លោក អេង លីហួរ ដឹកនាំកម្លាំងនគរបាលជាច្រើននាក់ ចុះជួយសម្របសម្រួលដល់ការឆ្លងដែនរបស់ប្រជាពលរដ្ឋខ្មែរដែលវិលត្រឡប់ពីប្រទេសថៃ នៅច្រកអន្តរជាតិប៉ោយប៉ែត
បន្ទាយមានជ័យ: លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ នៅព្រឹកថ្ងៃទី២៦ ខែមិថុនា ឆ្នាំ២០២៥ បានចាត់តាំងលោកឧត្តមសេនីយ៍ត្រី អេង លីហួរ ស្នងការរងផែនការងារអន្តោប្រវេសន៍ លោកវរសេនីយ៍ទោ ព្រហ្ម ពិសិដ្ឋ អធិការនៃអធិការដ្ឋាននគរបាលក្រុងប៉ោយប៉ែត បានដឹកនាំកម្លាំងនគរបាលក្រោមឱវាទ សហការជាមួយអាជ្ញាធរ សមត្ថកិច្ចពាក់ព័ន្ធ បានចុះជួយសម្របសម្រួលដល់ការឆ្លងដែនរបស់ប្រជាពលរដ្ឋខ្មែរដែលវិលត្រឡប់ពីប្រទេសថៃ នៅច្រកអន្តរជាតិប៉ោយប៉ែត ក្រោយពីអាជ្ញាធរថៃបិទច្រកព្រំដែន។
នៅព្រឹកថ្ងៃព្រហស្បតិ៍នេះ វេលាម៉ោង៩:០០នាទី មានពលរដ្ឋខ្មែរមួយចំនួន រួមទាំំង ម៉ូតូ និងរថយន្ត ដែលជាប់គាំងនៅខាងច្រកខ្លងលឹក ស្រុកអារញ្ញ ខេត្តស្រះកែវ ប្រទេសថៃ ត្រូវបានអាជ្ញាធរថៃ-កម្ពុជា យល់ព្រមអនុញាតិឲ្យឆ្លងដែនចូលមកប្រទេសកម្ពុជាហើយ។ ក្នុងពេលព្រមគ្នា ពលរដ្ឋថៃដែលជាប់គាំងនៅច្រកអន្តរជាតិប៉ោយប៉ែត គាត់ត្រូវបានអនុញ្ញាតឱ្យឆ្លងដែនទៅប្រទេសថៃដូចគ្នាផងដែរ៕
