លោក ដូណាល់ ត្រាំ ដាក់បំរាមហាមមិនឱ្យសាកលវិទ្យាល័យហាវើដ ចុះឈ្មោះទទួលសិស្ស-និស្សិតអន្តរជាតិ

វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាម៉េរិកកាលពីថ្ងៃព្រហស្បតិ៍ទី២ ២ឧសភា បានដាក់បំរាមហាមមិនឱ្យសាកលវិទ្យាល័យហាវើដ (Harvard) ចុះឈ្មោះទទួលសិស្ស-និស្សិតអន្តរជាតិបន្តទៅទៀត។

រដ្ឋបាលលោកត្រាំ ក៏កំពុងបង្ខំឱ្យនិស្សិតបរទេសដែលកំពុងសិក្សានៅសាកលវិទ្យាល័យលំដាប់កំពូលមួយនេះ ផ្ទេរចេញទៅសិក្សានៅសាលាផ្សេងទៀត ឬប្រឈមនឹងការបាត់បង់ភាពស្របច្បាប់ក្នុងនាមជានិស្សិតបរទេសទៅសិក្សានៅអាម៉េរិកតែម្ដង។

ការណ៍នេះ កើតឡើងស្របពេលដែលរដ្ឋធានីវ៉ាស៊ីនតោន កំពុងផ្តោតលើការបង្ក្រាប និងស៊ើបអង្កេតយ៉ាងតឹងរឹងទៅលើមហាវិទ្យាល័យផ្សេងទៀតផងដែរ។

រដ្ឋមន្ត្រីក្រសួងសន្តិសុខមាតុភូមិអាម៉េរិក លោកស្រី គ្រីស្ទី នឿម (Kristi Noem) បានបញ្ជាឱ្យក្រសួងអប់រំបញ្ចប់ការបញ្ជាក់លទ្ធផលសិក្សារបស់និស្សិត និងកម្មវិធីផ្លាស់ប្ដូរនិស្សិតរបស់សាកលវិទ្យាល័យហាវើដ ដែលត្រូវចូលជាធរមានសម្រាប់ឆ្នាំសិក្សាថ្មី ២០២៥-២០២៦។ លើសពីនេះ លោកស្រី នឿម បានចោទប្រកាន់សាកលវិទ្យាល័យដ៏ល្បីនេះថា កំពុងជំរុញឱ្យមានអំពើហិង្សា បង្កើតឱ្យមានពួកប្រឆាំងនិយម និងការចូលដៃចូលជើងជាមួយបក្សកុម្មុយនីស្ដចិន។

ចំណាត់ការណ៍នេះ កើតឡើងបន្ទាប់ពីសាកលវិទ្យាល័យហាវើដបដិសេធលើការផ្ដល់ព័ត៌មានលម្អិត អំពីទិដ្ឋាការរបស់សិស្សនិស្សិតបរទេសមួយចំនួននៅសាកលវិទ្យាល័យនេះ ឱ្យស្របទៅនឹងការទាមទាររបស់លោកស្រី គ្រីស្ទី នឿម។

ផ្ទុយទៅវិញ សាកលវិទ្យាល័យនេះ បានចាត់ទុកសកម្មភាពរបស់រដ្ឋាភិបាល ថាជាទង្វើខុសច្បាប់ ហើយខ្លួននៅតែប្តេជ្ញាចិត្តទាំងស្រុងក្នុងការអប់រំនិស្សិតបរទេស។ ជាក់ស្តែង សាកលវិទ្យាល័យអះអាងនៅក្នុងសេចក្តីថ្លែងការណ៍មួយថា៖«សកម្មភាពនេះ គំរាមកំហែងយ៉ាងធ្ងន់ធ្ងរដល់សហគមន៍ និងប្រទេសរបស់យើង ហើយធ្វើឱ្យខូចដល់បេសកកម្មសិក្សា និងកិច្ចការស្រាវជ្រាវរបស់សាកលវិទ្យាល័យហាវើដ»។

គួរបញ្ជាក់ថា សាកលវិទ្យាល័យហាវើដ បានទទួលការចុះឈ្មោះនិស្សិតអន្តរជាតិជិត ៦៨០០នាក់ ក្នុងឆ្នាំសិក្សា២០២៤-២០២៥ ដែលស្មើនឹង២៧ភាគរយនៃការចុះឈ្មោះចូលរៀនសរុប។ នេះបើយោងតាមស្ថិតិរបស់សាកលវិទ្យាល័យ។ គេនៅចាំបានថា កាលពីឆ្នាំ២០២២ ជនជាតិចិន គឺជាក្រុមនិស្សិតបរទេសច្រើនបំផុតនៅសាកលវិទ្យាល័យនេះ ដែលមានចំនួដល់ទៅ១០១៦នាក់ បន្ទាប់ មកមាននិស្សិតមកពីប្រទេស កាណាដា ឥណ្ឌា កូរ៉េខាងត្បូង អង់គ្លេស អាល្លឺម៉ង់ អូស្ត្រាលី សិង្ហបុរី និង ជប៉ុន៕