មេដឹកនាំកំពូលអ៉ីរ៉ង់ លោក Ayatollah Ali Khamenei បាននិយាយថា ទីក្រុងតេហេរ៉ង់នឹងមិនឱនក្បាលចុះញ៉មសម្ពាធពីទីក្រុងវ៉ាស៊ីនតោនដាច់ខាត

ឌូបៃ៖ បើតាមការចេញផ្សាយដោយទីភ្នាក់ងារសារព័ត៌មាន Reuters លោក Ayatollah Ali Khamenei មេដឹកនាំកំពូលអ៉ីរ៉ង់ បាននិយាយថាស្ថានភាពបច្ចុប្បន្នជាមួយសហរដ្ឋអាមេរិកជាបញ្ហាមួយមិនអាចដោះស្រាយបាន ហើយថាទីក្រុងតេហេរ៉ង់នឹងមិនឱនក្បាលចុះញ៉មសម្ពាធពីទីក្រុងវ៉ាស៊ីនតោនដាច់ខាត នៅចំពោះមុខភាពតានតឹងជាមួយមហាអំណាចលោកខាងលិច ជុំវិញកម្មវិធីនុយក្លេអ៊ែរ។

អ៉ីរ៉ង់បានផ្អាកកិច្ចចរចានុយក្លេអ៊ែរជាមួយសហរដ្ឋអាមេរិក បន្ទាប់ពីសហរដ្ឋអាមេរិកបានចូលរួមជាមួយអ៉ីស្រាអែល នៅក្នុងការវាយប្រហារទម្លាក់គ្រាប់បែកលើរោងចក្រ នុយក្លេអ៊ែររបស់ខ្លួនអំឡុងសង្រ្គាមផ្លូវអាកាសរយៈពេល១២ថ្ងៃកាលពីខែមិថុនា។

តាមរយៈការដកស្រង់សម្ដីចេញផ្សាយដោយប្រព័ន្ធផ្សព្វផ្សាយរដ្ឋអ៉ីរ៉ង់ កាលពីថ្ងៃអាទិត្យ ទី២៤ ខែសីហា លោក Khamenei បានគូសបញ្ជាក់ដូច្នេះថា «ពួកគេ (លោកខាងលិច) ចង់ឱ្យអ៉ីរ៉ង់ឱនក្បាលគោរពសហរដ្ឋអាមេរិក។ តែប្រជាជាតិអ៉ីរ៉ង់ប្រើប្រាស់ គ្រប់អំណាចដែលខ្លួនមានដើម្បីប្រឆាំងនឹងការរំពឹងបែបនេះ»។

លោកបន្ថែមថាអ្នកដែលស្នើឱ្យអ៉ីរ៉ង់កុំប្រើពាក្យស្លោកប្រឆាំងសហរដ្ឋអាមេរិក និងបើកកិច្ចចរចាដោយផ្ទាល់ជាមួយអាមេរិក វាគ្រាន់តែរឿងល្អមើលពីក្រៅប៉ុណ្ណោះ ប៉ុន្តែ តាមពិតទៅជាវាជាបញ្ហាមិនអាចដោះស្រាយបាន។

គួរបញ្ជាក់ថា បារាំង ចក្រភពអង់គ្លេស និងអាល្លឺម៉ង់ បានព្រមានថាពួកគេអាចនឹងដំណើរការឡើងវិញនូវយន្ដការដាក់ទណ្ឌកម្មក្រោមក្របខណ្ឌអង្គការសហប្រជាជាតិ ប្រឆាំងនឹងអ៉ីរ៉ង់ ប្រសិនបើតេហេរ៉ង់មិនព្រមត្រឡប់មករកតុចរចានុយក្លេអ៊ែរវិញទេនោះ។ ការលើកឡើងរបស់លោក Khamenei ផងដែរធ្វើឡើងបន្ទាប់ពីអ៉ីរ៉ង់ និងមហាអំណាចអឺរ៉ុប បានឈានដល់ការឯកភាពគ្នាកាលពីថ្ងៃសុក្រសប្ដាហ៍មុន ដើម្បីស្ដារកិច្ចចរចាឡើងវិញសំដៅព្យាយាមបើកកិច្ចចរចាពេញលេញជាសាជាថ្មីស្ដីពី ការរឹតត្បិតលើការចម្រាញ់សារធាតុអ៊ុយរ៉ាញ៉ូមរបស់អ៉ីរ៉ង់។សហរដ្ឋអាមេរិក និងបណ្ដាប្រទេសអឺរ៉ុបបានចោទប្រកាន់អ៉ីរ៉ង់ថាកំពុងចម្រាញ់សារធាតុអ៊ុយរ៉ាញ៉ូមក្នុងគោលបំណងផលិតអាវុធនុយក្លេអ៊ែរ។ តែតេហេរ៉ង់បានច្រានចោល ការចោទប្រកាន់បែបនេះ ដោយនិយាយថាខ្លួនចង់អភិវឌ្ឍថាមពលនុយក្លេអ៊ែរស៊ីវិលតែប៉ុណ្ណោះ៕