ឯកអគ្គរដ្ឋទូតបារាំង អះអាងថា ទំនាក់ទំនងលើវិស័យការពារជាតិរបស់បារាំងជាមួយអូស្ត្រាលី ល្អប្រសើរឡើងវិញ

ស៊ីដនី៖ លោក ព្យែរ.អាន់ដ្រេ អ៊ីមប៊ឺត ឯកអគ្គរដ្ឋទូតបារាំង បានអះអាងកាលពីថ្ងៃអាទិត្យទី១៣ ខែកក្កដាថា ទំនាក់ទំនងលើវិស័យការពារជាតិរបស់បារាំងជាមួយអូស្ត្រាលី ល្អប្រសើរឡើងវិញ បន្ទាប់ពីមានការរអាក់រអួលក្នុងឆ្នាំ២០២១ ជុំវិញកិច្ចសន្យានាវាមុជទឹកដ៏ធំមួយ។

លោកឯកអគ្គរដ្ឋទូត បាននិយាយថា រដ្ឋធានីប៉ារីសបានសម្ដែងនូវការសោកស្ដាយយ៉ាងខ្លាំងនៅពេលដែលប្រទេសអូស្ត្រាលីបានលុបចោលកិច្ចព្រមព្រៀងទិញនាវានៃនាវាមុជទឹកដើរដោយថាមពលម៉ាស៊ូតពីប្រទេសបារាំងតម្លៃរាប់ពាន់លានដុល្លារ។

លោកបាននិយាយថា៖«ចាប់តាំងពីការជាប់ឆ្នោតឆ្នាំ២០២២ របស់នាយករដ្ឋមន្ត្រីអូស្ត្រាលី លោក អាន់តូនី អាល់បានីស ទំនាក់ទំនងលើវិស័យការពារជាតិបានចាប់ផ្តើមល្អប្រសើរឡើងវិញ»។

លោកឯកអគ្គរដ្ឋទូតបានប្រាប់ទីភ្នាក់ងារសារព័ត៌មាន AFP នៅពេលកងកម្លាំងបារាំងបានចូលរួមសមយុទ្ធយោធាដ៏ធំនៅជុំវិញប្រទេសអូស្ត្រាលីថា៖«ឥឡូវនេះ សសរស្តម្ភទីមួយនៃកិច្ចសហប្រតិបត្តិការរបស់យើងគឺការការពារជាតិ និងសន្តិសុខ ដូច្នេះយើងមានកម្រិតនៃកិច្ចសហប្រតិបត្តិការដ៏ល្អ»។

គួរបញ្ជាក់ថា​ នៅពេលដែលអូស្ត្រាលីលុបចោលកិច្ចព្រមព្រៀងជាមួយបារាំង ប្រទេសនេះបានជ្រើសរើសជំនួសវិញក្នុងការទិញនាវាដើរដោយថាមពលនុយក្លេអ៊ែរនៅក្នុងកិច្ចព្រមព្រៀង AUKUS ជាមួយសហរដ្ឋអាម៉េរិក និងអង់គ្លេស។ ប៉ុន្តែមន្ត្រីការពារជាតិអាម៉េរិកម្នាក់កាលពីខែមុនបានបង្ហាញថា ការពិនិត្យឡើងវិញលើ AUKUS កំពុងដំណើរការដើម្បីធានាថាវាស្របតាមនយោបាយ «America First» របស់ប្រធានាធិបតីអាម៉េរិក។ ក្រោមកិច្ចព្រមព្រៀង AUKUS អូស្ត្រាលីនឹងទទួលបានយ៉ាងហោចណាស់នាវាមុជទឹកថ្នាក់ Virginia បីគ្រឿងពីសហរដ្ឋអាម៉េរិកក្នុងរយៈពេល១៥ ឆ្នាំ៕