មហាយក្សចិន នឹងបង្កើនការចំណាយលើវិស័យការពារជាតិ ៧,២%នៅឆ្នាំនេះ ចំពេលសមរភូមិប្រកួតប្រជែងភូមិសាស្ត្រនយោបាយកាន់តែក្ដៅគគុក
ប៉េកាំង៖ មហាយក្សចិននឹងបង្កើនការចំណាយលើវិស័យការពារជាតិចំនួន៧,២ភាគរយនៅឆ្នាំនេះ ចំពេលសមរភូមិប្រកួតប្រជែងភូមិសាស្ត្រនយោបាយកាន់តែក្ដៅគគុក។
ការបង្កើនខ្ទង់ចំណាយលើវិស័យការពារជាតិនេះត្រូវបានប្រកាសនៅថ្ងៃពុធទី៣ ខែមីនា នៅក្នុងរបាយការណ៍របស់រដ្ឋាភិបាល ចេញផ្សាយនៅក្នុងសភា។ យ៉ាងណា ការបង្កើនការចំណាយលើវិស័យការពារជាតិនេះគឺលើសពីគោលដៅកំណើនសេដ្ឋកិច្ចរបស់ប្រទេសចិនសម្រាប់ឆ្នាំនេះប្រហែល៥ភាគរយ ខណៈមហិច្ឆតារបស់រដ្ឋធានីប៉េកាំងសម្រាប់ការបន្តទំនើបកម្មយោធា ចំពេលមានការប្រកួតប្រជែងភូមិសាស្ត្រនយោបាយដែលកំពុងពុះកញ្ជ្រោលខ្លាំង។
ចាប់តាំងពីលោក ស៊ី ជីនពីង ក្លាយជាប្រធានាធិបតី និងជាអគ្គមេបញ្ជាការជាងមួយទសវត្សរ៍មុន ថវិកាការពារជាតិបានកើនឡើងដល់១,៧៨ ពាន់ពាន់លានយ័ន ឬស្មើ២៤៥,៦៥ ពាន់លានដុល្លារនៅឆ្នាំនេះ ខណៈក្នុងឆ្នាំ២០១៣ មានត្រឹមតែ ៣,៧ពាន់លានដុល្លារប៉ុណ្ណោះ។ លោក ស៊ី មានគោលបំណងបញ្ចប់ទំនើបកម្មយោធាពេញលេញនៅឆ្នាំ ២០៣៥ ដោយយោធាចិនបានអភិវឌ្ឍមីស៊ីល នាវា នាវាមុជទឹក និងបច្ចេកវិទ្យាឃ្លាំមើលជាដើម។ ក្នុងពេលជាមួយគ្នានេះ យោធាកំពុងព្យាយាមហ្វឹកហាត់ត្រៀមខ្លួនប្រយុទ្ធតាមរយៈការហ្វឹកហ្វឺន និងលំហាត់សឹកយោធាដ៏តឹងរ៉ឹងបន្ថែមទៀត។
ការដំឡើងថវិកាលើវិស័យយោធាកើតឡើង បើទោះបីជាមានរឿងអាស្រូវពុករលួយជាច្រើន ដែលប៉ះពាល់ដល់កងទ័ពរំដោះប្រជាជន(PLA) ក្នុងរយៈពេលពីរឆ្នាំចុងក្រោយនេះក៏ដោយ។ គួរជម្រាបថា មហាអំណាចសេដ្ឋកិច្ចទី២ លើសាកលលោកចិននៅតែជាប្រទេសចំណាយលើវិស័យយោធាច្រើនជាងគេទីពីររបស់ពិភពលោក បន្ទាប់ពីសហរដ្ឋអាម៉េរិក ខណៈថវិកាយោធាដែលបានស្នើឡើងសម្រាប់ឆ្នាំ២០២៥ គឺ៨៥០ពាន់លានដុល្លារ៕
