យុទ្ធនាការបោសសម្អាតករណីឆបោកតាមប្រព័ន្ធបច្ចេកវិទ្យា សមត្ថកិច្ចខេត្តពោធិ៍សាត់ ឃាត់ខ្លួនជនបរទេស ១០២នាក់ ក្នុងនោះជនជាតិវៀតណាមចំនួន៩៩នាក់ និងជនជាតិចិនចំនួន៣នាក់
ភ្នំពេញ៖ យោងតាមរបាយការណ៍របស់ ស្នងការដ្ឋាននគរបាលខេត្តពោធិ៍សាត់ ចាប់តាំងពីទទួលបានបទបញ្ជាលេខ ០១បប របស់រាជរដ្ឋាភិបាលកម្ពុជា ស្តីពី «យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS)» ពីថ្ងៃទី១៤ ដល់ថ្ងៃទី១៩ ខែកក្កដា ឆ្នាំ២០២៥ កម្លាំងសមត្ថកិច្ចខេត្តពោធិ៍សាត់ ក្រោមការដឹកនាំនិងបញ្ជាផ្ទាល់ពី ឯកឧត្តម ខូយ រីដា ជាប្រធានគណៈបញ្ជាការឯកភាពខេត្ត និង លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ បានធ្វើការឃាត់ខ្លួន និងសង្គ្រោះជនបរទេស សរុបចំនួន១០២នាក់ ក្នុងនោះមានជនជាតិវៀតណាមចំនួន៩៩នាក់ និងជនជាតិចិនចំនួន៣នាក់ ដើម្បីបន្តនីតិវិធីតាមផ្លូវច្បាប់ ។
ឯកឧត្ដម ខូយ រីដា បានបញ្ជាក់ថា គណៈបញ្ជាការឯកភាពខេត្តពោធិ៍សាត់ បាននឹងកំពុងអនុវត្តន៍នូវបទបញ្ជា ០១បប នេះ យ៉ាងម៉ឺងម៉ាត និងប្តេជ្ញាធ្វើការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS) មិនឲ្យមានក្នុងភូមិសាស្ត្រខេត្តពោធិ៍សាត់ ។
ឯកឧត្ដម អភិបាលខេត្ត បានលើកទឹកចិត្តកម្លាំងសមត្ថកិច្ចខេត្តពោធិ៍សាត់ បន្តខិតខំបង្ក្រាបបទល្មើសឆបោកតាមប្រព័ន្ធបច្ចេកវិទ្យា ដើម្បីរក្សាសន្តិសុខ សណ្តាប់ធ្នាប់ជូនប្រជាពលរដ្ឋ និងភ្ញៀវទេសចរជាតិ-អន្តរជាតិ។ ដោយយល់ឃើញពីភាពស្មុគស្មាញ និងការគំរាមកំហែង នៃការឆបោកតាមប្រព័ន្ធបច្ចេកវិទ្យា បច្ចេកវិទ្យាដែលតែងតែផ្លាស់ប្តូរទម្រង់ថ្មីៗ ឯកឧត្តមអភិបាលខេត្ត ក៏បានជំរុញឲ្យគ្រប់ភាគីពាក់ព័ន្ធ ត្រូវតែអនុវត្ត នូវចំណុចគន្លឹះមួយចំនួន រួមមាន៖ សមត្ថកិច្ច និងមន្ត្រីមូលដ្ឋាន ត្រូវតែបន្តចុះអប់រំ និងផ្សព្វផ្សាយព័ត៌មាននេះ ដល់ប្រជាពលរដ្ឋអំពីទម្រង់ថ្មីៗ នៃការឆបោក ដូចជាការឆបោកតាមរយៈការងារតាមប្រព័ន្ធអនឡាញ ការវិនិយោគក្លែងក្លាយ ល្បែងស៊ីសងអនឡាញ និងការបោកបញ្ឆោត តាមរយៈការបន្លំធ្វើជាសមត្ថកិច្ច ឬស្ថាប័នរដ្ឋជាដើម។
ឯកឧត្តមអភិបាលខេត្ត ក៏បានណែនាំឲ្យបង្កើនកិច្ចសហការជិតស្និទ្ធ រវាងកងកម្លាំងនគរបាល កងរាជអាវុធហត្ថ រដ្ឋបាលខេត្ត-ក្រុង-ស្រុក-ឃុំ-សង្កាត់ និងស្ថាប័នពាក់ព័ន្ធផ្សេងៗទៀត ដើម្បីចែករំលែកនូវ ព័ត៌មាន ស៊ើបអង្កេត និងបង្ក្រាបបណ្តាញឆបោក ប្រកបដោយប្រសិទ្ធភាពខ្ពស់។
ឯកឧត្តម បានបញ្ជាក់ថា រាល់ករណីឆបោក ដែលរកឃើញ ត្រូវតែចាត់វិធានការផ្លូវច្បាប់ យ៉ាងតឹងរ៉ឹងបំផុត ដោយគ្មានការលើកលែងឡើយ ដើម្បីនាំខ្លួនជនល្មើសមកផ្តន្ទាទោសតាមផ្លូវច្បាប់ និងជាការព្រមានដល់អ្នកផ្សេងទៀតផងដែរ៕
