សេតវិមាន៖ លោក ដូណាល់ ត្រាំ នឹងលើកលែងការយកពន្ធ២៥ភាគរយលើក្រុមហ៊ុនផលិតរថយន្តរបស់ប្រទេសកាណាដា និងម៉ិកស៊ិក សម្រាប់រយៈពេលមួយខែ ដរាបណាពួកគេគោរពតាមច្បាប់ពាណិជ្ជកម្មសេរីដែលមានស្រាប់
វ៉ាស៊ីនតោន៖ សេតវិមានបានប្រកាស កាលពីថ្ងៃពុធទី៥ ខែមីនាថា ប្រធានាធិបតីអាម៉េរិក លោក ដូណាល់ ត្រាំ នឹងលើកលែងការយកពន្ធ២៥ភាគរយលើក្រុមហ៊ុនផលិតរថយន្តរបស់ប្រទេសកាណាដា និងម៉ិកស៊ិកសម្រាប់រយៈពេលមួយខែ ដរាបណាពួកគេគោរពតាមច្បាប់ពាណិជ្ជកម្មសេរីដែលមានស្រាប់។ លោក ត្រាំ ក៏កំពុងពិចារណាលើកលែងពន្ធសម្រាប់ផលិតផលផ្សេងទៀតផងដែរ។
ការប្រកាសរបស់លោក ត្រាំ បានកើតឡើងមួយថ្ងៃបន្ទាប់ពីជជែគ្នាតាមទូរសព្ទជាមួយនាយកប្រតិបត្តិរបស់ក្រុមហ៊ុន Ford, General Motors និង Stellantis ។ ទោះប្រកាសលើកលែងពន្ធលើក្រុមផលិតរថយន្ត តែលោក ត្រាំ បានបញ្ជាក់យ៉ាងច្បាស់ថាលោកមិនបានលុបចោលសង្រ្គាមពាណិជ្ជកម្មជាមួយប្រទេសកាណាដា និងម៉ិកស៊ិកនោះទេ ខណៈដែលលោកដាក់សម្ពាធលើប្រទេសទាំងពីរឱ្យរារាំងការរត់ពន្ធហ្វេតានីលចូលសហរដ្ឋអាម៉េរិក។
បន្ទាប់ពីការសន្ទនាតាមទូរសព្ទជាមួយនាយករដ្ឋមន្រ្តីកាណាដា ចាស្ទីន ទ្រូដូ លោក ត្រាំ បាននិយាយថាលោកមិនជឿថាស្ថានភាពបានប្រសើរឡើងនោះទេ។ ស្ថិតិផ្លូវការបង្ហាញពីហ្វេតានីលមួយភាគតូចនៅសហរដ្ឋអាម៉េរិកឆ្លងកាត់តាមព្រំដែនប្រទេសកាណាដា។
ការពន្យារពេលមួយខែបានជំរុញឱ្យមានការស្ទុះងើបឡើងវិញនៃភាគហ៊ុនរថយន្ត ប៉ុន្តែភាពតានតឹងពាណិជ្ជកម្មបានបង្កើតភាពមិនច្បាស់លាស់សម្រាប់សាជីវកម្មសហរដ្ឋអាម៉េរិក និងកាត់បន្ថយទំនុកចិត្តអ្នកប្រើប្រាស់ ដែលនាំឱ្យមានការលក់ភាគហ៊ុននៅក្នុងរយៈពេលប៉ុន្មានថ្ងៃថ្មីៗនេះ។
ភាគហ៊ុនរបស់ក្រុមហ៊ុន General Motors បានកើនឡើង៧,២ ភាគរយ ហើយក្រុមហ៊ុន Ford បានកើនឡើង៥,៨ កាលពីថ្ងៃពុធ ប៉ុន្តែភាគហ៊ុនទាំងពីរនៅតែធ្លាក់ចុះក្នុងឆ្នាំនេះ។ ពន្ធគយរបស់លោក ត្រាំ អាចបង្កការលំបាកយ៉ាងខ្លាំងដល់ក្រុមហ៊ុនផលិតរថយន្ត ដែលផលិតរថយន្តនៅក្នុងប្រទេសទាំងបី ហើយជារឿយៗដឹកជញ្ជូនគ្រឿងបន្លាស់ឆ្លងកាត់ព្រំដែនអាម៉េរិកខាងជើងច្រើនដង។ ពន្ធគយរបស់បុរសសេដ្ឋកិច្ច ត្រាំ បានធ្វើឱ្យខូចទំនាក់ទំនងរវាងដៃគូពាណិជ្ជកម្មគំពូលទាំងបីរបស់សហរដ្ឋអាម៉េរិក។ កាណាដា បាន វាយបក វិញ ជាមួយ នឹង ការយកពន្ធ លើ ការ នាំចូល របស់ អាម៉េរិក ខណៈ ម៉ិកស៊ិកក៏ បាន ប្តេជ្ញា សងសឹក ដែរ។
