លោក ត្រាំ មិនបានច្រានចោលនូវលទ្ធភាពដែលថា អាមេរិកអាចឈានចូលដល់វិបត្តិសេដ្ឋកិច្ចនៅឆ្នាំនេះទេ
វ៉ាស៊ីនតោន៖ ប្រធានាធិបតីសហរដ្ឋអាម៉េរិក ដូណាល់ ត្រាំ កាលពីថ្ងៃអាទិត្យទី៩មីនា មិនបានច្រានចោលនូវលទ្ធភាពដែលថា សហរដ្ឋអាម៉េរិកអាចឈានចូលដល់វិបត្តិសេដ្ឋកិច្ចនៅឆ្នាំនេះទេ។
នៅពេលសាកសួរដោយផ្ទាល់អំពីវិបត្តិសេដ្ឋកិច្ចដែលអាចកើតមាននៅឆ្នាំ២០២៥ លោកប្រាប់អ្នកសម្ភាសន៍ Fox News ថា «ខ្ញុំស្អប់ការទស្សន៍ទាយរឿងបែបនេះ! វាមានរយៈពេលនៃការផ្លាស់ប្ដូរមួយ ពីព្រោះអ្វីដែលយើងកំពុងធ្វើ គឺធំណាស់! យើងកំពុងនាំយកទ្រព្យសម្បត្តិត្រឡប់ទៅអាម៉េរិកវិញ។ វាត្រូវការពេលបន្តិច»។ ទោះជាយ៉ាងណា រដ្ឋមន្ត្រីក្រសួងពាណិជ្ជកម្ម លោក ហាវើដ លូតនិច បានទទូចថា នឹងមិនមានការធ្លាក់ចុះនៅក្នុងសេដ្ឋកិច្ចធំបំផុតរបស់ពិភពលោកនោះទេ ខណៈដែលលោកទទួលស្គាល់ថាតម្លៃទំនិញមួយចំនួនអាចនឹងកើនឡើង។
ការគម្រាមកំហែងដាក់ពន្ធលើទំនិញនាំចូលទៅកាន់សហរដ្ឋអាម៉េរិករបស់ ត្រាំ ប្រឆាំងនឹងប្រទេសកាណាដា ម៉ិកស៊ិក ចិន និងប្រទេសដទៃទៀត បានធ្វើឱ្យទីផ្សារហិរញ្ញវត្ថុរបស់សហរដ្ឋអាម៉េរិក ស្ថិតក្នុងភាពចលាចល។ ទីផ្សារភាគហ៊ុនទើបតែបានឆ្លងផុតពេលវលាដ៏អាក្រក់បំផុត ចាប់តាំងពីការបោះឆ្នោតខែវិច្ឆិកា។ វិធានការនៃទំនុកចិត្តរបស់អ្នកប្រើប្រាស់ធ្លាក់ចុះ ដោយសារតែអ្នកទិញទំនិញទប់ទល់នឹងតម្លៃខ្ពស់ព្រោះតែពន្ធគយ ហើយការបញ្ឈប់ការងាររបស់រដ្ឋាភិបាល បន្ថែមការព្រួយបារម្ភមួយផ្នែកទៀត។
សន្ទស្សន៍ធនាគារកណ្តាល បានព្យាករថា នឹងធ្លាក់ចុះ២,៤ភាគរយនៃកំណើន GDP ពិតប្រាកដនៅក្នុងត្រីមាសទី១របស់ឆ្នាំនេះ នឹងក្លាយជាលទ្ធផលដ៏អាក្រក់បំផុតចាប់តាំងពីជំងឺរាតត្បាតកូវីដ-១៩។ ភាពមិនច្បាស់លាស់ជាច្រើន បានកើតចេញពីគោលនយោបាយពន្ធគយរបស់ ត្រាំ ខណៈអាជីវកម្ម និងអ្នកវិនិយោគឆ្ងល់ថា តើនឹងមានអ្វីកើតឡើងបន្ទាប់? យ៉ាងណា រដ្ឋបាលត្រាំទទូចថា ខណៈសេដ្ឋកិច្ចនឹងឆ្លងកាត់ការផ្លាស់ប្ដូរដ៏រដិបរដុប អ្វីៗត្រូវបានដឹកនាំក្នុងទិសដៅវិជ្ជមាន។ នៅក្នុងសាររបស់ខ្លួន លោក ត្រាំ បានប្រាប់ប្រជាជនអាម៉េរិកឱ្យរំពឹងថា នឹងមានការរំខានតិចតួចនៅពេលដែលពន្ធគយត្រូវបានប្រកាស។
ការធ្លាក់ចុះសេដ្ឋកិច្ចជាទូទៅត្រូវបានកំណត់ដោយកំណើន GDP ខ្សោយ ឬអវិជ្ជមាន ក្នុងរយៈពេលពីរត្រីមាសជាប់គ្នា។ សហរដ្ឋអាម៉េរិក ស្ថិតក្នុងវិបត្តិសេដ្ឋកិច្ចមួយរយៈពេលខ្លីនៅដើមឆ្នាំ២០២០ ដោយសារជំងឺរាតត្បាតកូវីដ-១៩ រីករាលដាល។ មនុស្សរាប់លាននាក់បានបាត់បង់ការងារ៕
