សម្តេចធិបតី ហ៊ុន ម៉ាណែត៖ កំណើនការទិញអចលនទ្រព្យ ទិញផ្ទះ មានការកើនឡើងវិញ ប៉ុន្ដែការកើនឡើងពេលនេះខុសគ្នាពីការកើនឡើងកាលពីមុនវិបត្តិកូវីដ-១៩
ភ្នំពេញ៖ ក្នុងឱកាសអញ្ជើញជាអធិបតីក្នុងពិធីបើក«សន្និសីទចក្ខុវិស័យប្រទេសកម្ពុជា ឆ្នាំ២០២៥ ស្តីពីយុទ្ធសាស្ត្រកំណើនថ្មីរបស់ប្រទេសកម្ពុជា» នៅព្រឹកថ្ងៃទី៤ ខែមីនា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានថ្លែងថា ពេលនេះកំណើននៃការទិញអចលនទ្រព្យ ទិញផ្ទះ មានការកើនឡើងវិញ ប៉ុន្ដែការកើនឡើងពេលនេះខុសគ្នា ពីការកើនឡើងកាលពីមុនវិបត្តិកូវីដ-១៩ គឺកើនឡើងដោយមានភាពច្បាស់លាស់ ទោះបីជាការកើនឡើងតិចតួចក្ដី។
សម្ដេចធិបតីបន្តថា ទោះបីសេដ្ឋកិច្ចកម្ពុជា បានងើបឡើងវិញក្ដី ប៉ុន្ដែការរងផលប៉ះពាល់នៃសេដ្ឋកិច្ចកម្ពុជា តាំងតែពីវិបត្តិកូវីដ-១៩ រហូតមកដល់វិបត្តិសង្គ្រាមតាមបណ្ដាប្រទេសនៅលើពិភពលោក ក៏បានបន្តបង្កផលប៉ះពាល់ដល់សេដ្ឋកិច្ចកម្ពុជានៅឡើយ។ ដូច្នេះហើយកម្ពុជា ត្រូវបន្តរក្សាឱ្យបាននូវកត្តា សុខសន្ដិភាព ដើម្បីបន្តការអភិវឌ្ឍរីកចម្រើនទៅមុខទៀត។
សម្ដេចធិបតីនាយករដ្ឋមន្រ្ដីបន្ថែមថា ទោះបីជាគោលនយោបាយរបស់យើងខិតខំសំយោគ ដាក់ចេញមកល្អយ៉ាងណាក៏ដោយ ក៏ប៉ុន្ដែវានឹងមានការប្រែប្រួលអាស្រ័យ ទៅលើបញ្ហាសេដ្ឋកិច្ចសាកល ដូច្នេះទាមទារឱ្យមានការចូលរួមពីគ្រប់វិស័យ៕