ហ្វេតានីលជាមូលហេតុធំនៃការស្លាប់ដោយប្រើថ្នាំញឿនជ្រុលនៅសហរដ្ឋអាម៉េរិក ដែលមនុស្សលើសពី១សែននាក់បានបាត់បង់ជីវិតជារៀងរាល់ឆ្នាំក្នុងប៉ុន្មានឆ្នាំថ្មីៗនេះ។ មន្ត្រីសហរដ្ឋអាម៉េរិកចោទកាណាដា និងម៉ិកស៊ិក ថាជាទីតាំងចែកចាយហ្វេតានីល មុនពេលវាត្រូវបានរត់ពន្ធទៅកាន់សហរដ្ឋអាម៉េរិក ក្នុងកញ្ចប់តូចៗ ដែលជារឿយៗមិនត្រូវបានត្រួតពិនិត្យដោយភ្នាក់ងារគយ។ ទិន្នន័យសាធារណៈបង្ហាញថា ០,២ ភាគរយនៃសារធាតុហ្វេតានីលទាំងអស់ដែលរឹបអូសបាននៅក្នុងសហរដ្ឋអាម៉េរិកបានឆ្លងកាត់ព្រំដែនប្រទេសកាណាដា ខណៈដែលភាគច្រើនមានប្រភពមកពីព្រំដែនភាគខាងត្បូង។
ពន្ធគយគំរាមកំហែងដល់ការស្ទុះងើបឡើងវិញនៃសេដ្ឋកិច្ចរបស់ប្រទេសកាណាដា ហើយអាចបង្កឱ្យមានវិបត្តិសេដ្ឋកិច្ច។ ប្រទេសនេះពឹងផ្អែកលើសហរដ្ឋអាម៉េរិកសម្រាប់៧៥ ភាគរយនៃការនាំចេញ និងមួយភាគបីនៃការនាំចូលទាំងអស់។ រដ្ឋមន្ត្រីការបរទេសកាណាដា លោកស្រី មេឡានី ជូលី បានបញ្ជាក់ថា កាណាដាអាចមានសក្តានុពលប្រើប្រាស់ការនាំចេញប្រេង និងឧស្ម័នជាគន្លឹះក្នុងការចរចា ប្រសិនបើពន្ធរបស់សហរដ្ឋអាម៉េរិកលើការនាំចូលកាណាដាកើនឡើង។
អស់រយៈពេលជាច្រើនទសវត្សរ៍កន្លងមកនេះ ឧស្សាហកម្មរថយន្តនៅអាមេរិកខាងជើងបានដំណើរការស្ទើរតែគ្មានព្រំដែន ដោយសារកិច្ចព្រមព្រៀងពាណិជ្ជកម្មសេរីដែលត្រូវបានចុះហត្ថលេខាដោយប្រធានាធិបតីផ្សេងៗ រួមទាំងលោក ត្រាំ ផងដែរ។រោងចក្រផលិតរថយន្តនៅកាណាដាបានផលិតរថយន្តចំនួន១,៣ លានគ្រឿងកាលពីឆ្នាំមុន ខណៈដែលរោងចក្រនៅម៉ិកស៊ិកផលិតរថយន្តបាន៤ លានគ្រឿង។ ប្រហែល៧០ ភាគរយនៃរថយន្តទាំងនោះត្រូវបានលក់នៅក្នុងក្រុមហ៊ុនចែកចាយរបស់សហរដ្ឋអាមេរិកទៅកាន់អ្នកទិញជនជាតិអាមេរិក។ ទន្ទឹមនឹងនេះដែរ រោងចក្រផលិតរថយន្តនៅសហរដ្ឋអាមេរិកបានផលិតរថយន្តជាង១០លានគ្រឿង។
កាលពីឆ្នាំមុន សហរដ្ឋអាម៉េរិកបាននាំចូលរថយន្តដឹកអ្នកដំណើរតម្លៃ២១៧ ពាន់លានដុល្លារ។ នេះបើយោងតាមទិន្នន័យរបស់នាយកដ្ឋានពាណិជ្ជកម្ម។ ជាងមួយភាគប្រាំនៃរថយន្តទាំងនោះមកពីប្រទេសម៉ិកស៊ិក ដែលជាប្រភពកំពូលនៃការនាំចូលរថយន្តកាលពីឆ្នាំមុន។ តាមពីក្រោយដោយម៉ិកស៊ិក មានប្រទេសជប៉ុន កូរ៉េខាងត្បូង កាណាដា និងអាល្លឺម៉ង់ ដែលបាននាំចេញរថយន្តដឹកអ្នកដំណើរសរុបតម្លៃ១៣១ ពាន់លានដុល្លារទៅកាន់សហរដ្ឋអាមេរិកកាលពីឆ្នាំមុន៕
