ក្រសួងមុខងារសាធារណៈ ធ្វើបច្ចុប្បន្នភាពអំពីវឌ្ឍនភាពការងារស្តីពី «ការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង ស្ថាប័ន» នៅវិមានរដ្ឋសភា

ភ្នំពេញ៖ នាព្រឹកថ្ងៃទី២៩ ខែមេសា ឆ្នាំ២០២៥ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានអញ្ជើញជាអធិបតីដ៏ខ្ពង់ខ្ពស់ក្នុងសិក្ខាសាលាផ្សព្វផ្សាយ ស្តីពី «ការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង ស្ថាប័ន» នៅវិមានរដ្ឋសភា។

សិក្ខាសាលានេះ មានការអញ្ជើញចូលរួមពីឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា ព្រមទាំងសមាជិក សមាជិកានៃរដ្ឋសភា និងព្រឹទ្ធសភា តំណាងរាស្ត្រមណ្ឌលរាជធានី ខេត្ត អភិបាលនៃគណៈអភិបាលរាជធានី ខេត្ត ថ្នាក់ដឹកនាំ និងមន្ត្រីជំនាញនៃក្រសួងមុខងារសាធារណៈ ថ្នាក់ដឹកនាំ និងមន្ត្រីជំនាញនៃអគ្គលេខាធិការដ្ឋានព្រឹទ្ធសភា និងរដ្ឋសភា។

មានប្រសាសន៍ក្នុងសុន្ទរកថាគន្លឹះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានលើកឡើងថា “សិក្ខាសាលានាថ្ងៃនេះ គឺជាឱកាសដ៏មានសារៈសំខាន់សម្រាប់ក្រសួងមុខងារសាធារណៈ ធ្វើការផ្សព្វផ្សាយ និងជំរុញបន្ថែមទៀតនូវការអនុវត្តការងារដឹកនាំ គ្រប់គ្រង និងអភិវឌ្ឍវិស័យមុខងារសាធារណៈ និងការកែទម្រង់រដ្ឋបាលសាធារណៈ ជាពិសេសការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន ដែលក្រសួងមុខងារសាធារណៈ បាន និងកំពុងសម្របសម្រួល និងគាំទ្រដើម្បីសម្រេច បានតាមការតម្រង់ទិសរបស់ប្រមុខរាជរដ្ឋាភិបាល។ ការវិភាគមុខងារនេះ គឺប្រៀបបានទៅនឹងដំណើរការនៃការពិនិត្យសុខភាព ដើម្បីពិនិត្យមើលកម្លាំង ថាមពល និងភាពធន់នៃរដ្ឋបាលសាធារណៈ ក្នុងការឈានទៅសម្រេចបានចក្ខុវិស័យឆ្នាំ២០៥០ កម្ពុជាជាប្រទេសអភិវឌ្ឍន៍។ ការវិភាគមុខងារនេះ គឺជាឱកាសក្នុងការរៀបចំ និងកែលម្អរដ្ឋបាលសាធារណៈកម្ពុជា ឱ្យកាន់តែមានភាពធន់ និងច្បាស់លាស់បន្ថែម ប្រកបដោយគុណភាព ប្រសិទ្ធភាព និងស័ក្ដិសិទ្ធិភាព។”

សិក្ខាសាលានាពេលនេះ រៀបចំដោយគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន ក្នុងគោលបំណង ដើម្បីផ្សព្វផ្សាយពីវឌ្ឍនភាពការងារ និងទិសដៅអនុវត្តបន្តរបស់ក្រសួងមុខងារសាធារណៈ ក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

សូមជម្រាបថា នេះជាលើកទី២ ដែលឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដឹកនាំប្រតិភូ ក្រសួងមុខងារសាធារណៈ មករដ្ឋភានៃព្រះរាជាណាចក្រកម្ពុជា ដើម្បីធ្វើបច្ចុប្បន្នភាព អំពីវឌ្ឍនភាពការងាររបស់ក្រសួងមុខងារសាធារណៈ ដែលលើកដំបូង រៀបចំឡើងកាលពីថ្ងៃទី១១ ខែធ្នូ ឆ្នាំ២០២៣ កន្លងមក៕