អ៊ុយក្រែន ចុះកិច្ចព្រមព្រៀងទទួលកម្ចី ២.៨៤ពាន់លានដុល្លារ ជាមួយចក្រភពអង់គ្លេស ដើម្បីយកទៅពង្រឹងសមត្ថភាពការពារជាតិ

ឡុងដ៍៖ នាយករដ្ឋមន្ត្រីអង់គ្លេស លោក ឃារ ស្តាមឺ បានផ្តល់ការស្វាគមន៍យ៉ាងកក់ក្ដៅដល់លោក វ៉ូឡូឌីមៀ ហ្សេឡេនស្គី នៅរាជធានីឡុងដ៍ មួយថ្ងៃបន្ទាប់ពីការប៉ះទង្គិចរវាងមេដឹកនាំអ៊ុយក្រែន និងលោកប្រធានាធិបតីអាម៉េរិក ដូណាល់ ត្រាំ។

ក្នុងជំនួបនេះ លោក ស្តាមឺ បានរំលឹកឡើងវិញនូវការគាំទ្ររបស់ខ្លួន ចំពោះរដ្ឋធានីកៀវនៅមុនកិច្ចប្រជុំកំពូល ដើម្បីពិភាក្សាអំពីវិធីគាំទ្រអ៊ុយក្រែន ក្នុងអំឡុងនៃការឈ្លានពានរបស់រុស្ស៊ី។

លោកបានបញ្ជាក់នៅក្នុងសេចក្តីថ្លែងការណ៍មួយថា នៅក្នុងភាពជាដៃគូជាមួយសម្ព័ន្ធមិត្តរបស់យើង យើងត្រូវពង្រឹងការរៀបចំសម្រាប់ការធានាសន្តិសុខរបស់អឺរ៉ុប រួមជាមួយនឹងការបន្តពិភាក្សាជាមួយសហរដ្ឋអាម៉េរិក។

លោកបានបន្ថែមថា ឥឡូវនេះគឺជាពេលវេលាសម្រាប់ពួកយើង ក្នុងការរួបរួមគ្នាដើម្បីធានានូវលទ្ធផលល្អបំផុតសម្រាប់អ៊ុយក្រែន ការពារសន្តិសុខអឺរ៉ុប និងធានាអនាគតរួមរបស់យើង។ ប៉ុន្មានម៉ោងមុននេះ អ៊ុយក្រែន និងចក្រភពអង់គ្លេស បានបង្ហាញកិច្ចព្រមព្រៀងប្រាក់កម្ចីចំនួន ២,៨៤ពាន់លានដុល្លារ ដើម្បីគាំទ្រដល់សមត្ថភាពការពារជាតិរបស់អ៊ុយក្រែន ដែលត្រូវសងវិញដោយប្រើប្រាស់ទ្រព្យសម្បត្តិបង្កករបស់រុស្ស៊ី។

លោក ហ្សេឡេនស្គី បានសរសេរនៅលើកម្មវិធី X ថា នេះជាយុត្តិធម៌ពិតប្រាកដ! អ្នកដែលបានចាប់ផ្តើមសង្គ្រាមត្រូវតែជាអ្នកខាតបង់។ ទន្ទឹមគ្នានោះ លោក ហ្សេឡេនស្គី ក៏បានសម្ដែងការដឹងគុណដល់ប្រជាជនចក្រភពអង់គ្លេស ចំពោះការគាំទ្ររបស់ពួកគេតាំងពីដំបូងនៃសង្គ្រាម។

លោកគ្រោងនឹងជួបស្តេចឆាលស៍ទី៣ នៅថ្ងៃអាទិត្យនេះ។ យ៉ាងណា លោក ហ្សេឡេនស្គី បានសង្កត់ធ្ងន់ថា ការគាំទ្ររបស់លោក ត្រាំ នៅតែមានសារសំខាន់សម្រាប់អ៊ុយក្រែន ទោះបីជាមានជម្លោះពាក្យសម្តីដ៏ក្ដៅគគុកក៏ដោយ។