ឯកឧត្តម ឆាយ ឫទ្ធិសែន អញ្ជើញទស្សនកិច្ចក្រុមហ៊ុន Phnom Penh Precast Plants Co.,Ltd. ដែលមានអាស័យដ្ឋានស្ថិតនៅក្នុងសង្កាត់ស្វាយប៉ាក ខណ្ឌឫស្សីកែវ

ភ្នំពេញ៖ នៅព្រឹកថ្ងៃទី១៤ ខែឧសភា ឆ្នាំ២០២៥ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកប្រតិភូក្រសួងអភិវឌ្ឍន៍ជនបទ អមដំណើរដោយឯកឧត្តមរដ្ឋលេខាធិការប្រចាំការ អនុរដ្ឋលេខាធិការ អគ្គនាយក ប្រធាននាយកដ្ឋាន បានអញ្ជើញទស្សនកិច្ចក្រុមហ៊ុន Phnom Penh Precast Plants Co.,Ltd.ដែលមានអាស័យដ្ឋានស្ថិតនៅក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ក្រុមហ៊ុន Phnom Penh Precast Plants Co.,Ltd. គឺជាក្រុមហ៊ុនរបស់ប្រទេសកម្ពុជាដែលត្រូវបានបង្កើតឡើងក្នុងឆ្នាំ២០១៣ ហើយជាអ្នកផ្គត់ផ្គង់ឈានមុខគេនៃលូប្រអប់ឬលូជ្រុងបេតុង បំពង់លូមូលបេតុង ប្រឡាយបេតុង ជញ្ជាំងបេតុងទប់ដី សសរគ្រឹះបេតុងនិងបង្គោលភ្លើងអគ្គិសនី ព្រមទាំងបរិក្ខារវិស្វកម្មចាំបាច់នានា។ ក្រុមហ៊ុន ក៏មានការផ្តល់សេវាកម្មរចនា និងផ្គត់ផ្គង់ដំណោះស្រាយបច្ចេកទេសចំពោះរាល់ការបញ្ជូនអគ្គិសនី ការរៀបចំសំណង់អគារ ផ្លូវថ្នល់ និងសំណង់សិល្បការ្យគ្រប់ប្រភេទ ។

ការអញ្ជើញទស្សនកិច្ចនាពេលនេះក្នុងគោលបំណងស្វែងយល់អំពីគុណភាពនៃការផលិតសំណង់សិល្បការ្យរបស់វិស័យឯកជន ដើម្បីចូលរួមពង្រឹងគុណភាពក្នុងការសាងសង់ហេដ្ឋារចនាសម្ព័ន្ធផ្លូវ និងសំណង់សិល្បការ្យជនបទ ឱ្យកាន់តែមានភាពរឹកមាំប្រើប្រាស់បានយូរអង្វែងជូនដល់ប្រជាពលរដ្ឋ៕