បាងកក៖ បើតាមការចុះផ្សាយដោយទីភ្នាក់ងារសារព័ត៌មានរ៉យទ័រ (Reuters) ប៉ូលិសថៃនៅថ្ងៃពុធទី៥ ខែមីនា បានឃាត់ខ្លួនមនុស្សចំនួន១០០នាក់ ពីបទជាប់ពាក់ព័ន្ធក្នុងមជ្ឈមណ្ឌលឆបោកមួយកន្លែងនៅប្រទេសកម្ពុជា ខណៈរឿងនេះគឺជាការបង្ក្រាបទ្រង់ទ្រាយធំក្នុងតំបន់ប្រតិបត្តិការឆបោកតាមអ៊ីនធឺណេត។
អាជ្ញាធរថៃ ដែលកំពុងសម្របសម្រួលការធ្វើមាតុភូមិនិវត្តន៍ អះអាងថា មនុស្ស១០០នាក់ត្រូវបានចាប់ខ្លួន ជាផ្នែកមួយនៃក្រុមឧក្រិដ្ឋជន ដែលដំណើរការប្រតិបត្តិការឆបោកតាមអនឡាញ និងបណ្តាញអ៊ីនធឺណេត។ ស្នងការនគរបាលថៃ លោក ថាតឆៃ ភីតានីឡាប៊ូត បានអះអាងថា ដីកាចាប់ខ្លួនក៏ត្រូវបានចេញផងដែរសម្រាប់ជនជាតិចិនពីរនាក់ ដែលត្រូវបានចោទប្រកាន់ថាជា«មេខ្លោងនៅពីក្រោយ»។
លោក ថាតឆៃ បានប៉ាន់ប្រមាណថា ប្រជាជនថៃជាង១០០០នាក់ កំពុងធ្វើការនៅក្នុងមជ្ឈមណ្ឌលឆបោកតាមព្រំដែន ហើយពួកគេកំពុងបោកប្រាស់ជនរងគ្រោះបន្តដោយការក្លែងបន្លំជាមន្ត្រីរាជរដ្ឋាភិបាល។ លោកបានសង្កត់ធ្ងន់ថា៖«មជ្ឈមណ្ឌលឆបោកទាំងនេះ គឺជាអង្គការឧក្រិដ្ឋកម្មឆ្លងដែន ត្រូវបានអនុវត្តដោយជនបរទេសជាមួយជនជាតិថៃ ដើម្បីបោកប្រាស់ជនជាតិថៃ»។
គួរជម្រាបថា ប្រតិបត្តិការចុះបង្ក្រាបនេះ កើតឡើងបន្ទាប់ពីការឆ្មក់ចូលមជ្ឈមណ្ឌលឆបោកមួយកន្លែង ដោយប៉ូលិសថៃ និងកម្ពុជានៅក្រុងប៉ោយប៉ែត កាលពីខែមុន។ មជ្ឈមណ្ឌលឆបោក ឬ Call-Center បានដំណើរការតាមបណ្តោយបន្ទាត់ព្រំដែនប្រទេសថៃ-មីយ៉ាន់ម៉ា និងថៃ-កម្ពុជាអស់រយៈពេលជាច្រើនឆ្នាំមកហើយ។
គួរបញ្ជាក់ថា ក្រុមឧក្រិដ្ឋជនបានជួញដូរមនុស្សរាប់សែននាក់ឱ្យធ្វើការនៅក្នុងមជ្ឈមណ្ឌលឆបោក ដែលប្រើបច្ចេកទេសទំនើបដើម្បីបោកបញ្ឆោត និងល្បួងមនុស្សឱ្យធ្លាក់ចូលទៅក្នុងអន្ទាក់នៃការបោកប្រាស់។ នេះបើយោងតាមរបាយការណ៍របស់អង្គការសហប្រជាជាតិ។ ជាក់ស្តែង ក្នុងសប្តាហ៍នេះ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានបញ្ជាឱ្យសិក្សាពីប្រសិទ្ធភាពនៃការសាងសង់ជញ្ជាំងព្រំដែនជាមួយប្រទេសកម្ពុជា ដើម្បីទប់ស្កាត់ការឆ្លងដែនខុសច្បាប់ និងឧក្រិដ្ឋកម្មនានា៕
