សម្ដេចធិបតី ជំរុញទូតកម្ពុជានានានៅបរទេស ផ្សព្វផ្សាយពីវិស័យទេសចរណ៍កម្ពុជាឱ្យបានច្រើន ដើម្បីទាក់ទាញទេសចរមកទស្សនាកម្ពុជា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានជំរុញដល់ឯកអគ្គរាជទូតកម្ពុជានានានៅបរទេសជំរុញការផ្សព្វផ្សាយពីវិស័យទេសចរណ៍កម្ពុជាឱ្យបានច្រើន ដើម្បីទាក់ទាញទេសចរមកទស្សនាកម្ពុជា។
ក្នុងឱកាសអញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងទេសចរណ៍ នារសៀលថ្ងៃទី២៧ ខែកុម្ភៈ ឆ្នាំ២០២៥នេះ សម្ដេចធិបតី ហ៊ុន ម៉ាណែត បានស្នើដល់មន្ត្រីការទូតកម្ពុជានៅតាមបណ្ដាប្រទេសនានាទាំងអស់ឱ្យបង្កើនការផ្សព្វផ្សាយពីទេសចរណ៍ និងសុខសុវត្ថិភាពនៅកម្ពុជា។
សម្ដេចធិបតី បានបញ្ជាក់បន្ថែមថា កម្ពុជាមានចំណុចវិជ្ជមានច្រើន ហើយចំណុចអវិជ្ជមានគឺមានតិចតួចដែលរាជរដ្ឋាភិបាលប្រឹងប្រែងទប់ស្កាត់ ដោះស្រាយ និងបង្ក្រាបជានិច្ច ៕
