ទេសរដ្ឋមន្ដ្រី សក់ សេដ្ឋា អញ្ជើញដឹកនាំកិច្ចប្រជុំសិក្សាស្វែងយល់អំពីស្ថានភាពនៃការរៀបចំ និងការប្រព្រឹត្តទៅនៃរចនាសម្ព័ន្ធ ប្រព័ន្ធគ្រប់គ្រង និងមុខងាររបស់រដ្ឋបាលស្រុកកោះញែក ខេត្តមណ្ឌលគិរី

មណ្ឌលគិរី៖ ឯកឧត្តម សក់ សេដ្ឋា ទេសរដ្ឋមន្ដ្រីទទួលបន្ទុកបេសកកម្មពិសេស និងជាអនុប្រធានអចិន្ដ្រៃយ៍នៃ គ.ជ.អ.ប. តំណាងដ៏ខ្ពង់ខ្ពស់ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធាន គ.ជ.អ.ប. នាថ្ងៃទី២៦ ខែសីហា ឆ្នាំ២០២៥ បានដឹកនាំក្រុមការងារអន្ដរក្រសួងចុះសិក្សាស្វែងយល់អំពីស្ថានភាពនៃការរៀបចំ និងការប្រព្រឹត្តទៅនៃរចនាសម្ព័ន្ធ ប្រព័ន្ធគ្រប់គ្រង និងមុខងាររបស់រដ្ឋបាលស្រុកកោះញែក ខេត្តមណ្ឌលគិរី ដើម្បីជាមូលដ្ឋានក្នុងការវិភាគ និងកំណត់ជម្រើសនានាដែលមានលក្ខណៈសមស្របសម្រាប់រដ្ឋបាលថ្នាក់ក្រោមជាតិនីមួយៗ សំដៅធានាដល់ការជំរុញការអភិវឌ្ឍសេដ្ឋកិច្ច-សង្គម ការផ្តល់សេវាសាធារណៈ និងការដោះស្រាយបញ្ហាប្រឈមនានានៅតាមមូលដ្ឋានប្រកបដោយប្រសិទ្ធភាព។

ក្នុងការចុះសិក្សារយៈពេល២ថ្ងៃនេះ មានការអញ្ជើញចូលរួមពីក្រុមការងារអន្តរក្រសួង (ក្រសួងមហាផ្ទៃ ក្រសួងសេដ្ឋកិច្ច ក្រសួងមុខងារសាធាណៈ និងលេខាធិការដ្ឋាន គ.ជ.អ.ប.) ដោយបានជួបពិភាក្សាជាមួយក្រុមប្រឹក្សា គណៈអភិបាល ទីចាត់ការនិងអង្គភាពចំណុះខេត្ត ក្រុង ស្រុក។

ជារួមក្រុមការងារអន្ដរក្រសួងទទួលធាតុចូលកាន់តែច្រើនក្នុងការឆ្លុះបញ្ចាំង វិភាគ និងពិចារណាលើជម្រើសនានាសម្រាប់ការរៀបចំរដ្ឋបាលថ្នាក់ក្រោមជាតិឱ្យស្របតាមគោលការណ៍រដ្ឋបាលឯកភាព អភិបាលកិច្ចតាមបែបប្រជាធិបតេយ្យ និងឱ្យស្របតាមប្រភេទ និងចរឹកលក្ខណៈរបស់រដ្ឋបាលថ្នាក់ក្រោមជាតិនីមួយៗ៕