លោក ដូណាល់ ត្រាំ គំរាមពីផលវិបាកធ្ងន់ធ្ងរ ប្រសិនបើលោក ពូទីន មិនព្រមទទួលយកសន្តិភាពនៅអ៊ុយក្រែន

វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាមេរិក បានគំរាមពីផលវិបាកធ្ងន់ធ្ងរ ប្រសិនបើលោកប្រធានាធិបតីរុស្ស៉ី វ្ល៉ាឌីមៀ ពូទីន មិនព្រមទទួលយកសន្តិភាពនៅអ៊ុយក្រែន ប៉ុន្តែបាននិយាយនៅថ្ងៃពុធ ទី១៣ ខែសីហាថានៅក្រោយកិច្ចប្រជុំរវាងលោក និងលោក ពូទីននៅរដ្ឋ Alaska អាចនឹងមានការរៀបចំកិច្ចប្រជុំកំពូលលើកទី២ភ្លាមៗដោយមានការចូលរួម ពីមេដឹកនាំអ៊ុយក្រែនផងដែរ។

យោងតាមការចេញផ្សាយដោយទីភ្នាក់ងារសារព័ត៌មាន Reuters លោក ដូណាល់ ត្រាំ មិនបានបញ្ជាក់ឱ្យច្បាស់ថាតើអ្វីទៅដែលជាផលវិបាកធ្ងន់ធ្ងរនោះទេ។ តែលោកធ្លាប់បានព្រមានពីទណ្ឌកម្មសេដ្ឋកិច្ច ក្នុងករណីជំនួបរបស់លោកជាមួយលោក ពូទីន នៅរដ្ឋ Alaska នៅថ្ងៃសុក្រសប្ដាហ៍នេះគ្មានលទ្ធផលអ្វីទេនោះ។

នៅពេលត្រូវបានសាកសួរថាតើរុស្ស៉ីអាចនឹងត្រូវប្រឈមនឹងផលវិបាកណាមួយដែរឬទេ ប្រសិនបើលោក ពូទីនមិនយល់ព្រម បញ្ឈប់សង្រ្គាមក្រោយកិច្ចប្រជុំនៅថ្ងៃសុក្រសប្ដាហ៍នេះ លោក ត្រាំ បានឆ្លើយថាពិតណាស់ រុស្ស៉ីនឹងត្រូវប្រឈមនឹងផលវិបាកធ្ងន់ធ្ងរ។ លើសពីនេះទៅទៀត នៅពេលត្រូវបានសួរបន្ថែមថា ថាតើផលវិបាកនោះអាចជាការដាក់ទណ្ឌកម្ម ឬការដំឡើងពន្ធគយឬក៏យ៉ាងណា? លោក ត្រាំ បានតបទៅកាន់ក្រុមអ្នកសារព័ត៌មានថា «ខ្ញុំមិនចង់និយាយពីរឿងនេះទេ។ តែវានឹងមានផលវិបាកធ្ងន់ធ្ងរ»។

គួរបញ្ជាក់ថា ក្រុមមេដឹកនាំអ៉ឺរ៉ុប និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃពុធ បានបើកកិច្ចពិភាក្សាតាមប្រព័ន្ធវីដេអូជាមួយលោក ត្រាំ នៅមុនកិច្ចប្រជុំរបស់លោក ជាមួយលោក ពូទីន។ ក្រុមមេដឹកនាំអ៉ឺរ៉ុប និងលោក ហ្សេលេនស្គី បានទទូចដដែលថាកិច្ចព្រមព្រៀងសន្តិភាពណាមួយ ឬបញ្ហាទឹកដីអ៊ុយក្រែន មិនអាចធ្វើទៅកើត ដោយមិនមានការចូលរួមពី អ៊ុយក្រែននោះទេ៕