ការនាំចូលអាវុធរបស់បណ្តាប្រទេសនៅអឺរ៉ុប កើនឡើង ១៥៥% ក្នុងកំលុងឆ្នាំ២០២០-២០២៤ ហើយអ៊ុយក្រែន ក្លាយជាប្រទេសនាំចូលអាវុធធំបំផុតរបស់ពិភពលោក
ស្តុកខុល៖ ការនាំចូលអាវុធរបស់បណ្តាប្រទេសនៅតំបន់អឺរ៉ុបបានកើនឡើង១៥៥ ភាគរយក្នុងកំលុងឆ្នាំ២០២០ ដល់ ២០២៤ ហើយអ៊ុយក្រែនបានក្លាយជាប្រទេសនាំចូលអាវុធធំបំផុតរបស់ពិភពលោកបន្ទាប់ពីការលុកលុយរបស់រុស្ស៊ីឆ្នាំ២០២២។ នេះបើយោងតាមរបាយការណ៍ដែលចេញផ្សាយនៅថ្ងៃចន្ទទី១០ ខែមីនាដោយវិទ្យាស្ថានស្រាវជ្រាវសន្តិភាពអន្តរជាតិស្តុកខុល (SIPRI)។
ទិន្នន័យពីវិទ្យាស្ថានស្រាវជ្រាវសន្តិភាពអន្តរជាតិស្តុកខុលឬហៅកាត់ថា SIPRI បានបង្ហាញថា សហរដ្ឋអាម៉េរិកបន្តក្តោបអំណាចជាអ្នកនាំចេញអាវុធច្រើនសន្ធឹកទៅពាសពេញពិភពលោក ដោយក្រុមហ៊ុនអាម៉េរិកបានបង្កើនចំណែកនៃការនាំចេញអាវុធពិភពលោកដល់៤៣ ភាគរយក្នុងកំលុងឆ្នាំ២០២០ ដល់ ២០២៤ កើនឡើង៣៥ ភាគរយក្នុងកំលុងឆ្នាំ២០១៥ ដល់២០១៩។ យោងតាម SIPRI អឺរ៉ុបទាំងមូលរួមចំណែក២៨ ភាគរយនៃការនាំចូលអាវុធសកលពីឆ្នាំ២០២០ ដល់២០២៤ កើនឡើងពី១១ ភាគរយពីចន្លោះឆ្នាំ២០១៥ ដល់២០១៩។ អ៊ុយក្រែនតែឯងមាន៨,៨ ភាគរយនៃការនាំចូលអាវុធពិភពលោកក្នុងកំលុងឆ្នាំ២០២០ ដល់២០២៤ ហើយតិចជាងពាក់កណ្តាលនៃការនាំចូលទាំងនោះគឺមកពីសហរដ្ឋអាម៉េរិក។
ការឈ្លានពានរបស់រុស្ស៊ីលើអ៊ុយក្រែនបាននាំឱ្យមានការប្រឈមមុខគ្នាដ៏ធំបំផុតរវាងលោកខាងលិច និងរុស្ស៊ី ចាប់តាំងពីវិបត្តិមីស៊ីលគុយបាឆ្នាំ១៩៦២។ សង្រ្គាមបានគូសបញ្ជាក់ពីការពឹងផ្អែករបស់អឺរ៉ុបលើអាវុធរបស់សហរដ្ឋអាម៉េរិក ទោះបីជាសម្ព័ន្ធភាពឆ្លងអាត្លង់ទិក ដែលជាមូលដ្ឋានគ្រឹះនៃយុទ្ធសាស្ត្រសន្តិសុខរបស់អឺរ៉ុបចាប់តាំងពីសង្គ្រាមលោកលើកទី២ កំពុងរង្គោះរង្គើកាន់តែខ្លាំងឡើងក៏ដោយ។ ទិន្នន័យរបស់ SIPRI បានបង្ហាញថា សហរដ្ឋអាម៉េរិកបានផ្គត់ផ្គង់ច្រើនជាង៥០ ភាគរយនៃការនាំចូលអាវុធរបស់អឺរ៉ុបចាប់ពីឆ្នាំ២០២០ ដល់២០២៤ ដោយមានចក្រភពអង់គ្លេស ហូឡង់ និងន័រវេស ក្នុងចំណោមអ្នកទិញកំពូល។ មេដឹកនាំអឺរ៉ុបកាលពីសប្តាហ៍មុនបានគាំទ្រផែនការចំណាយបន្ថែមទៀតលើវិស័យការពារជាតិ បន្ទាប់ពីប្រធានាធិបតីសហរដ្ឋអាម៉េរិក លោក ដូណាល់ ត្រាំ បង្ហាញគោលនយោបាយមិនច្បាស់លាស់។
លោក ភីតធឺ វ៉េសមែន (Pieter Wezeman) អ្នកស្រាវជ្រាវជាន់ខ្ពស់នៃកម្មវិធីផ្ទេរអាវុធ SIPRI បានលើកឡើងថា៖«ជាមួយនឹងការគំរាមកំហែងរបស់រុស្ស៊ីកាន់តែខ្លាំងឡើង និងទំនាក់ទំនងឆ្លងអាត្លង់ទិកស្ថិតក្រោមភាពតានតឹងក្នុងកំលុងរដ្ឋបាលលោកប្រធានាធិបតី ត្រាំ រដ្ឋនៃអង្គការណាតូអឺរ៉ុបបានចាត់វិធានការដើម្បីកាត់បន្ថយការពឹងផ្អែករបស់ពួកគេលើការនាំចូលអាវុធ ដោយងាកទៅពង្រឹងឧស្សាហកម្មអាវុធរបស់អឺរ៉ុបវិញ»។ លោកបន្តថា៖«ប៉ុន្តែទំនាក់ទំនងផ្គត់ផ្គង់អាវុធឆ្លងទ្វីបអាត្លង់ទិកមានឫសគល់យ៉ាងជ្រៅ។ ការនាំចូលពីសហរដ្ឋអាម៉េរិកបានកើនឡើង ហើយរដ្ឋណាតូនៅអឺរ៉ុបមានយន្តហោះប្រយុទ្ធជិត៥០០ គ្រឿង និងសព្វាវុធជាច្រើនទៀតនៅតែបញ្ជាទិញពីអាម៉េរិក»។
ការនាំចេញអាវុធរបស់រុស្ស៊ីបានធ្លាក់ចុះមកនៅត្រឹម៧,៨ ភាគរយនៃទីផ្សារពិភពលោកក្នុងកំលុងឆ្នាំ២០២០ ដល់ឆ្នាំ២០២៤ ដែលជាលទ្ធផលនៃទណ្ឌកម្មអន្តរជាតិជុំវិញសង្រ្គាមនៅអ៊ុយក្រែន និងការកើនឡើងតម្រូវការអាវុធក្នុងស្រុក។ ការនាំចូលអាវុធរបស់អាស៊ី និងអូសេអានីបានធ្លាក់ចុះ២១ ភាគរយជាចម្បងដោយសារចិនផលិតអាវុធខ្លួនឯងកាន់តែច្រើន៕
