សិក្ខាសាលាពិគ្រោះយោបល់បច្ចេកទេសស្តីពី ការរៀបចំគម្រោង សម្រាប់កម្មវិធីបរិវត្តកម្មសម្រាប់ប្រព័ន្ធដាំដុះស្រូវដែលមានភាពធន់ នឹងអាកាសធាតុ និងការបំភាយឧស្ម័នផ្ទះកញ្ចក់ទាប
ភ្នំពេញ៖ នាថ្ងៃពុធ ១១រោច ខែជេស្ឋ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី១១ ខែមិថុនា លេខាធិការដ្ឋានគ.ជ.អ.ប. បានសហការជាមួយក្រសួងកសិកម្ម រុក្ខាប្រមាញ់ និងនេសាទ និងទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) ប្រចាំកម្ពុជា រៀបចំសិក្ខាសាលាពិគ្រោះយោបល់បច្ចេកទេសស្តីពីការរៀបចំគម្រោង សម្រាប់កម្មវិធីបរិវត្តកម្មសម្រាប់ប្រព័ន្ធដាំដុះស្រូវដែលមានភាពធន់ នឹងអាកាសធាតុ និងការបំភាយឧស្ម័នផ្ទះកញ្ចក់ទាប ក្រោមអធីបតីភាពដ៏ខ្ពង់ខ្ពស់ពីឯកឧត្តមបណ្ឌិត យ៉ង់ សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ ប្រធានលេខាធិការដ្ឋាន គ.ជ.អ.ប. និងមានការអញ្ជើញចូលរួមពីឯកឧត្តម លោកជំទាវ លោក លោកស្រីតំណាងក្រសួង ស្ថាប័នពាក់ព័ន្ធ សរុបចំនួន ៥០រូប ស្ត្រី១៨ នៅសណ្ឋាគារសេនសូរីផាក រាជធានីភ្នំពេញ។
សិក្ខាសាលានេះ រៀបចំឡើងក្នុងគោលបំណងប្រមូលធាតុចូលពីក្រសួង ស្ថាប័នពាក់ព័ន្ធ ស្ថាប័នស្រាវជ្រាវ វិស័យឯកជន អង្គការក្រៅរាជរដ្ឋាភិបាល និងដៃគូអភិវឌ្ឍន៍នានា ដើម្បីធ្វើឱ្យប្រសើរឡើងនៃការរៀបចំគម្រោង នៃកម្មវិធីបរិវត្តកម្មសម្រាប់ប្រព័ន្ធដាំដុះស្រូវដែលមានភាពធន់ នឹងអាកាសធាតុ និងការបំភាយឧស្ម័នផ្ទះកញ្ចក់ទាប ប្រកបដោយភាពគ្រប់ជ្រុងជ្រោយ និងមានប្រសិទ្ធភាព ដើម្បីដាក់ស្នើទៅមូលនិធិអាកាសធាតុបៃតង។ជាមួយគ្នានេះដែរ គម្រោងដែលផ្តួចផ្តើមឡើងនេះ មានគោលបំណងពង្រីកបរិវត្តកម្មររបស់កម្ពុជាទៅលើផលិតកម្មស្រូវអង្ករឆ្លើយតបនឹងការប្រែប្រួលអាកាសធាតុ និងការបញ្ចេញឧស្ម័នផ្ទះកញ្ចក់ទាប ដោយបង្កើតឧបករណ៍ជំនួយបច្ចេកទេស ការពង្រឹងសមត្ថភាពរដ្ឋបាលថ្នាក់ក្រោមជាតិ ការផ្តល់សិទ្ធិអំណាចដល់មន្ត្រីកសិកម្មឃុំ សហគមន៍កសិកម្មទំនើប និងការពង្រីកប្រព័ន្ធឌីជីថល ដើម្បីតាមដាន និងផ្ទៀងផ្ទាត់ផលប៉ះពាល់ ដើម្បីភាពប្រសើរឡើងនៃគុណភាពស្រូវ អង្ករកម្ពុជា ។
សិក្ខាសាលាបានធ្វើការពិភាក្សាទៅលើចំណុចសំខាន់ៗ ដូចជា៖
– បច្ចេកវិទ្យាចាំបាច់ដើម្បីធ្វើទំនើបកម្មបច្ចេកវិទ្យាអាកាសធាតុដែលមានលក្ខណៈឆ្លាតវៃ
– ការត្រៀមខ្លួន និងការពង្រឹងសមត្ថភាពរបស់ស្ថាប័នពាក់ព័ន្ធនីមួយៗ នៅក្នុងការគាំទ្រលើតួនាទីមន្ត្រីកសិកម្មឃុំ
– បញ្ហាទីផ្សារ និងការប្រើប្រាស់ទិន្នន័យនៅក្នុងវិស័យស្រូវ អង្ករ
– ការរៀបចំបង្កើតមូលនិធិហិរញ្ញប្បទានកសិ-នវានុវត្តន៍។
