មន្រ្តីកូរ៉េខាងត្បូង៖ លោក ដូណាល់ ត្រាំ បានអនុញ្ញាតឱ្យពលករកូរ៉េខាងត្បូង ដែលត្រូវចាប់ខ្លួនអំឡុងការវាយឆ្មក់អន្តោប្រវេសន៍ បន្តស្នាក់នៅសហរដ្ឋអាមេរិក

សេអ៊ូល៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១១ ខែកញ្ញា ឆ្នាំ ២០២៥ មន្រ្តីកូរ៉េខាងត្បូងនិយាយថា ប្រធានាធិបតីអាមេរិក លោក ដូណាល់ ត្រាំ បានអនុញ្ញាតឱ្យពលករកូរ៉េខាងត្បូង ដែលត្រូវចាប់ខ្លួនអំឡុងការវាយឆ្មក់អន្តោប្រវេសន៍ បន្តស្នាក់នៅសហរដ្ឋអាមេរិក ដើម្បីបង្រៀនពលករអាមេរិក ប៉ុន្តែមានតែពលករកូរ៉េខាងត្បូងម្នាក់ប៉ុណ្ណោះ ដែលសុខចិត្តនៅបន្ត។

ការសម្រេចរបស់ លោក ត្រាំ នាំឱ្យមានការពន្យារពេលមួយថ្ងៃ សម្រាប់យន្តហោះកូរ៉េខាងត្បូង ដែលចាំដឹកនាំពលកររបស់ខ្លួន ត្រឡប់មកវិញ។ ឥឡូវគ្រោងចាកចេញពីសហរដ្ឋអាមេរិក នៅយប់ថ្ងៃព្រហស្បតិ៍នេះ។ ប្រធានាធិបតីកូរ៉េខាងត្បូង លោក Lee Jae Myung បាននិយាយថា នីតិវិធីនៃការចាកចេញត្រូវផ្អាកសិន ដើម្បីឆ្លើយតបទៅនឹងការសម្រេចចិត្តរបស់ លោក ត្រាំ។

លោក ត្រាំ បានប្រាប់មន្រ្តីអាមេរិក ឱ្យលើកទឹកចិត្តពលករដែលត្រូវបានចាប់ខ្លួន ឱ្យពួកគេបន្តការស្នាក់នៅ ដោយមន្រ្តីកូរ៉េខាងត្បូងម្នាក់និយាយថា គឺដើម្បីបន្តការបណ្តុះបណ្តាល ឬអប់រំជនជាតិអាមេរិក។

គួរបញ្ជាក់ថា ជនជាតិកូរ៉េខាងត្បូងប្រហែល ៣០០នាក់ ត្រូវបានចាប់ខ្លួន កាលពីសប្តាហ៍មុននៅឯរោងចក្រ Hyundai- LG ដែលជារោងចក្រផលិតអាគុយ សម្រាប់រថយន្តអគ្គិសនីនៅហ្សកហ្ស៉ី៕