នាយឧត្តមសេនីយ៍ផុតលេខផ្កាយមាស៥ ហ៊ុន សែន៖ ការវ៉ៃគ្នាវាមិនមែនជារឿងល្អទេ ចៀសបានចៀសទៅ តែបើចៀសមិនបានមានតែវ៉ៃ
ភ្នំពេញ៖ សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន អគ្គភស្តុភារជាន់ខ្ពស់នៃកងកម្លាំងប្រដាប់អាវុធ និងប្រធានព្រឹទ្ធសភា នៃព្រះរាជាណាចក្រកម្ពុជា បានបញ្ជាក់ថា ការវ៉ៃគ្នាវាមិនមែនជារឿងល្អទេ ចៀសបានចៀសទៅ តែបើចៀសមិនបានមានតែវ៉ៃ។
ក្នុងឱកាសអញ្ជើញជួបសំណេះសំណាលសួរសុខទុក្ខប្រជាពលរដ្ឋដែលបានជម្លៀសដោយស្ម័គ្រចិត្តមកកាន់មណ្ឌលសុវត្ថិភាព នៅវត្តពោធិ៥០០០ដើម នៅខេត្តព្រះវិហារ នារសៀលថ្ងៃទី២៦ ខែមិថុនា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា នាយឧត្តមសេនីយ៍ផុតលេខ ផ្កាយមាស៥ បានបញ្ជាក់ថា “ខ្ញុំចង់មានសន្ដិភាព ខ្ញុំមិនចង់មានសត្រូវទេ ប៉ុន្ដែបើគេក្បត់ខ្ញុំគេចាត់ទុកខ្ញុំជាសត្រូវខ្ញុំក៏មិនចាត់ទុកជាមិត្តដែរ”។
ខណៈភាគីថៃបានធ្វើការគំរាមកំហែងដល់កម្ពុជាម្តងហើយម្តងទៀតនោះ សម្តេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥បានឆ្លើយតបថា«គំរាមផេះអី»៕
