ឯកឧត្តម គីម រិទ្ធី៖ ការបរិច្ចាគឈាម គឺជាទង្វើដ៏មានតម្លៃដែលបង្ហាញពីស្មារតីសាមគ្គីភាព និងការយកចិត្តទុកដាក់ចំពោះសង្គម

ភ្នំពេញ៖ នៅព្រឹកថ្ងៃទី០៥ ខែឧសភា ឆ្នាំ២០២៥នេះ រដ្ឋបាលខេត្តព្រះវិហារ បានសហការជាមួយ “ក្លឹបនៃក្តីស្រឡាញ់” នៃសហភាពសហព័ន្ធយុវជនកម្ពុជា ខេត្តព្រះវិហារ រៀបចំយុទ្ធនាការបរិច្ចាគឈាម ដែលមានអ្នកស្ម័គ្រចិត្តចូលរួមផ្តល់ឈាមចំនួន១៤១នាក់ ស្រី៣៥នាក់ បានបរិច្ចាគឈាមដោយជោគជ័យចំនួន៨៦នាក់ ក្រោមអធិបតីភាពឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ។

ក្នុងឱកាសនោះ ឯកឧត្តម គីម រិទ្ធី បានថ្លែងថា “ក្លឹបនៃក្តីស្រឡាញ់” បានរួមចំណែកយ៉ាងសំខាន់ក្នុងការជំរុញយុវជន និងប្រជាពលរដ្ឋគ្រប់ស្រទាប់វណ្ណៈ ឱ្យចូលរួមគាំទ្រគោលដៅបរិច្ចាគឈាមដោយស្ម័គ្រចិត្ត ១០០% របស់មជ្ឈមណ្ឌលជាតិផ្តល់ឈាម។

ឯកឧត្តមអភិបាលខេត្ត បានបន្តថា សកម្មភាពនេះមិនត្រឹមតែលើកកម្ពស់វប្បធម៌បរិច្ចាគឈាមដោយស្ម័គ្រចិត្ត និងមិនគិតកម្រៃប៉ុណ្ណោះទេ ថែមទាំងពង្រឹងនូវសុវត្ថិភាព និងនិរន្តរភាពឈាម សម្រាប់សង្គ្រោះជីវិតមនុស្សផងដែរ។

ជាមួយគ្នានោះ ឯកឧត្តម គីម រិទ្ធី បានបញ្ជាក់ថា ការបរិច្ចាគឈាម គឺជាទង្វើដ៏មានតម្លៃដែលបង្ហាញពីស្មារតីសាមគ្គីភាព និងការយកចិត្តទុកដាក់ចំពោះសង្គម។ ឈាមដែលបានបរិច្ចាគនឹងត្រូវប្រើប្រាស់សម្រាប់ការវះកាត់ព្យាបាលជំងឺធ្ងន់ធ្ងរ និងសង្គ្រោះជីវិតអ្នកជំងឺដូចជា ជំងឺមហារីក ជំងឺឈាម អ្នកជំងឺដែលរងរបួសធ្ងន់ និងស្ត្រីឆ្លងទន្លេ។

ឯកឧត្តមអភិបាលខេត្ត បានគូសបញ្ជាក់ថា “ក្លឹបនៃក្តីស្រឡាញ់” បានប្តេជ្ញាបន្តរៀបចំកម្មវិធីបរិច្ចាគឈាមជាប្រចាំ ដើម្បីបំពេញតម្រូវការឈាមនៅក្នុងមន្ទីរពេទ្យ ៕