លោក ដូណាល់ ត្រាំ គំរាមថានឹងពង្រីកការដាក់ពង្រាយ យោធាទៅកាន់ទីក្រុងផ្សេងទៀត ដែលស្ថិតក្រោមការដឹកនាំរបស់មន្រ្តីគណបក្សប្រជាធិបតេយ្យ

វ៉ាស៉ីនតោន៖ បេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៥ ខែសីហា ឆ្នាំ២០២៥ លោក ដូណាល់ ត្រាំ ប្រធានាធិបតីសហរដ្ឋអាមេរិក បានគំរាមថានឹងពង្រីកការដាក់ពង្រាយ យោធាទៅកាន់ទីក្រុងផ្សេងទៀត ដែលស្ថិតក្រោមការដឹកនាំរបស់មន្រ្តីគណបក្សប្រជាធិបតេយ្យ នៅក្នុងការបញ្ជាក់ទៅកាន់អភិបាលរដ្ឋ Maryland ពេលអមដំណេីររូបលោកចុះទៅទីក្រុង Baltimore។

Baltimore ជាទីក្រុងនៃរដ្ឋ Maryland ដែលលោកអភិបាល Wes Moore មកពីបក្សប្រជាធិបតេយ្យ បានសម្តែងការមិនពេញចិត្តចំពោះការដឹកនាំដ៏បត់បែនរបស់ លោក ត្រាំ ជុំវិញការយុទ្ធប្រឆាំងឧក្រិដ្ឋកម្ម និងបុគ្គលគ្មានផ្ទះសម្បែងនៅក្នុងទីក្រុងវ៉ាស៉ីនតោន។

តាមការបង្ហោះនៅលេី Truth Social លោក ត្រាំ ថាលោក Moore បានលេីកសំណេីមានលក្ខណៈបង្កហេតុ ហើយបន្ទាប់មកលើកឡើងពីទិដ្ឋភាពនៃការដាក់ពង្រាយឆ្មាំជាតិនៅទីក្រុង Los Angeles ជុំវិញការជំទាស់របស់អភិបាលរដ្ឋ California លោក Gavin Newsom។

លោក ត្រាំ សរសេរទៀតថា កំណត់ត្រារបស់លោក Moore ស្តីពីតួលេខនៃឧក្រិដ្ឋកម្មដូចជាមិនទំនង ប្រសិនបើលោក Moore ត្រូវការជំនួយ ដូចជាលោក Newsom បានធ្វើនៅ LA « ខ្ញុំនឹងបញ្ជូនកងទ័ពទៅ ហើយបោសសម្អាតឧក្រិដ្ឋកម្មឱ្យអស់»។

គួរបញ្ជាក់ថា កាលពីសប្តាហ៍មុន លោក ត្រាំ និយាយថា លោកកំពុងពិចារណាលេីទីក្រុង Chicago និង New York សម្រាប់ការដាក់ពង្រាយកងទ័ព ស្រដៀងនឹងរដ្ឋធានី Washington DC ជាកន្លែងដែលឆ្មាំជាតិ និងមន្ត្រីអនុវត្តច្បាប់សហព័ន្ធរាប់ពាន់នាក់កំពុងល្បាតតាមដងផ្លូវ៕