សម្តេចព្រះមហាក្សត្រី ព្រះវររាជមាតាជាតិខ្មែរ ផ្ញើព្រះរាជសារលិខិតជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានចាត់គណៈប្រតិភូចូលក្រាបបង្គំគាល់ ទូលថ្វាយរបាយការណ៍ និងរៀបចំអបអរសាទរព្រះរាជពិធីបុណ្យចម្រេីនព្រះជន្មាយុរបស់ព្រះអង្គ
ភ្នំពេញ៖ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានផ្ញេីព្រះរាជសារលិខិតជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានចាត់គណៈប្រតិភូចូលក្រាបបង្គំគាល់ ទូលថ្វាយរបាយការណ៍ និងរៀបចំអបអរសាទរព្រះរាជពិធីបុណ្យចម្រេីនព្រះជន្មាយុរបស់ព្រះអង្គ។
ក្នុងព្រះរាជសារលិខិត មានខ្លឹមសារថា៖ «សម្ដេចកិត្តិព្រឹទ្ធបណ្ឌិត ជាទីរាប់អានដ៏ខ្ពង់ខ្ពស់បំផុត និងស្រឡាញ់ដ៏ជ្រាលជ្រៅបំផុត! ខ្ញុំ មានហប្ញទ័យរីករាយដោយបានទទួលគណៈប្រតិភូដ៏ខ្ពង់ខ្ពស់នៃកាកបាទក្រហមកម្ពុជា ដឹកនាំដោយ លោកជំទាវបណ្ឌិត ពេជ ចន្ទមុន្នី អនុប្រធានអចិន្ត្រៃយ៍កាកបាទក្រហមកម្ពុជា ជាតំណាងដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ចូលក្រាបបង្គំគាល់នៅថ្ងៃទី៦ ខែមិថុនា ឆ្នាំ២០២៥។
ខ្ញុំ រីករាយបានទទួលពីគណៈប្រតិភូនូវលិខិតចុះថ្ងៃទី៥ ខែមិថុនា ឆ្នាំ២០២៥ ថ្វាយរបាយការណ៍ស្តីអំពី សកម្មភាពជួយប្រជារាស្ត្រដ៏មមាញឹកនៅក្នុងព្រះរាជាណាចក្រកម្ពុជា និងអន្តរជាតិ ព្រមទាំងថវិកាចំនួន ៥០០,០០០ ដុល្លារអាម៉េរិក ដ៏សប្បុរសសំរាប់ការងារមនុស្សធម៌ទាំងឡាយរបស់ខ្ញុំ។
ខ្ញុំសូមសំដែងនូវការកោតសរសើរដ៏កក់ក្តៅជាទីបំផុតចំពោះសម្តេចកិត្តិព្រឹទ្ធបណ្ឌិត ដែលបានបរិច្ចាគ កម្លាំងកាយ-ចិត្ត និងធនធានចូលរួមក្នុងសកម្មភាពដ៏ឧត្តង្គឧត្តម បម្រើប្រជាជាតិ និងប្រជារាស្រ្តកម្ពុជាប្រកបដោយស្មារតីស្នេហាជាតិ មាតុភូមិដ៏ខ្ពង់ខ្ពស់។
តាមរយៈកាយវិការដ៏វិសេសវិសាលនេះកិត្តិនាមរបស់ សម្ដេចកិត្តិព្រឹទ្ធបណ្ឌិត ទទួលបានការគោរពស្រឡាញ់ និងទទួលបានការកោតសរសើរ និងអំណរសាទរទាំងនៅលើឆាកជាតិ និងអន្តរជាតិ។
ខ្ញុំសូមអរគុណដ៏ជ្រាលជ្រៅដែល សម្តេចកិត្តិព្រឹទ្ធបណ្ឌិត និងកាកបាទក្រហមកម្ពុជា រៀបចំអបអរសាទរ ព្រះរាជពិធីបុណ្យចម្រើនជន្មាយុ ខ្ញុំ ដោយមានពិធីថ្វាយព្រះពុទ្ធជ័យមង្គលថ្វាយព្រះពរតាមប្រពៃណីព្រះពុទ្ធ សាសនា រាប់បាត្រសម្តេចព្រះសង្ឃ ព្រះសង្ឃចំនួន៩០ ព្រះអង្គ នៅថ្ងៃទី ១៦ មិថុនា និងមានពិធីប្រគេននៅតាមសាខាទាំង២៥ រាជធានី-ខេត្ត។ ព្រមជាមួយនេះមានកម្មវិធីសិល្បៈដែលបានចងក្រងដោយកាកបាទក្រហមកម្ពុជា កម្មវិធីសិល្បៈ របាំ ចម្រៀងសម័យបូរាណ ដើម្បីផ្សព្វផ្សាយតាមកញ្ចក់ទូរទស្សន៍ជាតិកម្ពុជាជូនជនរួមជាតិ និង អន្តរជាតិទស្សនា។
ខ្ញុំសូមជូនពរ សម្តេចកិត្តិព្រឹទ្ធបណ្ឌិត ថ្នាក់ដឹកនាំ សមាជិក សមាជិកា មន្ត្រី ព្រមទាំងបុគ្គលិកទាំងអស់នៃកាកបាទក្រហមកម្ពុជាបានប្រកបតែនឹងព្រះពុទ្ធពរគ្រប់ប្រការគឺ អាយុ វណ្ណៈ សុខៈ កុំបីឃ្លៀងឃ្លាតឡើយ។»
ខាងក្រោមនេះ ជាខ្លឹមសារទាំងស្រុងនៃព្រះរាជសារលិខិតរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ផ្ញើជូន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន៖
