មនុស្ស៦នាក់បានស្លាប់ បន្ទាប់ពីយន្តហោះមួយគ្រឿងបានធ្លាក់ចូលទឹកសមុទ្ទភ្លាមៗ ក្រោយប៉ុនប៉ងហោះចេញពីកោះរ៉ូតាន់ក្បែរឆ្នេរសមុទ្ទនៃប្រទេសហុងឌូរ៉ាស

តេហ្គូស៊ីហ្គាល់ប៉ា៖ បើតាមប្រធានសេវាពន្លត់អគ្គិភ័យប្រាប់ប្រព័ន្ធផ្សព្វផ្សាយក្នុងស្រុក បានឱ្យដឹងថា មនុស្សចំនួន៦នាក់ត្រូវស្លាប់ បន្ទាប់ពីយន្តហោះមួយគ្រឿងបានធ្លាក់ចូលទឹកសមុទ្ទភ្លាមៗ ក្រោយប៉ុនប៉ងហោះចេញពីកោះរ៉ូតាន់(Roatan) ក្បែរឆ្នេរសមុទ្ទនៃប្រទេសហុងឌូរ៉ាស។

ប្រធានសេវាពន្លត់អគ្គិភ័យនៃកោះរ៉ូតាន់ លោក វីលមើ ហ្គូអឺរើរ៉ូ (Wilmer Guerrero) បានប្រាប់ទូរទស្សន៍ក្នុងស្រុកមួយថា មនុស្សចំនួន៦នាក់បានស្លាប់ ខណៈអ្នកដំណើរចំនួន៨នាក់ផ្សេងទៀតទំនងជានៅតែស្ថិតនៅក្នុងយន្តហោះ ដែលកំពុងលង់លិចនៅក្នុងទឹកសមុទ្ទ។ ដោយឡែក ប៉ូលិសកោះនេះបានអះអាងថា យន្តហោះបានធ្លាក់ចូលទៅក្នុងទឹកភ្លាមៗ បន្ទាប់ពីបានហោះឡើង។ ជាមួយគ្នានេះ អាជ្ញាធរក៏បានគូសបញ្ជាក់ថា៖«ប្រតិបត្តិការជួយ សង្គ្រោះ គឺ ពិតជាពិបាកណាស់ ព្រោះ យន្តហោះ ធ្លាក់ ចូលទឹក សមុទ្ទ»។

ជុំវិញហេតុការណ៍នេះ រដ្ឋមន្ត្រីដឹកជញ្ជូនរបស់ប្រទេសហុងឌូរ៉ាស់ បានប្រាប់វិទ្យុក្នុងស្រុកមួយថា យន្តហោះនេះមានឈ្មោះថា Jetstream ដែលត្រូវបានដំណើរការដោយក្រុមហ៊ុនអាកាសចរណ៍ Honduran Lanhsa ដោយបានដឹកអ្នកដំណើរសរុបចំនួន១៧នាក់ រួមទាំងអាកាសយានិកចំនួន៣នាក់ផងដែរ។

គួរបញ្ជាក់ថា យន្តហោះនេះក៏បានដឹកអ្នកដំណើរជនជាតិអាម៉េរិកម្នាក់ ជនជាតិបារាំងម្នាក់ ក៏ដូចជាអនីតិជនពីរនាក់ផ្សេងទៀតផងដែរ។

តាមពិតទៅ យន្តហោះនេះគ្រោងហោះហើរទៅកាន់អាកាសយានដ្ឋាន La Ceiba នៅលើដីគោកនៃប្រទេសហុងឌូរ៉ាស ប៉ុន្តែជាអកុសល ហោះមិនទាន់បានស្រួលបួលក៏ធ្លាក់ចូលទៅក្នុងមហាសាគរ។ យ៉ាងណា អាជ្ញាធរមិនទាន់អាចបញ្ជាក់អំពីមូលហេតុនៃការធ្លាក់នេះទេ ខណៈប្រតិបត្តិការស៊ើបអង្កេតកំពុងដំណើរការ៕