រដ្ឋសភា ប្រជុំពិភាក្សាអំពីដំណើការនៃការរៀបចំគម្រោងថវិការដ្ឋសភាសម្រាប់ការគ្រប់គ្រងឆ្នាំ២០២៦ ជាមួយក្រសួងសេដ្ឋកិច្ច និងហិរញ្ញវត្ថុ

ភ្នំពេញ៖ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នាព្រឹកថ្ងៃទី២៩ ខែសីហា ឆ្នាំ២០២៥ នៅវិមានរដ្ឋសភា បានអញ្ជើញដឹកនាំកិច្ចប្រជុំជាមួយឯកឧត្តម បណ្ឌិតសភាចារ្យ ជូ វិជិត្ត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ អំពីដំណើការនៃការរៀបចំគម្រោងថវិការដ្ឋសភាសម្រាប់ការគ្រប់គ្រងឆ្នាំ២០២៦ ។

ឯកឧត្តម ឈាង វុន បានមានប្រសាសន៍ថា កិច្ចប្រជុំនាថ្ងៃនេះ គឺដើម្បីត្រួតពិនិត្យឡើងវិញអំពីដំណើរការនៃការរៀបចំគម្រោងថវិការដ្ឋសភាសម្រាប់ការគ្រប់គ្រងឆ្នាំ២០២៦។

ឯកឧត្តម បានស្នើឱ្យក្រសួងសេដ្ឋកិច្ចនិងហិរញ្ញវត្ថុ ពិនិត្យឱ្យបានល្អិតល្អន់នូវគម្រោងថវិការដ្ឋសភាសម្រាប់ការគ្រប់គ្រងឆ្នាំ២០២៦ ធ្វើយ៉ាងណាឱ្យមានការសន្សំសំចៃខ្ពស់ រួមចំណែកកាត់បន្ថយការចំណាយឱ្យបានច្រើន ជួយដល់រាជរដ្ឋាភិបាល កម្ពុជាដែលកំពុងប្រឈមនឹងការឈ្លានពានពីប្រទេសថៃ ហើយរាជរដ្ឋាភិបាលត្រូវការថវិកាជួយដល់សមរភូមិមុខ និងជនភៀសសឹកមួយចំនួនពីសង្រ្គាមផងដែរ។

ឯកឧត្តម បណ្ឌិតសភាចារ្យ ជូ វិជិត្ត បានមានប្រសាសន៍ថា សេចក្តីព្រាងច្បាប់ហិរញ្ញវត្ថុសម្រាប់ការគ្រប់គ្រង២០២៦ត្រូវបានរៀបចំឡើងក្នុងបរិការណ៍ដែលរាជរដ្ឋាភិបាលនីតិកាលទី៧ នៃរដ្ឋសភា កំពុងជំរុញអនុវត្តយ៉ាងសស្រាក់សស្រាំនូវបេសកកម្មដ៏ឧត្តុង្គឧត្តមជាប្រវត្តិសាស្រ្តរបស់ខ្លួន ជាមួយនឹងការប្តេជ្ញាចិត្តយ៉ាងមុតមាំឥតរាថយ ហើយកាន់តែស្វាហាប់ឆ្លើយតបនឹងក្តីបំណងប្រាថ្នារបស់ប្រជាជន ក៏ដូចជាសំដៅពន្លឿនកិច្ចអភិវឌ្ឍសង្គម សេដ្ឋកិច្ច និងកិច្ចការកំណែទម្រង់កាន់តែស៊ីជម្រៅ និងទូលំទូលាយលើគ្រប់វិស័យដើម្បីបន្តឈានទៅដំណាក់កាលអភិវឌ្ឍន៍ថ្មីមួយទៀត គឺប្រទេសមានចំណូលមធ្យមកម្រិតខ្ពស់។

ឯកឧត្តម បានមានប្រសាសន៍បន្តថា យោងតាមការព្យាករណ៍សេដ្ឋកិច្ចកិច្ចកម្ពុជា មានកំណើន៦℅ តែថ្មីៗនេះដែលមានជម្លោះព្រំដែនជាមួយប្រទេសថៃ សេដ្ឋកិច្ចកម្ពុជាមានកំណើនថមថយមកនៅត្រឹម៥℅តែប៉ុណ្ណោះ។ តែទោះបីជាយ៉ាងណាក្រសួងសេដ្ឋកិច្ច និងហិរញ្ញវត្ថុ បានផ្តល់ថវិកាយ៉ាងសមរម្យដល់ស្ថាប័នរដ្ឋសភាសម្រាប់ដំណើរការងាររបស់ខ្លួន។

ឯកឧត្តម ឈាង វុន បានថ្លែងអំណរគុណជូនចំពោះឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ តាមរយៈឯកឧត្តមបណ្ឌិតសភាចារ្យ ជូ វិជិត្ត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ដែលបានផ្តល់ថវិកាយ៉ាងសមរម្យជូនស្ថាប័ននីតិប្បញ្ញត្តិ សម្រាប់យកមកចាត់ចែងបំពេញការងារ ដើម្បីបម្រើ ប្រជាពលរដ្ឋជាម្ចាស់ឆ្នោត៕