អភិបាលខេត្តឧត្តរមានជ័យ ជំរុញឱ្យអាជ្ញាធររៀបចំផ្ដល់ឯកសារបញ្ជាក់អត្តសញ្ញាណ និងផ្ដល់ឱកាសការងារ និងជំរុញការចិញ្ចឹម ការដាំដុះដល់ប្រជាពលរដ្ឋក្នុងមូលដ្ឋាន

ឧត្តរមានជ័យ៖ នៅព្រឹកថ្ងៃទី១៨ ខែកញ្ញា ឆ្នាំ២០២៥នេះ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានអញ្ជើញជាអធិបតីភាពក្នុងពិធីផ្សព្វផ្សាយសេចក្ដីណែនាំស្ដីពីការផ្ដល់ឯកសារបញ្ជាក់អត្តសញ្ញាណ និងការផ្ដល់ឱកាសការងារ និងជំរុញការចិញ្ចឹម ការដាំដុះដល់ប្រជាពលរដ្ឋក្នុងមូលដ្ឋានស្រុកបន្ទាយអំពិល ខេត្តឧត្តរមានជ័យ។

ពិធីនេះដែរការចូលរួមពីឯកឧត្តម លោកជំទាវអភិបាលរងខេត្ត លោក លោកស្រីប្រធានមន្ទីរ លោកអភិបាលស្រុក លោកលោកស្រីសមាជិកក្រុមប្រឹក្សាស្រុក លោកមេភូមិមេឃុំ និងបងប្អូនប្រជាពលរដ្ឋរស់នៅក្នុងមូលដ្ឋានស្រុកបន្ទាយអំពិលផងដែរ។

មានប្រសាសន៍នាឱកាសនោះឯកឧត្តម មាន ចាន់យ៉ាដា បានពាំនាំការសួរសុខទុកពីសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជូនដល់បងប្អូនប្រជាពលរដ្ឋនៅក្នុងពិធី។

នាឱកាសនោះឯកឧត្តមអភិបាលខេត្តបានណែនាំដល់អាជ្ញាធរមូលដ្ឋានត្រូវយកចិត្តទុកដាក់ចំពោះពលរដ្ឋណាដែល គ្មានសំបុត្រកំណើត ,គ្មានអត្តសញ្ញបណ្ណ ,គ្មានសៀវភៅស្នាក់នៅ និងសៀវភៅគ្រួសារ ត្រូវរៀបចំធ្វើជូនពួកគាត់ដោយឥតគិតថ្លៃ ហើយត្រូវផ្សព្វផ្សាយការងារជូនបងប្អូនមកពីស្រុកថៃ។ បន្ថែមពីនេះ អាជ្ញាធរមូលដ្ឋានត្រូវយកចិត្តទុកដាក់ជាមួយបងប្អូនប្រជាពលរដ្ឋហាមដាច់ខាតការរើសអើង និងពន្យល់បងប្អូនប្រជាពលរដ្ឋឱ្យទទួលយកការងារក្នុងខេត្តជាជម្រើសទី១ មុននិងទៅរកការងារក្នុងខេត្តផ្សេង។

ឯកឧត្តម មាន ចាន់យ៉ាដា បានបញ្ជាក់ទៀតថានឹងបង្កើតកម្មវិធីនេះឱ្យបានគ្រប់ក្រុង-ស្រុកទាំងអស់ក្នុងភូមិសាស្ត្រខេត្តឧត្ដរមានជ័យ ហើយឯកឧត្ដមពិតជាសប្បាយចិត្តពេលដែលបងប្អូនត្រឡប់មកពីប្រទេសថៃវិញហើយទទួលយកការងារក្នុងស្រុកដោយស្នាមញញឹម។

តាមការលើកឡើងរបស់លោកអភិបាលស្រុកបន្ទាយអំពិលបានលើកឡើងថា ការខ្វះខាតឯកសារសម្រាប់បងប្អូនយកទៅធ្វើការងាររបស់បងប្អូនទើបតែមកពីស្រុកថៃចំនួន៥០៨០នាក់ ក្នុងស្រុកបន្ទាយអំពិល ហើយស្រុកជម្រុញផ្នែកកសិកម្មក្នុងភូមិឃុំផ្ទាល់ពិសេសក្នុងស្រុកផ្ទាល់គឺប្រាក់សន្សំសម្រាប់បងប្អូនយកមកប្រើទៅលើកសិកម្មរបស់បងប្អូនប្រជាជន។

យោងតាមប្រធានមន្ទ្រីការងារខេត្តឧត្ដរមានជ័យ បានឱ្យដឹងថា ឱកាសការងារកសិឧហ្សាកម្មក្នុងខេត្តនឹងទទួលផលប្រយោជន៍ការងារដូចជាបណ្ណ(បសស)បងប្អូនបំពេញការងារដល់អាយុ៦០បងប្អូនទទួលបានប្រាក់ចូលនិវត្តន៍ចំពោះបងប្អូនមិនទាន់មានជំនាញសូមបងប្អូនចូលមករៀនជំនាញនៅមជ្ឍមណ្ឌលរបស់មន្ទីការងារក្នុងខេត្ត បើសិនបងប្អូនមានបណ្ណក្រីក្រ បងប្អូនទទួលបានប្រាក់ឧបត្ថម្ភជូន២៨ម៉ឺនរៀលក្នុង១ខែ។

បើតាមការឱ្យដឹងពីលោកប្រធានមន្ទីកសិកម្មខេត្តបានបញ្ជាក់ថា ស្ថានភាពដីជាង៣មុឺនហិតា ក្នុងស្រុកបន្ទាយអំពិលកសិកម្មទំនើបដាំដុះ ចឹញ្ចឹមសត្វ ជម្រុញការបណ្ដុះកូនឈើសម្រាប់លក់ចេញ. ការងារចឹញ្ចឹមគោ. ហើយរាជរដ្ឋាភិបាល ពិសេសក្រសួងកសិកម្មមានដៃគួរធនាគារអភិវឌ្ឍន៍ជនបទ និងកសិកម្ម (ARDB) គាំទ្រការប្រាក់មួយឆ្នាំ ០.៥៨% ក្នុងខេត្តឧត្ដរមានជ័យ ១លាន៨សែនដុល្លា។

នៅចុងបញ្ចប់ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ ក៏បានណែនាំដល់ក្រុមការងារទទួលឃុំចុះផ្សព្វផ្សាយតាមឃុំតាមភូមិផ្ទាល់ជូនបងប្អូនប្រជាជន និងអាជ្ញាធរស្រុកត្រូវចុះជួបបងប្អូនដល់ខ្នងផ្ទះ ហើយអាជ្ញាធរត្រូវបម្រើការងារជូនបងប្អូនប្រជាជនគឺគ្មានថ្ងៃអាទិត្យនិងបម្រើជូនបងប្អូនប្រជាជន២៤ម៉ោងលើ២៤ម៉ោង។

បន្ថែមពីនេះ ឯកឧត្តមអភិបាលខេត្ត បានជូនពរដល់បងប្អូនប្រជាពលរដ្ឋក្នុងស្រុក និងនៅទូទាំងខេត្តឧត្ដរមានជ័យទាំងមូល ជួបតែសេចក្ដីសុខ សេចក្ដីចំរើនជួបជុំបងប្អូន ធ្វើដំណើរជិតឆ្ងាយសូមសុខសុវត្ថិភាពក្នុងពិធីបុណ្យភ្ពុំបិណ្ឌប្រពៃណៃជាតិខ្មែរ៕