ឯកឧត្តម ហែម វណ្ណឌី បានកោតសរសើរដល់ AFD និងសហភាពអឺរ៉ុបចំពោះការបន្តគាំទ្រកម្ពុជា ព្រមទាំងបញ្ជាក់ពីសារៈសំខាន់នៃការពង្រីកសេវាទឹកស្អាតសម្រាប់សហគមន៍

ភ្នំពេញ៖ទីភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប បានបញ្ជាក់ការគាំទ្ររបស់ខ្លួន ចំពោះកំណែទម្រង់វិស័យទឹកស្អាតនៅកម្ពុជា ក្នុងជំនួបជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅទីស្តីការក្រសួងកាលពីថ្ងៃទី៥ ខែមិថុនា ឆ្នាំ២០២៥។

គណៈប្រតិភូដែលដឹកនាំដោយលោកស្រី Sandrine Boucher នាយកប្រចាំប្រទេសរបស់ AFD បានពិភាក្សាអំពីគម្រោងវិនិយោគដែលកំពុងអនុវត្តនិងគម្រោងអនាគត កំណែទម្រង់ស្ថាប័ន និងយុទ្ធសាស្រ្តដើម្បីពន្លឿនការពង្រីកសេវាទឹកស្អាត និងអនាម័យនៅទូទាំងប្រទេស។

ឯកឧត្តម ហែម វណ្ណឌី បានកោតសរសើរដល់ AFD និងសហភាពអឺរ៉ុបចំពោះការបន្តគាំទ្រកម្ពុជា ព្រមទាំងបញ្ជាក់ពីសារៈសំខាន់នៃការពង្រីកសេវាទឹកស្អាតសម្រាប់សហគមន៍ដែលមិនទាន់ទទួលសេវា ជាពិសេសនៅតំបន់ជនបទ។ ឯកឧត្តមបានលើកឡើងថា៖ “យើងមិនអាចពន្យារការផ្តល់សេវាទឹកស្អាត ដោយរង់ចាំតែគម្រោងហេដ្ឋារចនាសម្ព័ន្ធខ្នាតធំទេ។ ដំណោះស្រាយជាក់ស្តែងនៅតាមតំបន់ និងការផ្តល់ហិរញ្ញប្បទានគឺជារឿងចាំបាច់ ដើម្បីពង្រីកសេវា និងដោះស្រាយបញ្ហាប្រកួតប្រជែងក្នុងការប្រើប្រាស់ប្រភពទឹក។

ឯកឧត្តមក៏បានណែនាំឱ្យក្រុមការងារបច្ចេកទេសរបស់ក្រសួង សហការជាមួយក្រុមហ៊ុន PROPARCO ដែលជាដៃគូបម្រើវិស័យឯកជនរបស់ AFD ដើម្បីសម្រួលការផ្តល់ហិរញ្ញប្បទានក្នុងអត្រាការប្រាក់សមរម្យសម្រាប់ប្រតិបត្តិករទឹកស្អាតឯកជន ដោយសារប្រតិបត្តិករទាំងនេះដើរតួនាទីសំខាន់ក្នុងការផ្តល់សេវាទឹកស្អាតដល់ប្រជាជនក្នុងតំបន់ជនបទ។
លោកស្រី Sandrine Boucher បានលើកឡើងថា AFD កំពុងពិចារណាហិរញ្ញប្បទានប្រមាណ ២៧៥ លានអឺរ៉ូ សម្រាប់កម្ពុជា ពីឆ្នាំ២០២៥-២០២៧ ដោយក្នុងនោះ ៧០% ពាក់ព័ន្ធនឹងទឹក។

លោកស្រីបានបន្ថែមថា៖ “សម្រាប់វិស័យឯកជន តាមរយៈ PROPARCO យើងកំពុងបង្កើតកញ្ចប់ឥណទានថ្មីមួយ ដោយសហការជាមួយធនាគារពាណិជ្ជ ដើម្បីផ្តល់ហិរញ្ញប្បទានដល់ប្រតិបត្តិករទឹកស្អាតឯកជន។”
កិច្ចពិភាក្សាក៏ផ្តោតលើការធ្វើបច្ចុប្បន្នកម្មច្បាប់ ក្របខណ្ឌស្ថាប័នសម្រាប់ប្រតិបត្តិករទឹកស្អាត និងកម្មវិធី បណ្តុះបណ្តាលដោយសហការជាមួយវិទ្យាស្ថានបច្ចេកវិទ្យាកម្ពុជា និងប្រើប្រាស់សមត្ថភាពរបស់រដ្ឋាករទឹកស្វយ័តក្រុងភ្នំពេញ ដើម្បីអភិវឌ្ឍធនធានមនុស្សសម្រាប់វិស័យនេះ។

ឯកឧត្តមរដ្ឋមន្ត្រីបានអំពាវនាវឱ្យមានការយកចិត្តទុកដាក់បន្ថែមលើនវានុវត្តន៍ ដោយលើកឡើងថា៖ “យើងស្នើសហភាពអឺរ៉ុប ឱ្យពិចារណាផ្តល់ហិរញ្ញប្បទានសម្រាប់ការស្រាវជ្រាវនវានុវត្តន៍ ក្នុងវិស័យទឹកស្អាត។

ការស្រាវជ្រាវលើ AI អាចជួយបង្កើនប្រសិទ្ធភាព ដូចជាស្វែងរកការលេចធ្លាយ សន្សំថាមពលតាមរយៈស្វ័យប្រវត្តិកម្មម៉ាស៊ីនបូម តាមដានគំរូនៃការប្រើប្រាស់ទឹកឆ្លាតវៃ និងពង្រីកលទ្ធភាពកែច្នៃទឹកពីប្រភពឧស្សាហកម្មសម្រាប់ប្រើប្រាស់ឡើងវិញជាដើម។

លោក Koen Everaert អនុប្រធានកិច្ចសហប្រតិបត្តិការនៃប្រតិភូសហភាពអឺរ៉ុបប្រចាំកម្ពុជា បានបញ្ជាក់ថា ទឹក រួមជាមួយថាមពល និងការអប់រំ នៅតែជាវិស័យអាទិភាពសម្រាប់សហភាពអឺរ៉ុបនៅកម្ពុជា ក្រោមកម្មវិធី Global Gateway របស់ខ្លួន។