌ្ឍន៍ហេដ្ឋារចនាសម្ព័ន្ធតំបន់ធូ ដុក សណ្ឋានដីរបស់តំបន់នេះមានរាងដូចអាង បណ្ដាលឱ្យទឹកភ្លៀងពីតំបន់ខ្ពង់រាបហូរចាក់ចូល។ គួបផ្សំនឹងភាពចាស់រិចរិល ប្រព័ន្ធបង្ហូរទឹកដែលខូចខាត បានធ្វើឱ្យតំបន់នេះត្រូវបានជន់លិចជារឿយៗ។

អាងស្តុកទឹកមានទំហំ៧០គុណនឹង៥០ម៉ែត្រ និងមានជម្រៅ៥,២ម៉ែត្រ ដោយប្រើប្រាស់បន្ទះប្លាស្ទិក Cross-wave សម្រាប់ការសាងសង់។ គម្រោងនេះ នឹងត្រូវចំណាយថវិកាចំនួន១៧៨ពាន់លានដុង (ឬប្រហែល៧លានដុល្លារអាម៉េរិក) នឹងរួមបញ្ចូលមុខងារបន្ថែមដូចជា អាងទឹក បន្ទប់បូមទឹក និងប្រព័ន្ធបង្ហូរទឹក។ នៅពេលការសាងសង់ត្រូវបានបញ្ចប់ ទីតាំងអាងស្តុកទឹកខាងលើ នឹងត្រូវបានកែប្រែសម្រាប់ជាទីតាំងកម្សាន្ត។ ក្រៅពីការបន្ធូរបន្ថយទឹកជំនន់ វាក៏អាចស្តុកទឹកសម្រាប់ពន្លត់អគ្គិភ័យ និងប្រព័ន្ធធារាសាស្ដ្រផងដែរ។

យ៉ាងណាក្ដី លោក វូ គឹមគឿង (Vo Kim Cuong) អតីតនាយករងស្ថាបត្យករនៃទីក្រុងព្រៃនគរ បានព្រមានថា អាងស្តុកទឹកក្រោមដីមានតម្លៃថ្លៃ ទាមទារឱ្យមានប្រព័ន្ធរចនាសម្ព័ន្ធរឹងមាំ ដើម្បីឱ្យផ្នែកខាងលើអាចយកទៅប្រើប្រាស់បាន និងមានតម្លៃថ្លៃជាងការជីកបឹង ឬស្រះធម្មជាតិ។ ទីក្រុងព្រៃនគរ ធ្លាប់បានកំណត់គោលដៅសាងសង់អាងស្តុកទឹកចំនួន៧ ដែលជាផ្នែកមួយនៃផែនការគ្រប់គ្រងទឹកជំនន់របស់ខ្លួន រួមទាំងគម្រោងក្រោមដីចំនួន៦ និងអាងស្តុកទឹកហ្គូ ឌួ (Go Dua) មានទំហំ២០ហិកតានៅតំបន់ធូដុក ជាមួយនឹងថវិកាសរុបជាង១ពាន់ពាន់លានដុង។ ប៉ុន្តែរហូតមកដល់ពេលនេះ គម្រោង ទាំងនោះបានជាប់គាំងដោយសារស្ដង់ដារ បច្ចេកទេស និងកង្វះថវិកា៕