លោក ដូណាល់ ត្រាំ សង្ឃឹមថា លោក ពូទីន នឹងបោះជំហានទៅមុខ ឆ្ពោះទៅរកការបិទបញ្ចប់សង្រ្គាមនៅអ៊ុយក្រែន

វ៉ាស៉ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអង្គារ ទី១៩ ខែសីហា បាននិយាយថា លោកសង្ឃឹមថា លោក វ៉្លាឌីមៀ ពូទីន នឹងបោះជំហានទៅមុខ ឆ្ពោះទៅរកការបិទបញ្ចប់សង្រ្គាមនៅអ៊ុយក្រែន ប៉ុន្តែលោក ត្រាំ ក៏បានទទួលស្គាល់ដែរថា វាអាចទៅរួចដែលលោកប្រធានាធិបតីរុស្ស៉ី មិនចង់បានកិច្ចព្រមព្រៀង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងកិច្ចសម្ភាសមួយជាមួយបណ្តាញព័ត៌មានអាមេរិក Fox News លោក ត្រាំ បាននិយាយដូច្នេះថា «បើនិយាយឱ្យត្រង់ទៅ ខ្ញុំមិនយល់ថា វានឹងជាបញ្ហាទេ។ ខ្ញុំគិតថា លោក ពូទីន ហត់នឿយនឹងសង្រ្គាមហើយ។ ខ្ញុំគិតថាពួកគេទាំងអស់គ្នា គឺហត់នឿយនឹងសង្រ្គាមនេះ ប៉ុន្តែវាមិនច្បាស់មួយរយភាគរយនោះទេ។ យើងនឹងដឹងច្បាស់អំពីលោកប្រធានាធិបតី ពូទីន ក្នុងពេលប៉ុន្មានសប្តាហ៍ខាងមុខ… វាអាចទៅរួចដែលលោក មិនចង់សម្រេចឱ្យបានកិច្ចព្រមព្រៀង»។

លោក ត្រាំ បានបន្តថា «ខ្ញុំសង្ឃឹមថា លោកប្រធានាធិបតី ពូទីន នឹងធ្វើខ្លួនឱ្យល្អ ហើយប្រសិនបើពុំដូច្នោះទេ វានឹងជាស្ថានការណ៍ ដ៏លំបាកមួយ។ ទន្ទឹមគ្នា ខ្ញុំសង្ឃឹមថា លោកប្រធានាធិបតី ហ្សេលេនស្គី នឹងធ្វើអ្វីដែលខ្លួនឯងត្រូវធ្វើ ព្រោះលោកក៏ចាំបាច់ត្រូវតែ បង្ហាញភាពបត់បែនខ្លះផងដែរ»។

គួរបញ្ជាក់ថា កាលពីថ្ងៃចន្ទសប្តាហ៍នេះ លោក ត្រាំ បានបើកកិច្ចពិភាក្សាជាមួយលោក ហ្សេលេនស្គី និងក្រុមមេដឹកនាំអឺរ៉ុប នៅឯសេតវិមាន ដើម្បីជជែកគ្នាអំពីកិច្ចប្រឹងប្រែងរបស់លោក ក្នុងការស្វែងរកសន្តិភាពសម្រាប់សង្រ្គាមនៅអ៊ុយក្រែន។ ជំនួបនោះ កើតមានឡើង បន្ទាប់ពីលោកបានបើកកិច្ចប្រជុំកំពូលជាមួយ លោក ពូទីន នៅរដ្ឋ Alaska កាលពីថ្ងៃសុក្រសប្តាហ៍មុន។ បើតាម លោក ត្រាំ ជំហានបន្ទាប់ទៀត គឺនឹងមានការរៀបចំជំនួបទ្វេភាគីរវាងលោក ពូទីន និងលោក ហ្សេលេនស្គី ហើយក្រោយពីនោះ គឺជំនួបត្រីភាគី ដែលនឹងមានលោកប្រធានាធិបតីអាមេរិក ចូលរួមផងដែរ៕